Skwa zay gagaʼ ga mgham Belsatsar
5
1 Ma sana fitik, ka magatá mgham Belsatsar ta skwa zay gagaʼ ŋa mnduha ni dəmbuʼ gwal dagala dagala. Ka nzatá tsi ka sa ghuzu ta kəma taŋ. 2 Lama ghuzu da ghəŋa Belsatsar, kaʼa mantsa: « Lawa hlagaghatá leghwaha dasu, nda ya ka kfura tsedi, hlagaghu da ɗa Nevuhadnetsar ma həga Lazglafta ma Ursalima ya, » kaʼa nda kwalvaha. Kumaf kuma mgham ta sa tsa ghuzu ya kawadaga nda tsa mnduha ni dagala dagala ya, nda miʼa ni tani, nda miʼa sanagha ni. 3 Ka hlaktá lu ta tsa leghwaha ka dasu, hlagaghu lu ma həga Lazglafta ma Ursalima ya. Ka sə i mgham nda gwal dagala dagala, nda miʼa ni, nda miʼa sanagha ni ta tsa ghuzu ya mida. 4 Ta say say həŋ ta tsa ghuzu ya, ka fə həŋ ta laha, ka zləzləva lazglaftaha tsaf lu nda dasu, nda ya nda kfura tsedi, nda ya nda ghuva tili, nda ya nda kfur, nda ya nda udzu, nda ya nda pala guli.5 Gi ka zlagaptá sana wa dzva mndu ta vata həga ndusa nda tsagala fa pitirla. Ka vindi tsi ta vindi ta vata həga ɓap lu ma həga ga mgham. Ka nghaŋtá mgham ta tsa dzvu ta vindi ya. 6 Gi ka mbəɗavaftá kuma mgham kusabrah. Ka kəɓutá tsi ma ndanu. Ka ghudzaku karamha ni ha ka ndagatá ghuvi. 7 Ka gwaɗatá mgham nda lwi dagala dagala: « Hagigiɗaghawa gwal dzugwa zlazləra, nda ɗəghaha, nda gwal tsatsa skwi ya, » kaʼa. Ka mgham nda tsa gwal nda ɗifil ma ghəŋa taŋ ma Babila ya mantsa: « Mndu ya ta laviŋta dzaŋaftá na skwi vindaf lu na, mnihaha ta klatá ghəŋa ni, dzaʼa suɗanava suɗa yu ta lguta mamgham mgham, dzaʼa suɗanam suɗa yu guli ta ziɗa dasu ma lwi. Dzaʼa nzakway guli ka mahkəna vla nzaku ma na ga mgham na, » kaʼa. 8 Ka sliʼadamta inda tsa gwal nda ɗifil ma ghəŋa taŋ ta maganatá slna ta mgham ya. Ama ka traptá həŋ ta dzaŋafta ŋa mnanatá mgham ta klatá ghəŋa ni. 9 Ka sgavaghatá zləŋa Belsatsar katakata, ka sgavaghata mbəɗuta kuma ni kusabrah. Ka kəɓutá tsa mnduha ni dagala dagala ya guli.
10 Manda snaŋta ma ni ma mgham ta kuzlahatá lwa mgham, nda tsa mnduha ni dagala dagala ya tani, ka sliʼaftá tsi ka lam da tsa həga ta zə lu ta skwa zay ya. Ka tsa marakw ya nda mgham mantsa: « Rvera ɗa! Ta mblam ka hafa gha! Ma kəɓu ka ma ndanu, ma nza kuma gha kusabrah guli. 11 Mamu sana mndu ma ga mghama gha nda sulkuma lazglaftaha nda ghuɓa mida. Ma fitika nzakwa da gha ta nda hafu ná, si ta tsalay tsa mndu ya ta gwaɗa, mamu mahizl da tsi, mamu ɗifil da tsi manda ɗifila lazglaftaha. Tsaya kəl da gha mgham Nevuhadnetsar ka fatá ka mali ta ghəŋa gwal vza mandaŋ, nda gwal dzugwa zlazləra, nda ɗəghaha, nda gwal tsatsa skwi. 12 Mamu sulkum ta furtuta mida, nda snaŋtá skwi, nda mahizl ma tsatsi ŋa mnigiŋta klatá ghəŋa suni. Nda sna guli ta tsisligiŋtá gwaɗaha ya nda bla ka snaŋta, nda ya ŋa payaftá skwiha ya nda bla nda bla. Mamu tsaya da tsatsi. Tsaya Danyel, mndu tsanaf da gha mgham ta hga ni ka Beltəsaʼtsar ya. Ka hgak hga lu nda va nana, dzaʼa paslaghap pasla ta tsa skwi vindaf lu ta vata həga ya, » kaʼa.
Paslapta Danyel ta vindi ta vata həga
13 Ka klaktá lu ta Danyel ta kəma mgham. Ka mgham nda Danyel mantsa: « Kagha tsa Danyel sana zwaŋ mataba la Yahuda kasaf lu, ka hlagaghutá da ɗa ta həŋ ma Yuda ya ra? 14 Sniɗigha sna gwaɗa ta kagha. Mamu sulkuma lazglaftaha ma kagha ka lu. Ta tsalay ka ta gwaɗa, mamu mahizl nda ɗifil katakata da kagha, ka lu. 15 Kɗakwa lu tsa ta hlagaghatá gwal nda ɗifil ma ghəŋa taŋ katakata, nda ɗəghaha tani ta kəma ɗa, má ŋa dzaŋiɗiftá na vindi na, ka pasliɗipta klatá ghəŋa ni. Ama ka traptá həŋ. 16 Ka snaŋtá yu ta gwaɗa ta kagha. Laviŋ lava kagha ta snaŋtá klatá ghəŋa skwi. Ta tsalay kagha ta skwiha ya nda bla, ka lu. Ndanana, ka laviŋ lava ka ta dzaŋiɗiftá na vindi na, ka mnihatá klatá ghəŋa ni katsi, dzaʼa suɗavagha suɗa yu ta lguta mamgham mgham, dzaʼa suɗagham suɗa yu guli ta ziɗa dasu ma lwi, dzaʼa vlagha vla yu ta mahkəna vla nzaku guli, » kaʼa.
17 Ka Danyel ta kəma mgham mantsa: « Ŋana ŋa ta skwa gha ŋa gha, ka ta vlaŋtá sana mndu a ka. Nziya nza tsi ná, dzaʼa dzaŋaghaf dzaŋa yu ta na vindi na, dzaʼa snagham sna yu ta klatá ghəŋa ni guli. 18 Ari rvera ɗa, vlaŋ vla Lazglafta Dagala ta ga mgham, nda glaku, nda sgit, nda mbraku ta da gha Nevuhadnetsar. 19 Dabga tsa glaku vlaŋ Lazglafta ya, si ta ghudzaku inda mnduha, mndəra mnduha ta gwaɗa kavghakavgha ta sagha ta haɗikha da zləŋ ta kəma ni. Ta dza dza ta mndu ya kumaŋ tsi ta dzata, ta zlana zla ta mndu ya kumaŋ tsi ta zlanata nda hafu. Ta ŋlanaf ŋla ta mndu ya kumaŋ tsi ta ŋlanafta, ta vragana vra ta mndu ya kumaŋ tsi ta vraganata guli. 20 Ama ka nutá tsi ka mndu ta gla ghəŋ. Ka təŋanaftá tsa gla ghəŋa ni ya ta ŋuɗufa ni, ka sliŋwigiŋtá lu ta dughurukwa ga mghama ni, ka kliŋtá sgita ni. 21 Ka ghəzlaptá lu mataba mnduha, ka nutá ndana ni manda ŋa nimtak. Kawadaga nda kəɗihha ma mtak kəʼa ta nzaku. Ka zə tsi ta kuzuŋ manda ŋa slaha. Ka nzaku wuninik tida, ha ka snaŋta ni kazlay Lazglafta Dagala ta nzanaghatá ga mgham ta gə mnda səla kəʼa. Ta vlaŋ vla ta ga mgham guli ta mndu ya kumaŋ tsi.
22 Kagha, Belsatsar zwaŋa ni, nda sna kagha ta inda tsa skwiha ya, kulam nda tsa, hanagana a ka ta ghəŋa gha wa. 23 Mbaɗa ka ka pgha ghəŋ nda Mgham ta luwa. “Hlagiɗighawa hla ta leghwaha ni si ma həga ni ya,” ka ka nda kwalvaha. Ka sə kuni ta ghuzu tida, nda kagha tani, nda mnduha gha dagala dagala tani, nda miʼa gha tani, nda miʼa sanaghaha gha tani. Ta ghəŋa tsa guli ná, ka fə kuni ta laha ka zləzləva lazglaftaha ya tsaf lu nda kfura tseda, nda ya nda dasu, nda ya nda ghuva tili, nda ya nda kfur, nda ya nda udzu, nda ya nda pala tani. Tsa lazglaftaha ya ná, ngha a həŋ ta vli wu, sna a həŋ ta sləməŋ wu, sna a həŋ ta skwi ɗekɗek guli wa. Lazglafta ta ŋanatá hafa gha ma dzva ni, nda inda tva nzakwa gha tani ya ná, vlaŋ a ka ta glaku wa. 24 Tsaya tama kəl Lazglafta ka ghunagatá dzvu ka vindaftá na tahatá skwi nghaŋ ka na.
25 Wya na vindi tahaf lu na:
MENE, MENE, TEKEL, PARSIŊ.
26 Wya klatá ghəŋa ni guli:
MENE ya ná, tsaya mbəɗafta. Mbəɗaf mbəɗa Lazglafta ta fitika ga mghama gha, ka kɗiŋtá tsi.
27 TEKEL ya guli ná, tsaya graf gra lu ta kagha ta kiluʼ, sləftsir nzakwa gha ndəgava a ka wa.
28 PARSIŊ ya guli ná, dgavap dga ga mghama gha, ka vlaŋtá lu ta la Mediya nda la Persiya, » kaʼa.