Danyel 4

Fəglanaghata suni ta Nevuhadnetsar

1 « Iʼi Nevuhadnetsar, ta nzakwa ɗa yu nda zɗaku ta zutá mghama ɗa ma həga ɗa, ma həga ta gə yu ta mgham. 2 Ma sana rviɗik tama, ta hanuta hana ɗa yu ta ghəzləŋa ɗa, ka faɗighata sana suni ta vlihatá zləŋ. Tsa skwi nghaŋ yu ya ná, kɓiɗif kɓa katakata. 3 Mantsa tama, “hagigiɗaghawa haga ta inda gwal nda ɗifil ma ghəŋa taŋ ma Babila, ŋa mnihata taŋ ta klatá ghəŋa tsa suna ɗa ya,” ka yu mnata. 4 Manda sagha gwal vza mandaŋ, nda gwal dzugwa zlazləra, nda ɗəghaha, nda gwal tsatsa skwi, ka rusanaftá yu ta həŋ ta tsa suna ɗa ya, ama ka traptá həŋ ta mnihatá klatá ghəŋa ni.

5 Tahula tsa, ka lam Danyel ta hgə lu ka Beltəsaʼtsar manda hga lazglafta ɗa ya guli da sliɗaghata. Mamu sulkuma lazglaftaha nda ghuɓa ma tsatsi. Ka rusanaftá yu ta tsa suna ɗa ya kazlay na: 6 “Beltəsaʼtsar mali ta ghəŋa gwal vza mandaŋ, nda sna yu kazlay na mamu sulkuma lazglaftaha nda ghuɓa ma kagha kəʼa. Haɗ sana skwi nda ɗifa ta traghaghata wa. Mniha mna ta klatá ghəŋa tsa skwiha nghaŋ yu ma suni ya,” ka yu.

7 Ta hani yu ta ghəzləŋa ɗa, wya tsa skwi nghaŋ yu manda skwi ma suni:

Mamu sana fu dagala nda slra,

ma takataka ghəŋa haɗik.

8 Ka glaftá tsa fu ya, ka mbrafta,

ka zaghutá tsi da ghuvaŋataluwa,

nda ngha mnduha ta ghəŋa haɗik tender.

9 Ká ka nda ɗinakwa sluhwaha ni, rəgədəf yata ni.

Mamu skwa zay ŋa zuŋtá inda skwi da tsi.

Ma sulkuma ni ta nzakwa nimtak.

Ta zligamaha ni ta nzakwa ɗyakha ta nzaku.

Ma tsatsi ta mutsa inda skwi ta hafu ta skwa zay ni.

10 Ta va tsa hana ɗa ya yu ta ghəzləŋa ɗa, ka nghəglaŋtá yu manda skwi ma suni ta zlagapta sana mndu ta saha ta luwa ta nghapta ta wa lilwa, mndu nda ghuɓa ya. 11 Ka guguɗatá tsi nda lwi dagala, kaʼa mantsa:

Ghudiŋwa ghuda ta tsa fu ya, ka ɗatsiŋta kuni ta zligamaha ni,

sləhiŋ kuni ta sluhwaha ni, wutsiŋ kuni ta yakwa ni.

Ka gazlata tsa nimtakha ta nzaku mista ni ya,

nda tsa ɗyakha ta nzaku ta zligamaha ni ya.

12 Nziya nza tsi ná, ka zlanata kuni ta dughwaŋa ni,

nda slərəŋha ni tani ma kuzuŋ ma vwah.

Ka dzərɗanata kuni nda ziɗa kfur nda ya ka ghuva tili ya.

Ka nzakwa wuninik ta saha ta luwa tida.

Ka za tsi ta kuzuŋ ŋa skwa zay ni manda nimtak.

13 Ka mbəɗavafta tsa ndana ni ka ŋa mndu ya,

ka vlaŋta lu ta ndanu manda ŋa nimtak,

ŋa nzata tsi mantsa ya ka vaku^ª ndəfáŋ.

14 Tsa skwi kura lu ya ná, gwal ta nghapta ta wa lilwa ta klagatá lwa ni.

Tsa skwi hbaf lu ya guli ná, gwal nda ghuɓa ta mnafta,

ŋa snaŋta inda skwi nda hafu mida kazlay

Lazglafta Dagala ta nzanaghatá inda ga mgham ta gə mnda səla kəʼa.

Tsatsi ta vla ga mgham ŋa mndu ya ta kum tsi,

tsatsi ta ŋlanaftá mndu ya kul haɗ ghəzliwa ni.

15 Tsaya na suni ta fiɗaghatá iʼi mgham Nevuhadnetsar. Mniha mna ta klatá ghəŋa ni a Beltəsaʼtsar, kabga trap tra inda gwal nda ɗifil ma ghəŋa taŋ ma ga mghama ɗa ta mniɗiŋta. Dzaʼa laviŋ lava kagha, kabga mamu sulkuma lazglaftaha nda ghuɓa ma kagha, » kaʼa.

Paslanapta Danyel ta mahisa suna mgham

16 Ɓats nzəɗa Danyel ta hgə lu ka Beltəsaʼtsar ta nzaku dgəma ma ndanu, ka ksaftá zləŋ katakata. Ka mgham nda tsi mantsa: « Beltəsaʼtsar, ma kɓə tsa suni nda klatá ghəŋa ni ya ta kagha, » kaʼa.

Ka Beltəsaʼtsar mantsa: « Rvera ɗa, má ka ŋa gwal husaŋ ka ta həŋ kumaŋta yu ta nzakwa na suni na. Klatá ghəŋa ni ya guli ná, má ŋa ghumaha gha má katsi. 17 Nda ngha kagha ta tsa fu ta glafta dagala, nda mbra ta zaghu za da ghuvaŋataluwa luwa ya, nda ngha inda mnduha ta ghəŋa haɗik tender guli. 18 Tsa fu ya ná, ká ka nda ɗinakwa sluhwaha ni, rəgədəf yata ni, mamu skwa zay ŋa zuŋtá inda skwi da tsi, mista ni ta nzakwa nimtak, ta zligamaha ni ta baba ɗyakha ta həga taŋ, ma tsatsi ta mutsa inda skwi ta hafu ta skwa zay ni 19 Mantsa nzakwa ni, tsa fu ya ná, kagha ya rvera ɗa. Glaf gla ka, ka nzatá ka nda mbra, ka zaghutá glakwa gha da ghuvaŋataluwa. Ka zaghutá mbrakwa ga mghama gha ta slrəŋa luwa guli.

20 Tahula tsa, ka nghaŋtá ka ta zlagapta sana mndu ta saha ta luwa ta nghapta ta wa lilwa, mndu nda ghuɓa ya. Kaʼa mantsa: “Ghudiŋwa tsa fu ya, ka zaɗanata kuni, ama ka zlanata kuni ta dughwaŋa ni nda slrəŋha ni tani ma kuzuŋ ma vwah. Ka dzərɗanata kuni nda ziɗa kfur nda ya ka ghuva tili. Ka nzakwa wuninik tida, ka za tsi ta kuzuŋ manda ŋa nimtak. Ka nzakwa ni mantsa ya ha vaku ndəfáŋ,” » kaʼa. 21 « Wya klatá ghəŋa tsa suna gha ya a rvera ɗa. Wya gwaɗa kura Lazglafta Dagala nda mghama ɗa, rvera ɗa: 22 Dzaʼa ghəzlighis ghəzla lu mataba mnduha, ŋa dzaʼa gha nzata mataba nimtak ma vwah. Dzaʼa zay ka ta kuzuŋ manda slaha. Dzaʼa nzaga nza wuninik ta luwa ta kagha. Ŋa nzakwa gha mantsa ka vaku ndəfáŋ ha ka snaŋta gha kazlay Lazglafta Dagala ta nzanaghatá inda ga mgham ta gə mnda səla kəʼa. Ta vlay guli ta ga mgham ŋa mndu ya kumaŋ tsi. 23 Ŋa kɗiŋta tama, wya klatá ghəŋa tsa skwi mnə lu kazlay ka zlanata kuni ta dughwaŋa tsa fu ya nda slrəŋha ni tani kəʼa ya: Ta dzaʼa vraf vra ka ta ga mghama gha, baɗ da gi snaŋta gha kazlay Mnda Luwa ta nzanaghatá inda skwi kəʼa. 24 Tsaya tama, kdəkkdək rvera ɗa, zlghaf zlgha ta na hiɗaku ta vlaghata yu na: Zlanava zla ta ga dmakuha ta gə ka, ka maga ka ta skwi tɗukwa. Zlana ka ta ga krughuvi, ka tawa ka ta hiɗahiɗa ta pɗuha. Ma tsa magay gha mantsa ya, kawayaka skwi dzaʼa sgavagha sga nzakwa gha nda rfu, » kaʼa.

Hɗatá tsa suni ya

25 Ka slanaghatá inda tsa skwiha ya ta mgham Nevuhadnetsar. 26 Tahula luta tili ghwaŋpəɗ his, ta dawarakwa ni mgham ta dədəmatá ghəŋa həga ga mghama ni ma Babila, 27 kaʼa mantsa: « Iʼi a ta baftá na luwa Babila dagala na ŋa nzakwa ni ka həga ga mghama ɗa wu ra? Baf nda fərtatá mbrakwa ɗa yu, ŋa vlihatá sgit dagala ma ga mghama ɗa a yu wu ra? » kaʼa.

28 Ta kəɗiŋ a mgham ta mnigiŋtá tsa gwaɗa ya wu, ka snaku lwi ta gwaɗagata daga ta luwa, kaʼa mantsa: « Ari mgham Nevuhadnetsar, sna ta skwi ta mnaghata lu, kləgadaghawu kla lu ta ga mghama gha! 29 Dzaʼa ghəzlighis ghəzla lu mataba mnduha, ŋa nzata gha mataba nimtak ma vwah. Kuzuŋ dzaʼa ka zay manda slaha. Vaku ndəfáŋ dzaʼa nzata ka mantsa ha ŋa snaŋta gha kazlay Lazglafta Dagala ta nzanaghatá ga mgham ta gə mnda səla kəʼa. Tsatsi guli ta vla ga mgham ŋa mndu ya kumaŋ tsi, » kaʼa.

30 Gi ma va tsa fitik ya, ka hɗaftá tsa gwaɗa ya ta Nevuhadnetsar. Ka ghəzliŋtá lu mataba mnduha, ka laghu tsi za kuzuŋ manda ŋa slaha. Ka nzaku wuninik tida. Ka nutá swida ni manda zləghəŋa dzala. Ka nutá ɗahəŋha ni guli ɓiyaŋ ɓiyaŋ manda ŋa zarakha.

Zləzləvay Nevuhadnetsar ta Lazglafta

31 Tahula luta tsa vaku ndəfáŋ ya tama, ka Nevuhadnetsar mantsa: « Ka kapaŋtá yu ta ghəŋ ka nghadafta nda ta luwa, ka vrəglaktá mahizl da ghəŋa ɗa. Ka rfu yu ta Lazglafta Dagala. Ka fə yu ta laha, ka va zləzləvay. Ka ghubu yu ta Lazglafta ŋa kɗekedzeŋ:

Dzaʼa gay ta mghama ni ta inda zamanaha,

mbrakwa ni guli ná, dzaʼa nza nza ŋa inda zamanaha.

32 Haɗ ghəzliwa mnduha ta haɗik ta kəma ni wa.

Manda skwi ya ndanaŋ tsi ta maga tsi nda bakwa gwal vulu ta luwa,

nda mnduha ta haɗik tani.

Haɗ mndu dzaʼa huzliŋtá dzva ni wu,

dər ŋa mnanata kazlay nahgani na ta mag ka na? kəʼa nda tsi wa.

33 Ma tsa fitik ya, ka vrəglaktá mahizl da ghəŋa ɗa. Ka mutsəglaftá yu guli ta sgita ɗa, nda glakwa ɗa ta maraŋtá mbrakwa ga mghama ɗa. Ka sagha gwal ta vlihatá hiɗaku, nda mnduha ɗa dagala dagala da paha iʼi. Ka vrəglaftá yu ta pala, ka mutsəglaftá yu ta sgit ka malaghutá ya ghalya. 34 Ndana tama, iʼi Nevuhadnetsar ná, ta fa laha yu ka zləzləva mgham dagala ta luwa. Inda skwi ta mag tsi ná, kahwathwata ni nzakwa ni. Tɗukwa tɗukwa inda slna ta mag tsi guli. Mamu nda mbrakwa vraganatá gwal ta gla ghəŋ, » kaʼa.