Duhwalha la Yahuda hkən ma həga vu
3
1 Mbaɗa Nevuhadnetsar ka tsaftá sana skwi dzahumaʼ dagala ka dasu. Mitər hkən mbsak lafa ni ta luwa, mitər hkən bughwata ni. Ka dzugwatá tsi ta daɓa Dura ma haɗika Babila. 2 Tahula tsa, ka tsaghanaftá Nevuhadnetsar ta lwi ta inda gwal dagala dagala, nda guvnaha, nda sanlaha ma maliha, nda gwal vla hiɗaku, nda gwal ŋa tsedi, nda gwal ta tsa guma, nda gwal ta ksa slna nda zlahu, nda inda sanlaha ma gwal ta maga slna ma haɗikha, ŋa sagha taŋ da skala tsa skwi dzugwa mgham ya. 3 Ka sliʼaftá inda tsa gwal dagala dagala ya ka sliʼadaghata demdem, ka tskavata ta kəma tsa skwi dzugwa mgham Nevuhadnetsar ya.4 Ka guguɗatá mali ta ghəŋa tsa skalu ya nda lwi dagala, kaʼa mantsa: « Ariwa inda mnduha, mndəra mndu ta gwaɗaha kavghakavgha. Ka fata kuni ta sləməŋ ŋa sna gwaɗa dzaʼa mnaghunata lu ŋa magay ghuni: 5 Ka gi nda sna kuni ta vyatá duliha, nda siŋlakha, nda htimbilha kavghakavgha, nda dewdewha, nda inda huzla skalu ta ghudzaga ya, ka zlambata kuni zluzlumbruh ta haɗik, ŋa vla glaku ŋa na skwi dzahumaʼ ka dasu dzugwa mgham Nevuhadnetsar na. 6 Ka dər wati ma mndu dzaʼa kwalaghutá zləmbata ka tsəlɓu ŋa ni ya, gi dzaʼa klaf kla lu hada hada ta tsa mndu ya ka vzamta da həga vu ghandand, » kaʼa. 7 Mantsa tama, ná tsa gi snaŋta inda mnduha, mndəra mnduha ta gwaɗa kavghakavgha ta sagha ta haɗikha, ta tsa vyatá duliha, nda siŋlakha, nda htimbilha kavghakavgha, nda inda huzla skalu ta ghudzaga ya, ka zlambatá həŋ ta haɗik ka tsəlɓu ŋa vla glaku ŋa tsa skwi dzahumaʼ ka dasu dzugwa mgham Nevuhadnetsar ya.
8 Gi ma va tsa fitik ya, ka lagha sanlaha ma mnduha la Kaldiya pgha rutsak ta la Yahuda. 9 Ka həŋ nda mgham Nevuhadnetsar mantsa: « Rvera ɗa, ta mblam ka hafa gha! 10 Vərɗa kagha ta fatá zlahu kazlay, inda mndu ta snaŋta vyatá duliha, nda siŋlakha, nda htimbilha kavghakavgha, nda dewdewha, nda inda huzla skalu ta ghudzaga, ka zləmbata tsi zlumbruh ta haɗik ka tsəlɓu ŋa vlaŋtá glaku ta tsa skwi dzahumaʼ ya. 11 Dər wati ma mndu dzaʼa kwalaghutá zləmbata ka tsəlɓu ŋa ni ya, dzaʼa klaf kla lu hada hada ta tsa mndu ya ka vzamta da həga vu ghandand, ka kagha kay ɓa. 12 Mantsa nzakwa ni mghama ɗa, mamu sana mnduha la Yahuda, i Sadrak, nda Mesak, nda Ghaveɗnegu, tsa mnduha valaŋ ka ta slna nzaku ka mali ŋa nghapta ɗina ka haɗika Babila, sna həŋ ta skwi mnaf ka. Haɗ həŋ mista lazglaftaha gha wa. Tsəlɓa a həŋ ta tsəlɓu ŋa tsa skwa gha dzugwana ka dzahumaʼ, ka dasu ya guli wu, » ka həŋ.
13 Mantsa tama, huɓ sliʼaf sliʼa Nevuhadnetsar nda gufatá ŋuɗuf, ka gaftá sidi. Kaʼa mantsa: « Hlagiɗighawa hla ta i Sadrak, nda Mesak, nda Ghaveɗnegu ya, » kaʼa. Ka hlədanaghata lu ta həŋ. 14 Ka Nevuhadnetsar nda həŋ mantsa: « Ari i Sadrak, nda Mesak, nda Ghaveɗnegu, va kahwathwata haɗ kuni mista lazglaftaha ɗa, tsəlɓa a kuni ta tsəlɓu ŋa tsa skwi dzahumaʼ ka dasu dzugwana yu ya ra? 15 Ndanana tama, dzaʼa nda sna kuni guli ta vyəglatá duliha, nda siŋlakha, nda htimbilha kavghakavgha, nda dewdewha, nda inda huzla skalu ta ghudzaga, dzaʼa nda paya vgha ghuni ma tsa fitik ya, ŋa tsəlɓu ŋa tsa skwi dzugwa yu ya suʼu? Ka tsəlɓa a kuni wu, dzaʼa gi vzam vza lu haɗ dzudzukway wu ta kaghuni da həga vu ghandand. Wati ma lazglafta ya dzaʼa klaptá kaghuni ma dzva ɗa na? » kaʼa.
16 Ka i Sadrak, nda Mesak, nda Ghaveɗnegu zlghanaftá wi ta mgham Nevuhadnetsar mantsa: « Haɗ ghəzliwa zlghaghafta ŋni ta wi ta ghəŋa ni wa. 17 Rvera ɗa, dər vzam vza ka ta aŋni da tsa duda vu ghandand ya ná, mamu Lazglafta ŋni ya ta ksanata ŋni ta slna nda mbraku ŋa katagaŋnapta ma tsa həga vu ghandand ya, dzaʼa katagaŋnapta guli ma dzva gha! 18 Rvera ɗa, dər katá a tsi ta aŋni guli wu, skwi ŋa snaŋta gha ná, haɗ aŋni ta dzaʼa mista lazglaftaha gha, ka tsəlɓu ŋa tsa skwi dzugwa ka dzahumaʼ ka dasu ya wu, » ka həŋ.
19 Ka gaftá Nevuhadnetsar ta sidi katakata, ka ŋrusanavatá kuma ta i Sadrak, nda Mesak, nda Ghaveɗnegu. Kaʼa mantsa: « Vanaghawa va ta vu gik ma həga vu manda tsa snu lu ya, manda tsa snu lu ya ha ndəfáŋ səla, » kaʼa. 20 Kaʼa nda sludziha ni ya nda mbra nda mbra guli mantsa: « Habafwa haba ta i Sadrak, nda Mesak, nda Ghaveɗnegu, ka pghadamta kuni ta həŋ da tsa həga vu ghandand ya! » kaʼa. 21 Mantsa tama, ka gi habaftá lu ta tsa mnduha hkən ya, nda lgutha taŋ nda lgutha taŋ, nda deri nda deri, ka pghadamtá lu ta həŋ da tsa həga vu ghandand ya. 22 Dabga tsa gwaɗa mgham ka ŋəɗa ŋəɗa ya, ka viŋtá lu ta tsa vu ya gik dagala, ka malaghutá mbraku. Mantsa tama, ma lagha tsa sludziha ya da pghadamtá i Sadrak, nda Mesak, nda Ghaveɗnegu da tsa vu ya, ka rwanatá ghanika tsa vu ya ta vərɗa hahəŋ. 23 Ka rkaghatá tsa mnduha hkən, i Sadrak, nda Mesak, nda Ghaveɗnegu tutuhnzul da takataka tsa həga vu ghandand ya.
24 Tahula tsa, buguts ka mgham Nevuhadnetsar sliʼaftá, ka nzatá flara. Kaʼa nda gwal ta vlaŋtá hiɗaku mantsa: « Hkən a mnduha pghadam mu nda habatá həŋ da takataka vu kay ra? » kaʼa. « Manda va tsa nzakwa ni rvera ɗa, » ka həŋ nda tsi. 25 Ka mgham mantsa: « Aʼ, fwaɗ mnduha ta nghə yu ta wawaku kul habaku ma həga vu! Haɗ sana skwi ta balatá həŋ wa. Manda tsatá sani ma lazglaftaha, ka yu ta ngha tsa mafwaɗa taŋ ya, » kaʼa. 26 Ka lagha Nevuhadnetsar ta wa tgha tsa həga vu ghandand ya. Kaʼa nda lwi dagala nda i Sadrak, nda Mesak, nda Ghaveɗnegu mantsa: « Kwalvaha Lazglafta Dagala, sabwa sa, saghuwa sa! » kaʼa. Ka sab i Sadrak, nda Mesak, nda Ghaveɗnegu ma tsa vu ya. 27 Ka tskadaghatá gwal dagala dagala, nda guvnaha, nda sanlaha ma maliha, nda gwal ta vla hiɗaku ŋa mgham ta vgha da vitsanavatá tsa duhwalha hkən ya. Ndəheɗaŋ a vu ta vgha taŋ wa. Dər swida taŋ, draŋ a vu wa. Draŋ a vu dər lguta taŋ guli wa. Haɗ dər ɗiŋa skwi ta ziʼaku ta həŋ wa.
28 Ka Nevuhadnetsar mantsa: « Zləzləvama zləzləva ta Lazglafta i Sadrak, nda Mesak, nda Ghaveɗnegu! Ta Lazglafta taŋ fafta na kwalvaha na ta ghəŋa taŋ, ka kwalaghutá həŋ ta snatá gwaɗa ɗa. “Dər vlata ŋni ta vgha ŋni ŋa dzaʼa da vu, ka ya dzaʼa ŋni mista sana lazglafta, ka tsəlɓu ŋa ni, ka zlanatá Lazglafta ŋni,” ka həŋ. Ka ghunagatá tsa Lazglafta ya ta duhwala ni ŋa mbanaftá kwalvaha ni. 29 Ndana tama, wya ka iʼi ta mnata skwi ŋa magay, ŋa inda mndəra mnduha ta inda haɗikha ta gwaɗa kavghakavgha. “Dər wati ma mndu tsi dzaʼa vzaftá rutsak ta Lazglafta i Sadrak, nda Mesak, nda Ghaveɗnegu ya, dzaʼa ɗatsanap ɗatsa lu ta tsa mndu ya. Dzaʼa nuna həga tsa mndu ya ka maghdzək, kabga haɗ sana lazglafta dzaʼa laviŋta mbanaftá mndu manda va nana wu,” » kaʼa. 30 Tahula tsa, ka ŋlanaftá mgham ta i Sadrak, nda Mesak, nda Ghaveɗnegu, ta haɗika Babila.
31 Ka tsaghanaftá mgham Nevuhadnetsar ta lwi ta inda mndəra mnduha ta gwaɗa kavghakavgha ta inda haɗikha ta ghəŋa haɗik demdem. Kaʼa mantsa: « Ka nza zɗaku katakata ta ghəŋa ghuni! 32 Mandərmimiha nda mazəmzəmha ya magiha Lazglafta Dagala ná, ɗina ka snaghunamta ɗa.
33 Malaghu mala na mandərmimiha ni na ta mbraku,
mazəmzəmha ni guli ná, fərtu fərta katakata.
Ga mghama ni ná, ŋa kɗekedzeŋ nzakwa ni,
mbrakwa ni guli ná, dzaʼa nza nza ŋa inda zamanaha, » kaʼa.