Danyel 2

Suna Nevuhadnetsar

1 Ta mahisa vakwa Nevuhadnetsar ta pala, ka fanaghatá suniha. Ka kɓanaftá tsi, ka sulanaftá iri. 2 Ka mgham mantsa: « Hagigiɗaghawa haga ta gwal vza mandaŋ, nda gwal dzugwa zlazləra, nda ɗəghaha, nda slayaŋha, ka mnihata həŋ ta tsa suna ɗa ya, » kaʼa. Ka sliʼadaghatá tsa mnduha ya ta kəma mgham. 3 Ka mgham nda həŋ mantsa: « Mamu suni ta faɗighata ka kɓiɗifta katakata. Ta kumay yu ta mniɗiŋta ghuni ta tsa suni ya, » kaʼa. 4 Ka tsa ɗəghaha ya nda mgham nda gwaɗa la Aram mantsa: « Rvera ɗa, ta mblam ka hafa gha! Rusanaf rusa ta kwalvaha gha ta tsa suna gha ya, dzaʼa mnaghaŋ mna ŋni ta klatá ghəŋa ni, » ka həŋ. 5 Ka mgham nda tsa ɗəghaha ya mantsa: « Gwaɗa ya mna yu ná, nda mna: Ka mniɗiŋ a kuni ta tsa suna ɗa ya, nda klatá ghəŋa ni tani wu katsi ná, dzaʼa ɗatsaghunap ɗatsa lu, ŋa nuta həga ghuni ka maghdzək. 6 Ama ka mniɗiŋ mna kuni ta tsa suna ɗa ya, nda klatá ghəŋa ni tani katsi, dzaʼa mbəhaghuna mbəha yu katakata, dzaʼa vlaghuna vla yu ta sgit dagala. Mantsa tama, mniɗiŋwa mna ta tsa suna ɗa ya, mniha kuni guli ta klatá ghəŋa ni, » kaʼa.

7 Ka həŋ ka mahis nda mgham mantsa: « Rvera ɗa, ka rusanaf rusa mgham ta tsa suna ni ya ta kwalvaha ni, dzaʼa mnanaŋ mna ŋni ta klatá ghəŋa ni, » ka həŋ. 8 Ka mgham zlghaftá wa ni mantsa: « Nda sna yu ɗina ta ndana ghuni, ta kumay kuni ta gagaya fitik, kabga nda sna kuni kura kura yu kahwathwata, mnaghuna mna yu. 9 Ama ka mniɗiŋ a kuni ta tsa suna ɗa ya wu katsi, ta tva turtuk dzaʼa tsaghunaghata yu ta guma ta inda kaghuni. Nza nda nza kuni ka dzrafta tsakalawi ŋa sagha ta kəma ɗa ŋa mnihata ŋa nana iʼi, ka kəzlay ka gagayakwa tsa fitik ya kəʼa. Ŋa iʼi ná, mniɗiŋwa mna ta tsa suna ɗa ya ndanana. Ka mniɗiŋ mna kuni katsi, dzaʼa nda sna yu kazlay na, dzaʼa laviŋ lava kuni ta mniɗiŋta klatá ghəŋa ni guli kəʼa, » kaʼa. 10 Ka tsa ɗəghaha ya guli mantsa: « Rvera ɗa, haɗ mnda səla dər turtuk ta na ghəŋa haɗik na, dzaʼa laviŋta zlghaftá wa na skwi ta ɗawu mgham na wa. Vani ná, haɗ mgham dər turtuk, dər kinawu sgita ni nda mbrakwa ni tani, ta kəɗ ɗawaŋtá mndərga skwi manda nana dər turtuk səla, da gwal vza mandaŋ, nda gwal dzugwa zlazləra, nda slayaŋha wa. 11 Ɗukɗukwa nzakwa na skwi ta ɗawu mgham na, haɗ mndu dzaʼa laviŋtá zlghaghaftá wa ni wu, ba lazglaftaha kasiʼi. Tsaw ta nzaku mataba mnda səla a hahəŋ guli wu, » ka həŋ.

12 Mantsa tama, ka gufaftá ŋuɗufa mgham katakata, ka gaftá sidi kazlay zaɗanawa zaɗa ta inda gwal nda ɗifil da həŋ ma Babila kəʼa. 13 Ka vindaftá tsi nda vinda, ka dgiŋta da inda vli kazlay na, zaɗanatá inda gwal nda ɗifil da həŋ kəʼa. Ka zbə lu ta i Danyel nda graha ni guli ŋa pslatá həŋ.

14 Ka lagha Danyel ɗasuwa nda ɗifil slanaghatá Aryuk mali ta ghəŋa gwal ta ngha mgham. Tsa Aryuk ya ná, si sab sa ŋa dzaʼa zaɗanatá inda gwal nda ɗifil ma ghəŋa taŋ ma Babila ya. 15 Kaʼa nda tsa Aryuk mali ta ghəŋa gwal ta ngha mgham ya mantsa: « Kabgawu kəl mgham ka fatá na zlahu ɗukɗukwa na manda na katək na? » kaʼa. Ka rusanaftá Aryuk ta Danyel ta skwi ta magaku. 16 Gi ka sliʼaftá Danyel ka laghu slanaghatá mgham, ka ndəɓanatá dzvu ŋa zlanaŋtá fitik kwitikw, ŋa mnanata ni ta klatá ghəŋa tsa suna ni ya.

17 Tahula tsa, ka sliʼaftá Danyel ka laghu dzagha ni. Ka snanamtá tsi ta skwi ta magaku ta graha ni i Hananya, nda Misaʼel, nda Ghazarya. 18 Kaʼa nda həŋ mantsa: « Ka tawa kuni ta taw ka ŋəɗa ŋəɗa da Lazglafta ta luwa. Ka ɗawa kuni ta zɗakatahuɗa ni ta ghəŋa tsa suni nda ɗifa ya, ka mnamaŋta tsi, kada kwala lu ta zaɗamata, nda sanlaha ma gwal nda ɗifil da həŋ tani ma Babila, » kaʼa. 19 Ta tsa rviɗik ya, ka maranaŋtá Lazglafta ta tsa skwi nda ɗifa ya ta Danyel girviɗik manda skwi ma suni. Mbaɗa Danyel ka zləzləva Lazglafta ta luwa, 20 kaʼa mantsa:

« Zləzləvama Lazglafta

dər yawu tsi ŋa ɗekɗek,

kabga ŋa ni ɗifil, nda mbraku tani.

21 Tsatsi ta mbəɗanaftá fitika skwi,

nda skwi ta magaku tani.

Tsatsi ta klagiŋtá mghamha ta pala,

tsatsi ta faftá həŋ guli.

Tsatsi ta vla ɗifil ŋa gwal nda ɗifil,

nda snaŋtá skwi ŋa gwal nda mahizl ma ghəŋa taŋ guli.

22 Tsatsi ta marigiŋtá skwiha nda la,

nda skwiha ya nda ɗifa tani.

Nda sna tsatsi ta skwiha nda ɗifa ma grum,

mamu tsuwaɗak ta wanaftá tsatsi.

23 Ari Lazglafta dzidzíha ɗa,

ta rfay yu ta kagha katakata,

ta zləzləvay yu ta kagha,

kabga vliha vla ka ta ɗifil, nda mbraku.

Ndanana, ka sniɗimtá ka ta skwi ya ɗawaŋ ŋni da kagha,

ka snaŋnamtá ka ta suna mgham, » kaʼa.

Rusanaftá suna ni ta Nevuhadnetsar

24 Tahula tsa, ka sliʼaftá Danyel ka lagha slanaghatá Aryuk, tsa mndu ya fa mgham ŋa zaɗanatá gwal nda ɗifil ma ghəŋa taŋ ma Babila ya. Manda ɓhadaghata ni, kaʼa nda tsi mantsa: « Wya dzvu, ma zaɗana ka ta gwal nda ɗifil ma ghəŋa taŋ ma Babila. Pgha ta iʼi da mgham, dzaʼa mnanaŋ mna yu ta klatá ghəŋa tsa suna ni ya, » kaʼa.

25 Mantsa tama, ka gi kladamtá Aryuk ta Danyel da mgham, kaʼa mantsa: « Rvera ɗa, slaf sla yu ta sana mndu ma mndəra la Yahuda mataba gwal kasagagha lu, dzaʼa snaghamta klatá ghəŋa suni ta faghaghata kay, » kaʼa. 26 Ka mgham nda Danyel ta hgə lu ka Beltəsaʼtsar ya mantsa: « Dzaʼa laviŋ lava ka ta sniɗimtá tsa suni ta faɗighata ya, nda klatá ghəŋa ni tani? » kaʼa nda tsi. 27 Ka Danyel ta kəma mgham mantsa: « Haɗ gwal nda ɗifil ma ghəŋa taŋ, gwal dzugwa zlazləra, nda gwal vza mandaŋ, nda gwal tsatsa skwi, dzaʼa laviŋta rusanaftá mgham ta tsa skwi nda ɗifa ɗawaŋ tsi ya wa. 28 Ama mamu sana Lazglafta ta luwa ta marigiŋtá skwiha nda ɗifa. Tsatsi ta snanamtá mgham Nevuhadnetsar ta skwiha dzaʼa magaku ma fitikha ta sagha. Tsa skwiha maraghaŋ Lazglafta ma suni ta han ka ta hani ta ghəzləŋa gha ya ná, wya tsi: 29 Rvera ɗa, manda hanadata gha ta ghəzləŋa gha ná, ka zlraftá ka ta ndandanaku ta ghəŋa skwiha dzaʼa magaku dazlay ta kəma, ka maraghaŋtá tsa mndu ta marigiŋtá skwiha nda ɗifa ya, ta skwi dzaʼa magaku. 30 Iʼi ná, malaghuta ɗa nda ɗifil ta sanlaha ma mnduha a kəl lu ka mariɗiŋtá tsa skwi nda ɗifa ya wu, ama nda nza ŋa laviŋta mndu ta mnaghaŋta klatá ghəŋa tsa suni ta faghaghata ya, nda ya ŋa snaŋta gha ta skwi ta ndanə ka ma ghəŋa gha.

31 Rvera ɗa, wya tsa skwi nghaŋ ka ya: Sana skwi ya ta sliʼaftá ta kəma gha dagala dzahumaʼ, ta wuɗaku ka ghulpa ira mndu, ta ga zləŋ katakata ŋa mndu. 32 Ka dasu dzeʼdzeʼ ghəŋa ni. Ka kfura tsedi na ghuva ni, nda dzvuha ni. Ka ghuva tili na huɗa ni, nda rkufha ni. 33 Ka kfur səla ni. Papahha ni ya guli ná, ka kfur təv ya, ka rɓisl drap lu nda dra təv ya nzakwa ni. 34 Tata nghay nghay ka, ka dgaghutá sana pala ta vgha ka ghəŋa ni ka dɗagata, ka slafta ta papaha tsa skwi dzahumaʼ ka kfur, nda ya ka rɓisl drap lu nda dra ya kay, ka dzaɓanapta. 35 Ka dzaɓanapta tsi ka skwa turtuk ta tsa kfur, nda tsa rɓisl drap lu nda dra ya, nda tsa ghuva tili ya, nda tsa kfura tsedi ya, nda tsa dasu ya tani. Ka nutá tsa skwiha ya manda sabatbat ta blikwi, ka sagha falak faɗaghata hərzleleʼ. Nghigliŋ a lu ta fefewa taŋ ɗekɗek wa. Ama ka nutá tsa pala ta slafta ta tsa skwi dzahumaʼ ka ghwá dagala ya, ka ndəghanaftá ghəŋa haɗik demdem.

36 Tsaya tsa suni ya. Dzaʼa mnaŋ mna ŋni ta kəma mgham ta klatá ghəŋa ni. 37 Rvera ɗa, kagha mgham ta ghəŋa inda mghamha. Lazglafta ta luwa ta vlaghatá ga mgham, nda inda mbraku, nda sgit tani. 38 Ma inda vli ya nza nza mnda səla, nda nimtakha tani, nda ɗyakha tani ná, ma dzva gha pghamta Lazglafta ta həŋ, ka gay gha ta mgham ta ghəŋa taŋ demdem. Tsa ghəŋ ka dasu ya ná, kagha ya. 39 Ma vla gha, ŋa sliʼafta sana ga mgham kul lafi taɓta ŋa gha. Tahula tsa guli, ŋa saba sana mahkəna ga mgham ya graf lu nda ghuva tili ya, ŋa gay tsatsi guli ta mgham ta ghəŋa haɗik demdem.

40 Tahula tsa guli, ŋa saba sana mafwaɗa ga mgham təŋ təŋa manda kfur. Nziya nza tsi ná, kfur ta ɓalanapta, ka huʼanaptá dər nahgani tsi. Tsa ga mgham ya guli ná, dzaʼa ɓalanap ɓala ta inda tsa sanlaha ma ga mgham ya manda kfur ta huʼanaptá skwiha. 41 Tsa papahha ni nda zwana səlaha ni, ka rɓisl drap lu nda dra təv ya, ka kfur təv ya nghaŋ ka ta nzakwa ni ya ná, manda tsaya dzaʼa nzakwa dgatá tsa ga mgham ya. Ama dzaʼa mamu mbrakwa kfur kiʼa mida, manda tsa kfur nghə ka laɓanaf lu nda dratá rɓisl ya. 42 Tsa zwana səlaha ni laɓata ni tsaɗ ya tsaɗ ya nda kfur, nda ya nda rɓisl drap lu nda dra ya ná, tsaya ta maray kazlay na, dzaʼa nda mbra təv ya, mbra a təv ya wu, tsa ga mghama ni ya kəʼa. 43 Tsa laɓatá kfur nda rɓisl drap lu nda dra nghaŋ ka ya ná, mbra a wa. Manda tsaya dzaʼa dzraf dzra mnduha ta wi mataba taŋ nda ma kluvtá makwa, ama mbrəta a tsa dzratá wi taŋ ya wu, kabga guya a kfur ta vgha nda rɓisl drap lu nda dra wa.

44 Ma tsa fitik dzaʼa gə tsa mghamha ya ta mghama taŋ ya, dzaʼa fafta Lazglafta ta luwa ta ga mgham ya dzaʼa kwal kul zaɗavata ɗekɗek. Haɗ tsa ga mgham ya dzaʼa walaŋta laghu nzakway mista sana mndəra mndu wa. Dzaʼa huʼanap huʼa ta inda tsa ga mghamha ya, ŋa zaɗanata ni ta həŋ. Ama tsatsi, dzaʼa gɗava gɗa ŋa kɗekedzeŋ. 45 Nda ngha ka ta tsa pala ta dgaghutá vgha ka ghəŋa ni ka dɗagata ta ghwá ka dzaɓanaptá tsi ta kfur, nda ghuva tili, nda rɓisl drap lu nda dra, nda kfura tsedi, nda dasu ya. Snanam sna Lazglafta dagala ta mgham ta skwi ya dzaʼa magaku ta kəma. Kahwathwata nzakwa tsa suna gha ya. Tsa klatá ghəŋa ni mnəgaghap yu ya guli ná, skwi ŋa kwala gha dga ghəŋ ta ghəŋa ni ya, » kaʼa.

Vlaŋta mgham ta glaku ta Danyel

46 Mantsa tama, ka zləmbatá Nevuhadnetsar zlumbruh ta haɗik ta kəma Danyel ŋa vlaŋtá sgit. « Hləganaghawa hla ta mbəhuha nimaya, nda ya ka urdi, » kaʼa. 47 Ka mgham nda Danyel guli mantsa: « Mantsa nzakwa ni, malaghu mala Lazglafta ghuni ta inda lazglaftaha. Tsatsi mgham Lazglafta ta ghəŋa mghamha. Ta marigiŋ mara ta skwiha nda ɗifa, kabga kligiŋtá kagha ta tsa suna ɗa nda ɗifa ya, » kaʼa. 48 Tahula tsa, ka ŋlanaftá mgham ta Danyel. Ka mbəhatá tsi nda skwiha dagala dagala, ta ɗinuta katakata. Ka fatá tsi ka guvna ta ghəŋa inda haɗika Babila. Faha ka mali ta ghəŋa inda gwal nda ɗifil ma ghəŋa taŋ ma Babila guli. 49 Ka ɗawaŋtá Danyel da mgham ta hlaftá i Sadrak nda Mesak, nda Ghaveɗnegu, ŋa valaŋtá slna nzaku ka mali ŋa nghapta ɗina ka haɗika Babila. Mantsa tama, ka hlaftá mgham ta həŋ ka pghata mantsa ya. Ta nzatá Danyel ka mnda vla hiɗaku ta wa tgha ga mgham.