Danyel 1

Danyel

I Danyel nda graha ni ma Babila

1 Ta mahkəna vakwa mgham Yəhuyakim ta pala ma Yahuda, ka lagha Nevuhadnetsar mghama Babila da ŋaftá Ursalima hesl ka liŋta guk nda vulu. 2 Ka vlatá Mgham Lazglafta ta Yəhuyakim mghama Yahuda ma dzva ni, nda sanlaha ma huzlaha həga Lazglafta. Ka hlaghatá Nevuhadnetsar ta tsa huzla ya da haɗika Babila da həga lazglafta ni. Ka pghamtá tsi ma dzuguva ɗifa skwa gadghəl ma həga lazglafta ni.

3 Tahula tsa, ka mgham Nevuhadnetsar nda Aspenaz mali mataba mapslaha^ª ta ksanatá slna mantsa: « Zabagagha zaba mataba mndəra la Israʼila ta galaɓayha ma mndəra la ta ga mgham, nda ya ma mndəra gwal kulaŋ lu kulaŋ lu. 4 Tsa galaɓayha ya ná, gwal kul haɗ maslivinza ta həŋ katsi. Nda mbaza ka həŋ ma kuma, nda nza ka həŋ ka gwal nda ɗifil ma ghəŋa taŋ, ka gwal nda mahizl ma ghəŋa taŋ, nda ya ka gwal nda sna ta tsislaptá skwi katsi guli, ŋa pərɗafta taŋ ta ksanatá slna ta mgham, ka taghanafta ka ta həŋ ta gwaɗa la Babila nda skwiha ma ɗelewerha taŋ tani, » kaʼa. 5 Ka mgham mnata guli mantsa: « Ka vla lu ŋa taŋ inda fitik ta skwa zay ya zɗa zɗa ta zə yu, nda ghuzu ya ta sə yu tani. Vaku hkən dzaʼa magata lu ta tagha skwi ŋa taŋ. Tahula tsa, ŋa zlrafta taŋ ta ksa slna mgham, » kaʼa.

6 Mataba tsa galaɓayha zabap lu ma mndəra la Yahuda ya na: Mamu i Danyel, nda Hananya, nda Misaʼel, nda Ghazarya. 7 Ka tsatsanaftá tsa mali mataba tsa mapslaha ya ta lfiɗa hgu ta həŋ. Beltəsaʼtsar kagha, kaʼa nda Danyel. Sadrak kagha, kaʼa nda Hananya. Mesak kagha, kaʼa nda Misaʼel. Ghaveɗnegu kagha, kaʼa nda Ghazarya.

8 Ka kurata Danyel ma ŋuɗufa ni, kaʼa mantsa: « Haɗ yu dzaʼa ŋəriŋtá vgha ɗa nda skwa zay zɗa zɗa ga mgham, nda ya nda ghuza ni ta sə tsi wa, » kaʼa. Kaʼa nda tsa mali mataba mapslaha ya tama mantsa: « Wya dzvu, ma mbəl ka ta aŋni ŋa ŋəriŋtá vgha ŋni nda tsa skwa zayha ya, » kaʼa. 9 Ka vlaŋtá Lazglafta ta zɗakwa ni nda zɗakatahuɗa ni ta Danyel da tsa mali ta ghəŋa mapslaha ya. 10 Ama kaʼa nda Danyel mantsa: « Ta zləŋay yu ta rvera ɗa, mghama ɗa. Vərɗa tsatsi ta mnatá skwiha ŋa zay ghuni, nda skwiha ŋa say ghuni. Kawayaka skwi, wuɗavata a kuma ghuni manda ŋa tsa sanlaha ma kamtaghuha ghuni ya wa. Ka tsatsaf tsatsa mgham mantsa katsi, kɗatá ghunu ta wa ɗa tsa, » kaʼa.

11 Tahula tsa, ka Danyel nda mndu fanagha mali mataba mapslaha ta ghəŋa tsatsi, nda Hananya, nda Misaʼel, nda Ghazarya ya mantsa: 12 « Kdəkkdək, dzəghaŋ dzəgha karaku ta kwalvaha gha ŋa fitik ghwaŋ. Vlaŋna vla ta ɗala sluhwa ŋa zay ŋni, nda ima say kweŋkweŋ. 13 Tahula tsa, ŋa nghanata gha ta nzakwa kuma ŋni, nda ŋa kamtaghəha ŋni ta za skwa zay mgham ya. Ma tsa fitik ya tama, dzaʼa maga ka ta skwi ya kumaŋ ka nda aŋni kwalvaha gha, manda nghanata gha, » kaʼa. 14 Ka snanatá tsi ta gwaɗa taŋ, ka dzəghaŋtá tsi ta həŋ ma fitik ghwaŋ. 15 Ma kɗavakta tsa maghwaŋa fitik ya, kəʼa ka lu ná, ta wuɗaku kuma hahəŋ, ka malaghutá ŋa inda tsa galaɓayha ta za skwa zay mgham ya. Malaghu mala uwaʼuwaslatá hahəŋ guli. 16 Mantsa tama, inda fitika vla skwa zay ŋa taŋ ya ná, klaghuta tsa mndu ta nghapta ka həŋ ya ta tsa skwa zay zɗa zɗa má dzaʼa hahəŋ zay ya, nda tsa ghuzu má dzaʼa hahəŋ say ya, ka vla ɗala sluhwa kweŋkweŋ ŋa taŋ.

17 Ka vlaŋtá Lazglafta ta tva snaŋta dganatá skwiha, nda mahizla dzaŋa inda vindi, nda ɗifil ta tsa galaɓayha fwaɗ ya. Ta ghəŋa tsa guli, nda sna Danyel ta paslaptá inda suniha kavghakavgha, nda skwiha ta maravata. 18 Magatá tsa fitik mna Nevuhadnetsar ŋa hladaghatá tsa galaɓayha zabap lu ya ta kəma ni, ka hladaghatá tsa mali mataba mapslaha ya ta inda taŋ ta kəma mgham. 19 Ka ghu mgham ta yiva nda həŋ demdem. Mataba inda taŋ, haɗ ya mutsaf mgham dər turtuk, taɓta i Danyel, nda Hananya, nda Misaʼel, nda Ghazarya wa. Mantsa tama, ka zlraftá tsa hahəŋ fwaɗ ya ta maga slna ga mgham. 20 Ka mamu sana skwi ta ɗawaŋta mgham, tsaw tsa skwi ya, ta zbay ta ɗifil nda mahizl katsi ná, malaghu mala zɗakwa ŋa taŋ zlghatá wi ghwaŋ səla ta ŋa gwal vza mandaŋ, dzugwa zlazləra, ya ta haɗika ga mghama ni. 21 Ka nzatá Danyel hada ka ksanatá slna ta Nevuhadnetsar, ha ka lagha ta fitika nzakwa Kurets ka mgham ma Babila.