Nəhemiya 13

Taliŋta la Yahuda ta la laɓa laɓa mataba taŋ

1 Ma tsa fitik ya, ka dzaŋaftá lu ta ɗelewera Musa ta wa sləməŋa mnduha, ka slanaghatá lu ta vinda ni kazlay na haɗ la Ghamuŋ nda la Muwav dzaʼa walaŋtá lami da taba guyatá ghəŋa mnduha Lazglafta wu kəʼa, 2 kabga lagha a həŋ da guya la Israʼila nda buradi nda ya nda imi wu, ka laghu həŋ skwatá Bilʼam nda tsedi ŋa ksiʼa həŋ, ama ka mbəɗanaftá Lazglafta mu ta tsa ksiʼi ya ka tfa wi. 3 Manda snaŋta tsa mnduha ya ta tsa zlahu ya, ka talaptá lu mataba la Israʼila ta inda la laɓa laɓa.

Payanata Nəhemiya ta slnaha ma həga Lazglafta

4 Ma kɗaku tsaya, ka fanamtá lu ma dzvu ta Ilyasiv mnda dra skwi ŋa Lazglafta, ta nghapta ka dzuguviha ta vata həga Lazglafta mu. Zbu tsatsi nda Tubiyya, 5 ka payaftá tsi ŋa ni ta sana dzuguvi dagala si ta pghə lu mida ta mbəha nimaya, nda urdi ŋa dray nda dra, nda huzlaha, nda zaka nimaya, nda ima inabi ta ka nuni, nda rɗi ya si ta fanata lu ta la Levi, nda gwal fa laha, nda gwal ta ngha wa tghaha, nda ya ta fanata lu ta gwal ta dra skwi ŋa Lazglafta guli. 6 Ma kɗaku tsa skwiha ya ka magaku, ta mahkən mbsak his mida vakwa Artahsasta mghama Babila ta pala, ka sliʼaftá yu ka vradaghatá yu da tsi. Wər ma kɗakwa tsa vaku ya, ka ɗawaftá yu da mgham ta tvi ŋa dzaʼa da Ursalima. Mantsa tama, haɗ yu ma Ursalima ta magaku inda tsa skwiha ya wu. 7 Ɓhadaghata ɗa da Ursalima, ka slanaghatá yu ta ghwaɗaka skwi maga Ilyasiv, nda klafta klaf tsi ta dzuguvi ma daɓa həga Lazglafta ka vlaŋtá tsa Tubiyya ya. 8 Ɗina a tsa skwi ya ɗekɗek ta nghə yu wa. Ka vazigiŋtá yu dzibil diʼiŋ nda tsa dzuguvi ya, ta inda huzla Tubiyya. 9 Hliŋwa hla ta skwi ta tsaɗ lu ta tsa dzuguviha ya, ka yu. Ka vradanamtá yu ta huzlaha həga Lazglafta nda mbəha nimaya, nda urdi ŋa dray nda dra.

10 Ka dukwaftá yu guli ná, vlaŋ a lu ta mayakha la Levi guli wu, hwahwayaghutá tsa la Levi nda tsa gwal fa laha si ta maga slnaha, inda taŋ da vwaha taŋ. 11 Ka gwaɗ yu ta gwaɗa nda la maliha, ka yu nda həŋ mantsa: « Nya kəl lu ka zlanavata həga Lazglafta na? » ka yu. Ka tskanatá yu ta tsa la Levi nda gwal fa laha ya, ka vranamtá yu ta həŋ da slnaha taŋ. 12 Ka hladaghatá inda la Yahuda ta inda zaka nimaya, nda ima inabi ta ka nuni, nda rɗi, da tsa dzuguva ɗifa skwi ya. 13 Ka pghatá yu ŋa ngha tsa dzuguva ɗifa skwi ya ta i Selemya mnda dra skwi ŋa Lazglafta, nda Tsaduk mnda tagha zlahu, nda Pədaya tekw mataba la Levi, fanavaha yu ŋa kataŋtá həŋ ta Hanaŋ zwaŋa Zakkur zwaŋa Mattanya. Tsa hahəŋ ya ná, vərɗa mnduha həŋ, hahəŋ dzaʼa dga skwiha ŋa pɗakwa mnduha taŋ.

14 Ari Lazglafta ɗa, havap hava ka iʼi ta ghəŋa tsa skwi ya. Ma zanap ka ta zɗaku maga yu ta nghanatá həga Lazglafta ɗa, nda ya ŋa maga slnaha mida.

Davay Nəhemiya ta mnduha dabga Sabat

15 Ma tsa fitik ya, ka nghaŋtá yu ta mnduha la Yahuda ta ɗitsa yakwa inabi ma tsuʼaŋ baɗ Sabat, ta habə sanlaha ta kuzuŋha nimaya, nda ima inabi nda yakwa ni tani, ka nda yakwa ghuraf, nda sanlaha ma skwiha, ka hlay ta kəɗih, ŋa hlay da Ursalima baɗ Sabat. Ka davə yu ta həŋ ma fitika dzaway taŋ ta skwiha taŋ. 16 Mamu la Tir guli ta nzaku ma Ursalima, ta hlaktá klipiha nda inda sanlaha ma huzlaha, ka dzawanaptá la Yahuda baɗ Sabat ma Ursalima. 17 Ka guguɗ yu ta gugɗaku nda gwal dagala dagala mataba la Yahuda, ka yu nda həŋ mantsa: « Nu klatá ghəŋa na ghwaɗaka skwi ta mag kuni na? Dəmanaf dəma Sabat. 18 Mantsa ya magata dzidzíha ghuni kəl Lazglafta mu ka ghunagaghatá inda tsa ɓədzakuha ya ta ghəŋa amu nda ya ta ghəŋa na luwa na. Ta kumay kaghuni ta sganaghata tɗaktá ɓasa ŋuɗufa Lazglafta ta ghəŋa la Israʼila ma dmanaftá Sabat guli rki? » ka yu.

19 Həlmakwa hawu ma kɗaku lu ka lami da Sabat, hahafwa wa tghaha Ursalima, ba tahula kɗatá Sabat kada gwanata kuni, ka yu. Ka pghata yu ta sanlaha ma kwalvaha ɗa ta wa tghaha, ŋa pya huzla ta lami baɗ Sabat. 20 Mantsa tama, ta hanaghuhana gwal ta dzawaptá skwiha kavghakavgha turtuk ka his a tsi mabli ta hula matsaka Ursalima. 21 Ka yu nda həŋ mantsa: « Kabgawu ta kəl kuni ka hanay ta vata matsak na? Ka kɗaŋ kɗa kuni katsi ná, ta kasafkasa yu ta kaghuni, » ka yu dvanaghatá həŋ. Daga ma tsa fitik ya, walglaŋ a həŋ ta səglagha baɗ Sabat wa. 22 Ka yu nda la Levi guli mantsa: « Hliŋwa hla ta skwi ta tsaɗ lu ma nzakwa ghuni, ka sagha kuni da ngha wa tghaha ŋa nzakwa Sabat nda fa ŋa Lazglafta, » ka yu.

Ari Lazglafta ɗa, havap hava ka iʼi ta ghəŋa nana na guli. Tawa ta hiɗahiɗa ta iʼi ma glakwa zɗakwa gha.

Pyafta Nəhemiya ta kla kwagha mndəra sana mnduha

23 Ma tsa fitik ya guli, ka nghaŋtá yu ta la Yahuda ta hlafta ka miʼi ta kwagha la Asdut, nda la Ghamuŋ, nda la Muwav. 24 Rita tsa zwana taŋ ya ta gwaɗa la Asdut, nda gwaɗa sanlaha ma mnduha, ama haɗ ya nda sna ta gwaɗa la Yahuda ma həŋ wa. 25 Ka davə yu ta həŋ, ka ksiʼa həŋ. Ka dzə yu ta sanlaha mataba taŋ, ka kwitsa swidi ma ghəŋa taŋ. Ka mblaftá yu ta həŋ ŋa waɗata nda hga Lazglafta kazlay na, yaha həŋ da vla kwagha taŋ ŋa mndəra sana mndu, yaha hahəŋ guli da hla kwagha mndəra sana mndu ŋa miʼa taŋ dər ŋa zwana taŋ. 26 Ka yu nda həŋ mantsa: « Ma magay mantsa a kəl Salumuŋ mghama la Israʼila ka gatá dmaku wu ra? Mataba ndəghatá mndəra sana mnduha ná, haɗ mgham taɓta tsatsi wu, ɗvu ɗva Lazglafta, ka fata Lazglafta ka mgham ta ghəŋa inda la Israʼila, ama kulam nda tsa, ka klamtá miʼa mndəra sana mnduha da dmaku guli! 27 Kaghuni guli ná, nda ra ka magay ghuni ta mndərga tsa dmaku ya, ka ɓlanaptá zlaha Lazglafta mu nda ma hla miʼa mndəra sana mnduha ra? » ka yu.

28 Mamu sani ma zwana Yuyada zwaŋa Ilyasiv, mali ta ghəŋa gwal ta dra skwi ŋa Lazglafta ta klaftá makwa Samballat la Huruŋ, ka ghəzliŋtá yu. 29 Ari Lazglafta ɗa! Ma zanap ka ta dmanaf dma taŋ ta slna gwal ta dra skwi ŋa Lazglafta, nda dzratá wa gwal ta dra skwi ŋa Lazglafta, nda ya nda la Levi, maga həŋ ya. 30 Ka hliŋtá yu ta skwi ta tsaɗ lu ta mndəra sana mnduha. Ka mnaftá yu kinawu ka gwal ta dra skwi ŋa Lazglafta nda la Levi dzaʼa maga slna taŋ, inda taŋ ma slna taŋ, 31 nda ya ká lu dzaʼa vla hasuʼu ta fitika ni ya fa lu, mantsa ya taŋtaŋa yakwa fuha guli.

Ari Lazglafta ɗa, havap hava ka iʼi, zɗəɗiŋ zɗa ta huɗi.