1 Samuyel 16

Zbapta Lazglafta ta Dawuda ka mgham

1 Ka Yawe nda Samuyel mantsa: « Dzaʼa gɗata ta tawa Sawulu ka ra? Wuɗiŋ wuɗa vərɗa iʼi, nzəgla a ka mghama la Israʼila wa. Ndəgham ndəgha ta rɗi ma dula gha, ka dzaʼa ka. Ta ghuna kagha yu da Yisay, mnda la Betlehem, kabga nda ngha yu mataba zwana ni ta mgham ta kum yu, » kaʼa. 2 Ka Samuyel mantsa: « Waká yu da dzaʼa? Ka snaŋ sna Sawulu katsi, dzaʼa dziha dza, » kaʼa. Ka Yawe mantsa: « Ka klanaʼata ka ta rva sla. Ka ka dzaʼazlay na: “Sagha da pla ghəŋ yu ŋa Yawe,” ka ka dazlay. 3 Ka hgadaghata ka ta Yisay da tsa vla za skwa zaya pla ghəŋ ya. Dzaʼa snagham sna yu ta skwi dzaʼa ka da magay. Ka pghanaghatá rɗi ka ŋa ɗa ta mndu dzaʼa ɗikwaghafta yu, » kaʼa.

4 Ka magatá Samuyel ta skwi mnana Yawe, ka ɓhadaghatá tsi da Betlehem. Ka sliʼadaghatá la galata mndu ma luwa nda ghudzaku da guyay. Ka həŋ mantsa: « Fitika sagha gha suʼu? » ka həŋ. 5 Kaʼa mantsa: « Aŋi! Ma zɗaku sagha yu! Sagha da pla ghəŋ yu ŋa Yawe. Ghwaɓiŋwa nzakwa ghuni, ka sagha kuni mista ɗa da vla za skwa zaya pla ghəŋ, » kaʼa. Ka ghwaɓiŋtá Samuyel ta i Yisay nda zwana ni. Ka hagadaghatá tsi guli ta həŋ da vla za skwa zaya tsa pla ghəŋ ya.

6 Ɓhadaghata taŋ, ka nghaŋtá Samuyel ta Iliʼav, kaʼa mantsa: « Kahwathwata, tsa mndu zbaf Yawe nda ma pghanaghatá rɗi ya na, ta sladu ta kəma ni na, » kaʼa. 7 Ama ka Yawe nda Samuyel mantsa: « Ma nghə ka ta tsata ni, dər slrakwa ni, kabga wuɗiŋ wuɗa yu. Manda ŋa mndu a ta ngha Yawe ta vli wa. Skwi ya ta wa iri ŋa mnduha ta nghay, ama Yawe ná, ŋuɗuf ŋa ni ta nghay, » kaʼa.

8 Ka hgaftá Yisay ta Avinadav, ka kladaghata ta kəma Samuyel, ama ka Samuyel mantsa: « Zbaf a Yawe ta nana guli wu, » kaʼa. 9 Ka kladaghatá Yisay ta Sama, ama ka Samuyel mantsa: « Zbap a Yawe ta nana guli wu, » kaʼa. 10 Ka hladaptá Yisay ta zwana ni ndəfáŋ ndəfáŋ ta kəma Samuyel, ka Samuyel nda Yisay mantsa: « Haɗ ya zbap Yawe dər turtuk ma həŋ wu, » kaʼa. 11 Ka Samuyel nda Yisay guli mantsa: « Hadna zwana gha demdem ra? » kaʼa. Ka Yisay mantsa: « Ta mamu sagəŋ gudzekw, ta ngha rini, » kaʼa. Ka Samuyel nda Yisay mantsa: « Ghuna ta mndu da hgagaghata, haɗ mu dzaʼa nzata ka za skwa zay ka ta sagha a tsatsi wu, » kaʼa.

12 Ka ghunaghatá Yisay ta mndu da hgagaghata. Ka dva, tsəreslesl ira ni, nda mbaza ma kuma. Ka Yawe nda Samuyel mantsa: « Sliʼaf sliʼa, pghanagha pgha ta rɗi, tsatsi tsa mndu ya, » kaʼa. 13 Ka klaftá Samuyel ta dula rɗi, ka pghəganatá Dawuda ma ghəŋ ta wa ira zwana ma ni, ka saha Sulkuma Yawe suw ta ghəŋa ni daga baɗ tsaya. Tahula tsa, ka sliʼaftá Samuyel ka vraghuta da Rama.

Maganata Dawuda ta slna ta Sawulu

14 Ka saghu Sulkuma Yawe ma Sawulu, ka saha ghwaɗaka sulkum ghunaf Yawe da ghuya ghəŋa ni. 15 Ka kwalvaha Sawulu nda tsi mantsa: « Wana ghwaɗaka sulkum ghunaga Lazglafta na skwi ta ghuya ghəŋa gha na. 16 Rvera ɗa, ta mblam ka hafa gha! Ka ta kumay ka, ta dzaʼa kwalvaha gha da zbaghaktá mndu ya nda sna ta dza kəzliŋkəzliŋ. Ma saha tsa ghwaɗaka sulkum ta ghunagata Lazglafta ya, ŋa dzay ni ta kəzliŋkəzliŋ ŋa lɓaghatá ghəŋ, » ka həŋ. 17 Ka Sawulu nda kwalvaha ni mantsa: « Zbaɗikwa zba ta midala nda sna ta dza kəzliŋkəzliŋ, ka klagiɗaghata kuni, » kaʼa. 18 Ka sani mataba duhwalha ni zlghanafta wi mantsa: « Nda ngha yu ta sana zwaŋa Yisay, mnda la Betlehem. Midala ya nda sna ta dza kəzliŋkəzliŋ, warakrak nzakwa ni, mnda vulu ya, nda ɗifil kəʼa ta gwaɗa, nda mbaza ma kuma. Kawadaga Yawe nda tsi, » kaʼa.

19 Ka ghunaftá Sawulu ta gwal ghunay da Yisay. Kaʼa nda tsi mantsa: « Ghunaɗik ghuna ta zwaŋa gha Dawuda, tsa ta ngha rini ya, » kaʼa. 20 Ka klaftá Yisay ta kəɗih, ka hbanaftá buradi, nda zliba huta ima inabi, nda slaɓalakwa gu, ka ghunaftá tsi ta zwaŋa ni Dawuda ŋa klaŋtá Sawulu. 21 Ka ɓhadaghatá Dawuda da Sawulu, ka mag tsi ta slna ŋa ni. Ka zɗəganatá tsi katakata ta Sawulu, ka nzakw tsi ka mnda klanatá huzla vula ni. 22 Ka ghunaftá Sawulu ta mndu da mnanatá Yisay, kaʼa mantsa: « Ta kumay yu ta nzakwa Dawuda ŋa magihatá slna, kabga zɗəgiha zɗa, » kaʼa. 23 Na saha tsa ghwaɗaka sulkum ghunaga Lazglafta ya ta ghəŋa Sawulu ya ná, klafta Dawuda ta kəzliŋkəzliŋ ka dzanata. Mantsa tama, ŋa lɓata ghəŋa Sawulu, ŋa lavaghwa ni, ŋa laghwa tsa ghwaɗaka sulkum ya ta ghəŋa ni.