Tva skwi ŋa magay ta nghanatá nazir
6
1 Ka Yawe nda Musa mantsa: 2 « Ka ka nda la Israʼila na: Ka lagha zgun ka marakw a tsi ka waɗata ŋa nzata ka nazir ŋa fatá ghəŋa ni ŋa Yawe, 3 yaha tsi ta sa ima inabi, dər skwi ta ghuya mndu. Yaha da sa skwi masmasa maga lu nda ima inabi, dər skwa say masmasa magaf lu nda skwi ta ghuya mndu. Yaha da sa dər wati ma ima yakwa inabi. Yaha da za yakwa inabi, dər mkweneka ni dər ghwalata ni wa. 4 Ma inda tsa fitika fata ni ta ghəŋa ni ka nazir ya, yaha da za inda skwi magaf lu nda inabi, daga ta hya ni ha ta ŋulaŋa yakwa ni wa.5 Ma inda tsa fitik waɗa tsi ta fata ghəŋa ni ka nazir ya, haɗ lu dzaʼa faftá paka ta ghəŋa ni wu, ha ka kɗatá tsa fitik fa tsi ta ghəŋa ni ŋa Yawe ya wa. Dzaʼa nza nza nda ghuɓa, ka zlanata tsi mantsa ta swida ni ka glakwa tsi. 6 Ma inda tsa fitik fa tsi ta ghəŋa ni ka ŋa Yawe ya, haɗ dzaʼa gavadaghata ta vata mbli wa, 7 dər ta vata mbla da ni, dər ŋa ma ni, dər ŋa zwaŋama ni, ka ŋa makuma ni a tsi. Haɗ dzaʼa niŋtá ghəŋa ni ka mndu ta tsaɗ lu ka nda mta həŋ wu, kabga ta klay ta ghəŋa ni ta ŋizla waɗa fatá ghəŋ ka ŋa Lazglafta ni. 8 Ma inda tsa fitika fatá ghəŋa ni ya, dzaʼa nzakway nda ghuɓa ka ŋa Yawe.
9 Ka lagha mndu ka mtuta gi ɓaw ta vata ni, ka niŋta ka mndu ta tsaɗ lu ta ghəŋa nazir, dzaʼa htsiŋ htsa ta ghəŋa ni baɗ ghuɓiŋta, ŋa htsiŋta ni baɗ mandəfáŋ. 10 Baɗ matghas, kladaghata ni ta kukuha his, ka ghərbuʼha his a tsi da mnda dra skwi ŋa Lazglafta ta wa tgha lami da tumpula guyaku. 11 Dzaʼa vla vla mnda dra skwi ŋa Lazglafta ta ya turtuk ka skwa pla ghəŋ ŋa ɗawa pla dmaku, sani ya ŋa pla ghəŋ ŋa dray tsuh tsuh. Manda tsaya dzaʼa slərɓanata tsi ta zughu ta tsa nazir ya, dabga dmaku ya maga tsi nda ma ksaŋtá mbli ya. Baɗ tsaya dzaʼa fəglata tsi nda ghuɓa ta ghəŋa ni. 12 Dzaʼa fəgla fa ta ghəŋa ni ka ŋa Yawe ka nazir, ŋa kləglaftá fitikha ŋa fatá ghəŋa ni, ŋa kladaghata ni ta slaɓalakwa tuwak turtuk vakwa ni, ŋa pla ghəŋ ŋa paya tvi. Haɗ lu dzaʼa mbəɗa tsa fitikha nda hul ya wu, kabga nuna tsa fitik si fa tsi ta ghəŋa ni ya ka fitik ta tsaɗ lu.
13 Wya tva skwi ŋa magay ta nghanatá mndu ta fatá ghəŋa ni ka nazir ya. Baɗ tsa fitik dzaʼa kɗiŋta tsi ta tsa nazira ni ya, dzaʼa kladagha kla lu ta wa tgha tumpula guyaku. 14 Dzaʼa vla vla ta skwa pla ghəŋ ŋa Yawe, tsaya slaɓalakwa tuwak turtuk vakwa ni kul haɗ maslivinza tida ŋa dray tsuh tsuh, nda daɓala tuwak turtuk vakwa ni kul haɗ maslivinza tida ŋa ɗawa pla dmaku, nda maŋazak kul haɗ maslivinza tida ŋa pla ghəŋa zɗaku, 15 nda tughba buradi kul haɗ is mida magaf lu nda hpu kəzlitit hwaɗam lu nda rɗi, nda biskwit kul haɗ is mida masaf lu ta rɗi tida, nda mbəha nimaya taŋ, nda skwi ŋa slranata. 16 Dzaʼa kladagha kla mnda dra skwi ŋa Lazglafta ta tsa mbəhuha ya ta kəma Yawe, ŋa vlata ni ta pla ghəŋ ŋa ɗawa pla dmaku, nda ya ŋa pla ghəŋ ŋa dray tsuh tsuh. 17 Tsa maŋazak ya, dzaʼa vla vla ŋa Yawe ŋa pla ghəŋa zɗaku, nda tughba buradi kul haɗ is mida, ŋa vlata ni ta mbəha nimaya nda skwi ŋa slranata.
18 Tsa nazir ya, ŋa htsiŋta ni ta tsa ghəŋa ni fa tsi ya, ta wa tgha lami da tumpula guyaku. Dzaʼa hlaf hla ta tsa swida ghəŋa ni fa tsi ya ka wuɗamta da vu ta zlghaku mista pla ghəŋa zɗaku. 19 Dzaʼa klaf kla mnda dra skwi ŋa Lazglafta ta pipa tsa maŋazak ya ka nda da tsi, nda buradi kul haɗ is mida turtuk ma tughba, nda biskwit kul haɗ is mida turtuk, ka pghamta ma huɗa dzva tsa nazir ya, ta hula htsiŋta ni ta tsa ghəŋa ni fa tsi ya. 20 Dzaʼa zukwanaŋ zukwa mnda dra skwi ŋa Lazglafta ta tsa mbəha ya ta Yawe, nda nza tsaya ka skwi nda ghuɓa ŋa mnda dra skwi ŋa Lazglafta, kawadaga nda ghuva zukwaŋ tsi, nda rkuf klap tsi ya guli. Tahula tsa, dzaʼa laviŋ lava tsa nazir ya ta səgəltá ima inabi. 21 Tsaha ya tva skwi ŋa magay ta nghanatá mndu ta waɗata fatá ghəŋa ni ka nazir ŋa Yawe. Tsaha ya mbəhuha dzaʼa vlaŋta tsi ta Yawe taɓta skwi ya waɗa tsi, kul mbəɗu lu ta ya dzaʼa fanaghata tsi taɓta ya klaf mbrakwa ni wa. Ka hɗamta tsi ta skwi ya waɗa tsi mnaŋ tsi, manda ya ksaf tva skwi ŋa magay ta nghanatá nazir, » kaʼa.
Tfa wi ŋa la Israʼila
22 Ka Yawe nda Musa mantsa: 23 « Mnana mna ta i Haruna nda zwana ni, ka ka nda həŋ na: Wya ká kuni dzaʼa tfanaghatá wi ta la Israʼila, ka kuni dzaʼazlay nda həŋ na: 24 “Ka tfaghagha tfa Yawe ta wi, ka ngha tsi ta kagha! 25 Ka ngha Yawe ta kagha nda zɗaku, ka vlaghata tsi ta zɗakatahuɗa ni! 26 Ka ngha Yawe ta kagha nda ira hiɗahiɗa, ka vlaghata tsi ta zɗaku!” ka kuni dzaʼazlay. 27 Mantsa ya dzaʼa hga həŋ ta hga ɗa ŋa tfa wi ŋa la Israʼila, iʼi dzaʼa tfanaghatá wi ta həŋ, » kaʼa.