La Levi 13

Tva skwi ŋa magay nda lku ta sabi ta vgha

1 Ka Yawe nda i Musa nda Haruna mantsa: 2 « Ka mamu skwi ta vzafta ta mndu, ka dər lalam a tsi, ka dər dərna a tsi, ka nutá tsi ka ghwaɗaka lku ta mndu, tsa mndu ya ná, dzaʼa kladagha kla lu da Haruna mnda dra skwi ŋa Lazglafta, ka da sani ma zivira ni a tsi. 3 Dzaʼa vitsanava vitsa mnda dra skwi ŋa Lazglafta ta tsa vli nda lku ya. Ka nu ka ŋusliŋ swidi mida, ka hruŋ sluʼuvgha ni, ghwaɗaka lku tsaya. Tahula vitsanavata mnda dra skwi ŋa Lazglafta, dzaʼa mnay kazlay nda nza tsa mndu ya ka mndu ta tsaɗ lu kəʼa. 4 Ka mamu dərna ta vgha, ta wuɗaku ka ŋusliŋ, ama hruŋ a sluʼuvgha ni wu, nu a swidi ka ŋusliŋ mida wu, ka mantsa tsi, dzaʼa dgana dga mnda dra skwi ŋa Lazglafta ta tsa mndu ya nda mnduha ka fitik ndəfáŋ. 5 Dzaʼa vitsglanava vitsa mnda dra skwi ŋa Lazglafta baɗ mandəfáŋa fitik. Ka slada slada tsa lku ya, sgavagha a ta sluʼuvgha ni wu, dgəglanata mnda dra skwi ŋa Lazglafta nda mnduha ka fitik ndəfáŋ. 6 Baɗ mandəfáŋa fitik, dzaʼa vitsglanava vitsa mnda dra skwi ŋa Lazglafta. Ka nuna tsi kuɓah, sgavagha a ta sluʼuvgha ni wu, dzaʼa mnaŋ mna mnda dra skwi ŋa Lazglafta kazlay haɗ skwa tsaɗa tida wu, hamata lku ya kəʼa. Dzaʼa ghwaɓiŋ ghwaɓa tsa mndu ya ta lgutha ni, dzaʼa nzakway kul haɗ skwa tsaɗa tida. 7 Ka ta sgaku nda sga tsa hamata lku ya ta sluʼuvgha ni, tahula maravata ni da mnda dra skwi ŋa Lazglafta, ka mnaŋtá tsi kazlay nda ghuɓa kəʼa katsi, dzaʼa marglava mara ka mahis da mnda dra skwi ŋa Lazglafta. 8 Dzaʼa vitsglanava vitsa mnda dra skwi ŋa Lazglafta. Ka ta sgavagha sga tsa hamata lku ya ta sluʼuvgha ni, dzaʼa mnaŋ mna mnda dra skwi ŋa Lazglafta kazlay nda nza ka mndu ta tsaɗ lu kəʼa, ghwaɗaka lku tsaya.

9 Ka mamu ghwaɗaka lku ta mndu katsi, dzaʼa kladagha kla lu da mnda dra skwi ŋa Lazglafta. 10 Dzaʼa vitsanava vitsa mnda dra skwi ŋa Lazglafta. Ka mamu skwi ta vzafta ka ŋusliŋ, ka ŋusliŋ swidi mida, ka vruz a tsi guli katsi, 11 ghwaɗaka lku dzaʼa kwal kul mbavata ta vgha tsa mndu ya tsaya. Dzaʼa mnaŋ mna mnda dra skwi ŋa Lazglafta kazlay nda nza ka skwi ta tsaɗ lu kəʼa. Haɗ lu dzaʼa dganata nda mnduha wu, kabga nda ghada nata ni ka mndu ta tsaɗ lu. 12 Ka ranaf ra tsa ghwaɗaka lku ya ta vgha ni, daga ta ghəŋ dikw ta səla ta nghadaptá mnda dra skwi ŋa Lazglafta katsi, 13 vitsanavata mnda dra skwi ŋa Lazglafta. Ka ranaf ra tsa ghwaɗaka lku ya ta vgha ni demdem, dzaʼa mnaŋ mna kazlay na nda nza ka mndu kul haɗ skwa tsaɗa tida kəʼa, kabga ɓuɓa vgha ni demdem, nda nza kul haɗ skwa tsaɗa tida nda tsa. 14 Ama baɗ dzaʼa zlagapta tsa lku ya vruz tida, dzaʼa nzakway ka mndu nda skwa tsaɗa tida. 15 Ka vitsanata mnda dra skwi ŋa Lazglafta vruz tsi katsi, mnaŋta ni kazlay nda nza ka mndu nda skwa tsaɗa tida kəʼa. Nda nza tsa nzakwa ni vruz ya ka skwi tsaɗ lu, ghwaɗaka lku tsaya. 16 Ka nda mba tsa vruzata lkwa ni ya, ka nuta ka ŋusliŋ, vra ni slanaghatá mnda dra skwi ŋa Lazglafta. 17 Dzaʼa vitsanava vitsa mnda dra skwi ŋa Lazglafta, ka nuna tsa lku ya ka ŋusliŋ katsi, dzaʼa mnanaŋ mna mnda dra skwi ŋa Lazglafta kazlay nda nza tsa mndu nda tsa ɗaŋwa ya ka mndu kul haɗ skwa tsaɗa tida kəʼa, haɗ skwa tsaɗa tida nda tsa wa.

18 Ka lagha mbuʼa ka vzafta ta vgha mndu, ka mbaftá tsi, 19 ka lagha skwi ka vzafta ka ŋusliŋ, ka dərna ka ŋusliŋ dvaŋdvaŋa a tsi ma tsa vli si nda mbuʼa ya, dzaʼa ni maranaŋtá ghəŋa ni ta mnda dra skwi ŋa Lazglafta. 20 Dzaʼa vitsanava vitsa mnda dra skwi ŋa Lazglafta: Ka hruŋ tsa lku ta vgha ni ya, ka nutá swidi mida ka ŋusliŋ katsi, dzaʼa mnaŋ mna mnda dra skwi ŋa Lazglafta kazlay nda nza ka mndu nda skwa tsaɗa tida kəʼa, ghwaɗaka lku tsaya ta sabi ma mbuʼa. 21 Ka vitsanavata mnda dra skwi ŋa Lazglafta, haɗ swidi ka ŋusliŋ ma tsa vla mbuʼa ya wu, nza a hruŋ ta vgha guli wu, ka kuɓah tsi katsi, dzaʼa dgana dga mnda dra skwi ŋa Lazglafta nda mnduha ka fitik ndəfáŋ. 22 Tahula fitik ndəfáŋ, ka sgavagha sga tsa lku ya ta vgha, dzaʼa mnanaŋ mna mnda dra skwi ŋa Lazglafta kazlay nda nza tsa mndu ya ka mndu nda skwa tsaɗa tida kəʼa, nda nza tsaya ka ghwaɗaka lku. 23 Ama ka slada slada tsa dərna ya, sgavagha wu, miviɗa mbuʼa tsa. Dzaʼa mnaŋ mna mnda dra skwi ŋa Lazglafta kazlay haɗ skwa tsaɗa tida wu kəʼa.

24 Ka mamu lkwa vu ta vgha mndu, ka nutá tsa lkwa vu ya ka dərna ka ŋusliŋ, ka ka ŋusliŋ dvaŋdvaŋa a tsi, 25 dzaʼa vitsanava vitsa mnda dra skwi ŋa Lazglafta. Ka nuna swidi ma tsa dərna ya ka ŋusliŋ, ka hruŋ nzakwa ni ta vgha, ghwaɗaka lku tsa ta zlagapta ma vla lkwa vu. Dzaʼa mnanaŋ mna mnda dra skwi ŋa Lazglafta kazlay nda nza ka ka mndu ta tsaɗ lu kəʼa, nda nza tsaya ka ghwaɗaka lku. 26 Ka nghanavata mnda dra skwi ŋa Lazglafta, haɗ swidi ka ŋusliŋ ma tsa dərna ya wu, hruŋ a ta vgha wu, kuɓah nzakwa ni, dzaʼa dgana dga mnda dra skwi ŋa Lazglafta nda mnduha ka fitik ndəfáŋ. 27 Dzaʼa vitsanava vitsa mnda dra skwi ŋa Lazglafta baɗ mandəfáŋa fitik. Ka sgavagha sga tsa dərna ya ta vgha ni, dzaʼa mnanaŋ mna mnda dra skwi ŋa Lazglafta kazlay nda nza tsa mndu ya ka mndu ta tsaɗ lu kəʼa. Nda nza tsaya ka ghwaɗaka lku. 28 Ama ka slada slada tsa dərna ya, sgavagha a ta vgha ni wu, ka nutá tsi kuɓah, lkwa vu ta vzaftá tsa, dzaʼa mnanaŋ mna mnda dra skwi ŋa Lazglafta kazlay nza ka skwi kul tsaɗ lu, miviɗa lkwa vu ya kəʼa.

29 Ka lagha lku ka sabi ta ghəŋ, ka ta ghumaya zgun, ka dər marakw a tsi, 30 dzaʼa vitsanava vitsa mnda dra skwi ŋa Lazglafta ta tsa lku ya. Ka hruŋ tsi ta vgha ni, ka ghuvazwaŋ zwaŋ, kulitit swidi mida guli katsi, dzaʼa mnanaŋ mna mnda dra skwi ŋa Lazglafta kazlay nda nza ka ka mndu ta tsaɗ lu kəʼa. Zahar tsaya, ghwaɗaka lku ta ksa mndu ta ghəŋ, ka ta ghumay a tsi. 31 Ama ka nghanavata mnda dra skwi ŋa Lazglafta ta tsa zahar ya, hruŋ a ta vgha wu, haɗ swida ŋəra mida wu katsi, dzaʼa dgana dga mnda dra skwi ŋa Lazglafta nda mnduha ta tsa mndu nda zahar ya ka fitik ndəfáŋ. 32 Dzaʼa vitsglanava vitsa mnda dra skwi ŋa Lazglafta baɗ mandəfáŋa fitik. Ka sgavagha a tsa zahar ya wu, ka haɗ swidi ka ghuvazwaŋ zwaŋ mida wu, nza a hruŋ ta vgha wu, 33 dzaʼa htsiŋ htsa, ama htsəta a ta tsa vla zahar ya wa. Dzaʼa dgəglana dga mnda dra skwi ŋa Lazglafta nda mnduha ka fitik ndəfáŋ guli. 34 Dzaʼa nghanava ngha mnda dra skwi ŋa Lazglafta ta tsa zahar ya baɗ mandəfáŋa fitik. Ka sgavagha a tsi ta vgha wu, ka hruŋ a tsi wu, dzaʼa mnanaŋ mna mnda dra skwi ŋa Lazglafta kazlay nda nza tsa mndu ya ka mndu kul haɗ tsaɗa tida kəʼa. Dzaʼa ghwaɓiŋ ghwaɓa ta lgutha ni, ŋa nzakwa ni kul haɗ tsaɗa tida. 35 Ama tahula mnaŋta mnda dra skwi ŋa Lazglafta kazlay nda ghuɓa ka kəʼa, ka sgavaghata tsa zahar ya ta vgha ni, 36 dzaʼa vitsanava vitsa mnda dra skwi ŋa Lazglafta. Ka sgavagha sga tsa zahar ya ta sluʼuvgha, zbəgla a kazlay mamu swidi ka ghuvazwaŋ zwaŋ mida ra kəʼa wu, nda nza tsa mndu ya ka mndu ta tsaɗ lu nda tsa. 37 Ka slada slada tsa zahar ya, ka ɗyagaptá swida ŋəra mida, nda mba tsa zahar ya, haɗ skwa tsaɗa ta tsa mndu ya wa. Dzaʼa mnanaŋ mna mnda dra skwi ŋa Lazglafta kazlay haɗ skwa tsaɗa tida wu kəʼa.

38 Ka sliʼagap sliʼa dərnaha ka ŋusliŋ ka ŋusliŋ ta vgha zgun, ka dər marakw a tsi, 39 dzaʼa vitsanava vitsa mnda dra skwi ŋa Lazglafta. Ka nza a tsa dərnaha ya kuɓahkuɓaha wu, skwiha ta vazafta ta vgha tsaya, bla a tsaya wa. Haɗ skwa tsaɗa ta tsa mndu ya wa.

40 Ka stu nda sta swidi ma ghəŋa mndu, vərndah tsaya, nza a tsa mndu ya ka mndu nda skwa tsaɗa tida wa. 41 Ka stu nda sta swida ni nda ta wa kuma, vərndaha kuma tsaya. Nza a tsa mndu ya ka mndu nda skwa tsaɗa tida wa. 42 Ama ka ma vərndah nda təv hul, ka təv kuma a tsi, mamu lku ka ŋusliŋ dvaŋdvaŋa mida katsi, ghwaɗaka lku tsa ta sabi ma tsa vərndah ya. 43 Dzaʼa vitsanava vitsa mnda dra skwi ŋa Lazglafta. Ka skwi ta vzafta ka ŋusliŋ dvaŋdvaŋa ta vərndah nda təv hul, ka nda təv kuma a tsi, manda ɗaslakwa ghwaɗaka lku ya nzakwa ni ta vgha, 44 ghwaɗaka lku tsa ta tsa mndu ya, nda nza ka skwi ta tsaɗ lu nda tsa. Dzaʼa mnanaŋ mna mnda dra skwi ŋa Lazglafta kazlay skwi ta tsaɗ lu ya kəʼa, dabga ghwaɗaka lku ta zlagapta ta ghəŋ ni.

45 Inda mndu ksaf ghwaɗaka lku ná, kwahatá lgut dzaʼa tsi klay ta vgha, kwitsar kəʼa dzaʼa zlanatá swida ni. Dzaʼa bukwam bukwa ta wubisima ni, ka wahu: “Mndu ta tsaɗ lu yu! Mndu ta tsaɗ lu yu!” kaʼa dzaʼazlay. 46 Ma inda tsa fitika nzakwa ni ma tsa ɗaŋwa ni ya ná, nda nza ka mndu ta tsaɗ lu. Ma tsa nzakwa ni ka mndu ta tsaɗ lu ya, turtukwa ni dzaʼa nzata tsi ta hula ghuɓu. »

Tva skwi ŋa magay nda huzla ksaf mavyavya

47 « Ka ksaf ksa mavyavya ta lgut, lguta swida tuwak, ka lguta liŋ a tsi, 48 dər lgut gaf lu nda swida tuwak, ka lgut gaf lu nda liŋ a tsi, ka dər ka huta tsi, ka dər huzla magaf lu nda huta a tsi, 49 ka nzatá tsa vli ya ka kuzuŋkuzuŋ, ka ka dvaŋdvaŋa a tsi ta lgut, ka dər ta huta a tsi, ka ta skwi gaf lu nda swida tuwak a tsi, ka ta skwi gaf lu nda liŋ a tsi, ka dər ta huzla magaf lu nda huta a tsi, nda nza tsaya ka ghwaɗaka mavyavya. Dzaʼa maranaŋ mara lu ta mnda dra skwi ŋa Lazglafta. 50 Dzaʼa vitsanava vitsa mnda dra skwi ŋa Lazglafta ta tsa vla mavyavya ya, dzaʼa dgana dga ta tsa skwi nda mavyavya tida ya ka fitik ndəfáŋ. 51 Baɗ mandəfáŋa fitik, dzaʼa vitsglana vitsa ta tsa vla mavyavya ya. Ka sgavagha sga tsa vli ya ta lgut, ka ta skwi gaf lu nda swida tuwak a tsi, ka ta skwi gaf lu nda liŋ a tsi, ka dər ta huta a tsi, ka dər ta huzla magaf lu nda huta a tsi, nda nza tsaya ka ghwaɗaka mavyavya kul laviŋtá lu ta hərɗiŋta, nda nza tsa skwi ya ka skwi ta tsaɗ lu. 52 Dzaʼa driŋ dra mnda dra skwi ŋa Lazglafta ta tsa skwi nda mavyavya tida ya: Tsa lgut, ka tsa skwiha gaf lu nda swida tuwak, ka ya gaf lu nda liŋ ya a tsi, ka inda skwi ka huta mamu mavyavya tida ya a tsi. Ya hərɗava a tsa ghwaɗaka mavyavya ya ná, driŋtá tsa skwi ya nda vu.

53 Ama ka nghanata mnda dra skwi ŋa Lazglafta sgavagha a tsa vla mavyavya ya ta lgut, ka ta skwi gaf lu nda swida tuwak a tsi, ka ta skwi gaf lu nda liŋ a tsi, ka ta skwiha ka huta a tsi ya, 54 dzaʼa mnaf mna mnda dra skwi ŋa Lazglafta kazlay ghuɓiŋta kəʼa, ŋa dgəglanata guli ka fitik ndəfáŋ. 55 Tahula ghuɓiŋta, dzaʼa nghana ngha mnda dra skwi ŋa Lazglafta. Ka mbəɗavaf a tsa vla mavyavya ya wu, dər má sgavagha a tsi wu, nda nza ka skwi ta tsaɗ lu nda tsaya. Dzaʼa driŋ dra lu nda vu. Tsaya ná, skwi zu mavyavya nda ta hul, ka nda ma huɗi a tsi.

56 Ama ka nghanavata mnda dra skwi ŋa Lazglafta nuna tsa vla mavyavya ya kuɓah katsi tahula ghuɓiŋta, dzaʼa tsap tsa lu ta kuraghuta tsa vla ni ta lgut, ka dər ta huta tsi, ka dər ta skwi gaf lu nda swida tuwak, ka ya nda liŋ a tsi. 57 Ka ta zlagəglap zlaga tsi dazlay ta tsa lgut ya, ka ta skwi gaf lu nda swida tuwak a tsi, ka ya gaf lu nda liŋ a tsi, ka ta inda skwi ka huta a tsi, mavyavya tsaya ta ta vgha. Dzaʼa driŋ dra lu ta tsa skwi ya nda vu. 58 Ka sa sa tsa mavyavya ya ta tsa lgut ya, ka ta tsa skwi gaf lu nda swida tuwak, ka ya gaf lu nda liŋ ya ghuɓap lu ya a tsi katsi, ta dzaʼa ghuɓəgliŋ ghuɓa lu ka mahis. Nda nza kul haɗ tsaɗa tida.

59 Tsaha ya tva skwi ŋa magay ta nghanatá mavyavya ta ksaŋtá lguta swida tuwak, ka ya gaf lu nda liŋ a tsi, ka skwiha gaf lu nda ga a tsi, ka ta inda skwi ka huta a tsi. Mantsa tama, dzaʼa mnaŋ mna lu kazlay haɗ skwa tsaɗa tida wu kəʼa tsi, ka nda skwi ta tsaɗ lu tida kəʼa a tsi, kəʼa, » kaʼa.