Tva skwi ŋa magay ma dgatá marakw
12
1 Ka Yawe nda Musa mantsa: 2 « Mnana mna ta la Israʼila: Ka zlghaf zlgha marakw ta huɗi, ka yatá zwaŋa zgun katsi, dzaʼa nza nza ka marakw ta tsaɗ lu ka fitik ndəfáŋ, manda ya ma fitika sagha zuʼi tida. 3 Baɗ matghasa fitik dzaʼa tsana tsa lu ta fafaɗa tsa zwaŋ ya. 4 Dzaʼa nza nza tsa marakw ya guli ka fitik hkən mbsak hkən mida, ŋa kliŋtá skwa tsaɗa ma usa ni. Ma tsa fitikha ya, haɗ dzaʼa ksaŋta dər wati ma skwi nda ghuɓa wu, haɗ dzaʼa da vli nda ghuɓa wu, ha ka kɗatá fitika hliŋta ni ta skwa tsaɗa tida. 5 Ama ka makwa ya tsi, dzaʼa nza nza ka marakw ta tsaɗ lu ka luma his, manda ya ma fitika sagha zuʼi tida guli. Tahula tsa, ŋa magata ni ta fitik mkuʼ mbsak mkuʼ mida ta kliŋtá skwa tsaɗ ma tsa usa ni ya.6 Kɗatá tsa fitika hliŋta ni ta skwa tsaɗa tida ya, dər má zgun tsi, dər má makwa a tsi, dzaʼa klədanagha kla ta mnda dra skwi ŋa Lazglafta ta wa tumpula guyaku ta slaɓalakwa tuwak turtuk vakwa ni ŋa pla ghəŋ ŋa dray tsuh tsuh. Dzaʼa kladagha kla guli ta zwana ghərbuʼ ka kuku a tsi, ŋa pla ghəŋ ŋa ɗawa pla dmaku. 7 Dzaʼa kladagha kla mnda dra skwi ŋa Lazglafta ta kəma Yawe ŋa slərɓanaptá zughu. Mantsa tama, ŋa nzata ni kul haɗ skwa tsaɗa tida ma usa ni pghiŋ tsi. Tsaya tva skwi ŋa magay ta nghanaghatá marakw ta yatá zwaŋ, dər zgun tsi dər makwa a tsi.
8 Ka haɗ skwa ni ŋa vlatá slaɓalakwa tuwak wu, hlafta ni ta kukuha his ka zwana ghərbuʼha his a tsi. Sani turtuk ŋa pla ghəŋ ŋa dray tsuh tsuh, sani ya guli ŋa pla ghəŋ ŋa ɗawa pla dmaku. Dzaʼa slərɓanap slərɓa mnda dra skwi ŋa Lazglafta ta zughu, ŋa nzakwa ni kul haɗ skwa tsaɗa tida, » kaʼa.