Sabi 29

Pghamtá gwal ta dra skwi ŋa Lazglafta ma slna taŋ

1 « Wya skwi dzaʼa ka magay ŋa pghaɗimtá i Haruna nda zwana ni ŋa magihata taŋ ta slna dra skwi: Ka klafta ka ta lghəŋ dɓakwa nda maŋazakha his kul haɗ maslivinza ta həŋ. 2 Ka data ka ta buradi kul haɗ is mida, nda gatu kul haɗ is mida hwaɗam lu nda rɗi, nda biskwit kul haɗ is mida magaf lu nda maga ta rɗi tida. Ka dadata ka nda hpwa alkama kəzlitit. 3 Ka pghamta ka ta həŋ ma tughba ka klaɗikta, kawadaga nda tsa lghəŋ, nda tsa maŋazakha his ya. 4 Ka hlagaghata ka ta i Haruna nda zwana ni ta wa tgha tumpula guyaku. Ka mbambazata ka ta həŋ nda imi. 5 Ka hlafta ka ta tsa lgutha ya, ka suɗanavata ka ta sɗakw ta Haruna, nda guduŋgaba ifut, nda ifut, nda zliba ghuva. Ka hbanata ka nda biwira ifut. 6 Ka wanamta ka ta gwambar ma ghəŋ, ka fanafta ka ta zlembetsa fata ni ka ŋa ɗa ta tsa gwambar ya. 7 Ka klafta ka ta rɗa fata ka ŋa Yawe, ka pghəganata ka ma ghəŋ ka masanamta. 8 Tahula tsa, ka hlagaghata ka ta tsa zwana zgwana ni ya, ka susuɗanavata ka ta sɗakwha ta həŋ. 9 Ka habanata ka ta huɗi ta i Haruna nda zwana ni nda biwir, wawanamta ka ta gwambar ma ghəŋ ta həŋ, ŋa gɗata taŋ ta maga slna dra skwi ŋa ɗa ŋa ɗekɗek. Mantsa ya dzaʼa pghamta ka ta i Haruna nda zwana ni da slna taŋ.

10 Ka kladaghata ka ta tsa lghəŋ ya kay ta kəma tumpula guyaku, ka pghafta i Haruna nda zwana ni ta dzvuha taŋ ta ghəŋa ni. 11 Ka ghwanafta ka ta tsa lghəŋ ya ta kəma Yawe ta wa tgha tumpula guyaku. 12 Ka taʼata ka ta usa tsa lghəŋ ya, ka ɗaɗafta ka nda ndəfiŋa dzvu ta duliha gwir, ka pghíŋta ka ta pɗakwa ni dista gwir. 13 Ka klafta ka ta inda ghwaviɗa nihuɗi, nda zəʼala mnak, nda hulsisha his his nda ghwaviɗ tida tani. Ka drafta ka demdem ta gwir. 14 Ama ka hlafta ka ta sluʼa tsa lghəŋ ya, nda huta ni, nda swiɗa ni tani, ka driŋta ka nda vu ta hula ghuɓu. Tsaya skwa pla ghəŋ ŋa ɗawa pla dmaku. 15 Tahula tsa, ka klaʼata ka ta ya turtuk ma tsa maŋazakha ya, ka pghafta i Haruna nda zwana ni ta dzvuha taŋ ta ghəŋa ni. 16 Ka ghwanafta ka ta tsa maŋazak ya, ka klafta ka ta usa ni ka wutsikafta ta slərpuha gwir demdem. 17 Ka daganapta ka fay ka fay ta tsa maŋazak ya. Ka ghwaɓiŋta ka ta nihuɗa ni, nda dagulamaha ni, ka pghafta ta tsa ɗatsatá sluʼa ni nda ghəŋa ni ya. 18 Ka drafta ka ta tsa maŋazak ya demdem ta gwir. Tsaya skwa pla ghəŋ ŋa dray tsuh tsuh ŋa Yawe. Tsa skwa pla ghəŋ draf lu ta vu ya ná, zɗəgana həlata ni ta Yawe.

19 Tahula tsa, ka klafta ka ta tsa sana mahisa maŋazak ya, ka pghafta i Haruna nda zwana ni ta dzvuha taŋ ta ghəŋa ni. 20 Ka ghwanafta ka ta tsa maŋazak ya, ka taʼata ka ta usa ni, ka ɗuŋta ka ta wa daɓaraka sləməŋa Haruna nda ga zeghwi, ɗaɗuŋ ka ta wa daɓaraka sləməŋa zwana ni nda ga zeghwi, nda ya ta dadana dzva zeghwa taŋ, nda ya ta dadana səla zeghwa taŋ. Ka wutsikafta ka ta pɗakwa tsa us ya ta vata gwir ka wanafta. 21 Ka taʼata ka ta tsa us ta gwir ya, nda rɗa fata ka ŋa Yawe, ka wutsikafta ka ta Haruna nda lgutha ni tani, nda ya ta zwana ni nda lgutha taŋ guli, ŋa nzakwa ni ka mndu nda fa ka ŋa Yawe, tsatsi nda lgutha ni tani, nda zwana ni nda lgutha taŋ tani. 22 Ka hlafta ka ta ghwaviɗa tsa maŋazak ya, nda htura ni, nda ghwaviɗa nihuɗa ni, nda zəʼala mnak, nda hulsisha his his nda ghwaviɗ tida tani, nda rkufa zeghwa ni, kabga maŋazak ta hnə lu ma famta ma slna ya. 23 Ka kalaʼata ka ta zlambla buradi turtuk, nda gatu turtuk hwaɗam lu nda rɗi, nda biskwit turtuk ma tughba buradi kul haɗ is mida fa lu ta kəma Yawe ya. 24 Ka pghanamta ka demdem ma dzvu ta i Haruna nda zwana ni, ka zukwaŋta həŋ ta tsa mbəhu ya ta kəma Yawe. 25 Tahula tsa, ka hlapta ka guli ma dzva taŋ, ka drafta ka ta gwir ta ghəŋa skwa pla ghəŋ ŋa dray tsuh tsuh. Tsa skwa pla ghəŋ draf lu ta vu ta kəma Yawe ya ná, zɗəgana zɗa həlata ni ta Yawe.

26 Ka klafta ka ta ghuva tsa maŋazak hna lu ŋa famtá Haruna ma slna ya, ka zukwaŋta ka ta tsa mbəhu ya ta kəma Yawe. Tsaya dzaʼa nzakway ŋa mayaka gha. 27 Ka fata ka ka ŋa Yawe ta fayha tsa maŋazak hna lu ŋa pghamtá i Haruna nda zwana ni ma slna ya. Tsaha ya ghuva tsa maŋazak ya nda rkufa ni, ya vlaŋ lu ta Yawe ma zukwanafta ya. Tsa fayha ya ta nzakway ka mayaka i Haruna nda zwana ni. 28 Tsaya dzaʼa nzakway ka mayaka i Haruna nda zwana ni ŋa ɗekɗek da la Israʼila, kabga nda nza ka mbəhu ŋa Yawe ta klapta ma skwiha pla ghəŋa zɗaku la Israʼila.

29 Ka sew Haruna, tsa lgutha ni fa lu ŋa Yawe ya ná, dzaʼa nzakway ŋa zwana ni ŋa klay taŋ baɗ masanaghatá rɗi ta həŋ, nda ya baɗ pghamtá həŋ ma slna taŋ. 30 Sani ma zwana Haruna ka mnda dra skwi ŋa Lazglafta ka sew da taŋ dzaʼa suɗay ka fitik ndəfáŋ ta lam tsi da tumpula guyaku da maga slna ma vli nda ghuɓa. 31 Tsa maŋazak ta hnə lu ma famta ma slna ya, ka klafta ka ta tsa ghuva ni nda rkufa ni ya ka data ma sana vli nda fa ŋa Yawe, 32 ŋa zay i Haruna nda zwana ni ta wa tumpula guyaku ta tsa sluʼa maŋazak ya, nda tsa buradi ma tughba ya. 33 Hahəŋ nda ghəŋa taŋ dzaʼa za tsa skwiha ŋa slərɓanaptá zughu ta həŋ ya, nda ya ŋa pghamtá həŋ ma slna taŋ, nda ya ma fata həŋ ka ŋa Yawe ya. Ama yaha hamata mndu da zay, kabga skwi nda ghuɓa ya. 34 Ka pɗa pɗa tsa sluʼi ma vəl famtá həŋ ma slna ya, ka buradi a tsi ka labi ta sərɗək, ka driŋta ka nda vu. Zəgəlta a lu wu, kabga skwa zay nda ghuɓa ya.

35 Ka maganata ka ta i Haruna nda zwana ni ta inda skwiha manda va ya mnaghaf yu. Ka magata ka ta fitik ndəfáŋ ta pghamtá həŋ ma slna. 36 Inda fitika ka vlata ka ta lghəŋ ŋa pla ghəŋ ŋa ɗawa pla dmaku, ŋa slərɓaptá zughu. Ka ghuɓiŋta ka ta gwir nda tsa slərɓa zughu ya, ka pghanaghata ka ta rɗi tida ŋa nzakwa ni nda fa ka ŋa Yawe. 37 Ndəfáŋ dzaʼa magata ka ta fitik ta slərɓaptá zughu ta gwir, ŋa fata gha ka ŋa Yawe. Mantsa tama, dzaʼa ghuɓuta gwir. Inda skwi dzaʼa ksaŋtá tsa gwir ya ná, dzaʼa nda fa ka ŋa Yawe. »

Pla ghəŋ tsuh tsuh inda fitik

38 « Wya skwiha dzaʼa gɗata ka da vlay ta gwir: Slaɓalakwha maŋazak his, turtuk turtuk vakwa taŋ inda fitik. 39 Slaɓalakwa maŋazak turtuk ga sərɗək, slaɓalakwa maŋazak turtuk ga hawu. 40 Ka klafta ka kawadaga nda tsa slaɓalakwa maŋazak taŋtaŋ ya, ka sganaghata ka ta hpu kəzlitit ka kiluʼ hkən, hwaɗata ni nda ɗitsatá rɗa zaytuŋ ka litər turtuk, nda ima inabi ka litər turtuk ŋa slranata. 41 Ka vlata ka ta tsa mahisa slaɓalakwa maŋazak ya ga hawu ka sganaghata ka ta mbəha nimaya nda skwi ŋa slranata manda va tsa ga sərɗək ya. Tsaya skwa pla ghəŋ ŋa dray ta vu zɗəgana həlata ni ta Yawe. 42 Ka gɗata kuni ta pla ghəŋ ŋa dray tsuh tsuh inda fitik ha ma zivirha ghuni ta kəma Yawe ta wa tgha tumpula guyaku, hada dzaʼa guyakwa yu nda kaghuni ŋa gwaɗgaghata ɗa. 43 Hada dzaʼa guyakwa yu nda la Israʼila. Dzaʼa fa fa glakwa ɗa ta tsa vli ya ka ŋa ɗa. 44 Dzaʼa fa fa yu ta tumpula guyaku, nda gwir ŋa ɗa. Dzaʼa fa fa yu ta i Haruna nda zwana ni, ŋa magay taŋ ta slna dra skwi ŋa ɗa. 45 Dzaʼa nzam nza yu mataba la Israʼila, dzaʼa nzakway yu ka Lazglafta taŋ. 46 Dzaʼa snaŋ sna həŋ kazlay iʼi Yawe, Lazglafta taŋ, ta hlagaptá həŋ ma haɗika Masar ŋa nzata ɗa mataba taŋ kəʼa. Iʼi Yawe, Lazglafta taŋ. »