Sabi 28

Lgutha gwal ta dra skwi ŋa Yawe

1 « Musa, gavaganagha gava ta vata kagha ta Haruna zwaŋama gha, nda zwana ni i Nadav, nda Avihuʼ, nda Ilghazar, nda Itamar. Ka dganata ka ta həŋ nda pɗakwa la Israʼila, ŋa magay taŋ ta slna dra skwi ŋa ɗa. 2 Ka maganafta ka ta lgut nda ghuɓa ta zwaŋama gha Haruna ŋa vlaŋtá glaku nda sgit. 3 Kagha, ka mnanata ka ta inda gwal ta vivɗa vlaŋ yu ta ɗifil ta həŋ ka gaganafta həŋ ta lgutha ta Haruna, kada nzakwa tsi nda fa ŋa magihatá slna dra skwi ŋa ɗa. 4 Wya tsa lgutha dzaʼa həŋ da gagafta ya: Zliba ghuva, nda ifut, nda guduŋgaba, nda gatá sɗakw, nda gwambar, nda biwir. Ka magafta həŋ ta tsa lgutha nda ghuɓa ya ŋa i Haruna zwaŋama gha nda ya ŋa zwana ni ŋa klay taŋ ta mag həŋ ta slna dra skwi ŋa ɗa. 5 Ka magafta həŋ nda dasu, nda sləvdzi ka kubwalkubwal, nda ya ka dva ghuz, nda ya ka dva ghəlez, nda sləvdza liŋ kulefeɗ.

6 Ka magafta həŋ ta ifut nda sləvdzi ka dasu, nda ya ka kubwalkubwal, nda ya ka dva ghuz, nda ya ka dva ghəlez, nda vəvɗatá sləvdza liŋ kulefeɗ, gwal ta vivɗa dzaʼa gagafta. 7 Ka magafta lu ta ifut nda skwiha his ŋa nzugwafta ta badzagaha, ŋa ŋanata ya təv kəma nda ya təv hul. 8 Biwira hba tsa ifut ya ná, gwal ta vivɗa dzaʼa gafta ka skwa turtuk lu nda tsi nda sləvdzi ka dasu, nda ya ka kubwalkubwal, nda ya ka dva ghuz, nda ya ka dva ghəlez, nda vəvɗatá sləvdza liŋ kulefeɗ. 9 Ka hlafta ka ta palaha ka uniks his, ka tahafta ka ta hga zwana Israʼila^* ta həŋ, 10 hguha taŋ mkuʼ ta ya pala, hguha taŋ mkuʼ ta ya pala, manda va tva na yayagatá həŋ. 11 Ka tahafta ka ta hguha zwana Israʼila ta tsa palaha his ya, manda ya ká gwal ta fiɗa pala ta taha hati ya. Ka pghamta ma guɗekwha ka dasu. 12 Ka habafta ka ta tsa palaha his ya ta dzvuha badzagaha tsa ifut ya, ŋa nzakwa tsa palaha ya ka skwa havu da la Israʼila. Ka kladaghata Haruna ta tsa hguha taŋ ya ta badzagaha ni his his ta kəma Yawe ka skwa havu. 13 Ka magafta ka ta guɗekwha ka dasu, 14 magafta ka ta ziɗaha desl desl his ka dasu ghenen ɗaf lu nda ɗa, ka habuŋta ka ta tsa ziɗaha ɗaf lu nda ɗa ya ta wa tsa guɗekwha ya.

15 Ka gafta ka ta zliba ghuva ŋa dga guma, gwal ta vivɗa dzaʼa gafta. Ka gafta ka manda gatá ifut nda sləvdzi ka dasu, nda ya ka kubwalkubwal, nda ya ka dva ghuz, nda ya ka dva ghəlez, nda vəvɗatá sləvdza liŋ kulefeɗ, ká ka da gafta. 16 Ka gragra ka tuldiha ni. Nda zləɓa ka tsa zliba ghuva ya. Dwaʼ ta dzvu ka slrakwa ni, dwaʼ ta dzvu ka bughwata ni guli. 17 Ka tsərslapta ka nda palaha nda bla nda bla ka ndərha fwaɗ. Taŋtaŋa ndər, pal pala ka sardwan, pal ya ka tupaz, pal ya ka imrud. 18 Mahisa ndər, pal pala ka nufek, pal ya ka saffir, pal ya ka dzindar. 19 Mahkəna ndər, pal pala ka yakiŋta, pal ya ka agat, pal ya ka ametis. 20 Mafwaɗa ndər, pal pala ka beril, pal ya ka uniks, pal ya ka yasfe. Ka paghamta ka ta tsa palaha ya ma tsa guɗekwha taŋ ka dasu ya. 21 Ta tsa palaha ghwaŋpəɗ his ya, dzaʼa tahaf taha lu ta hguha zwana Israʼila manda ya ta thafta lu ta hati. Tsa palaha ghwaŋpəɗ his ya ná, ta maray ta mndəra la Israʼila ghwaŋpəɗ his. 22 Ta wa tsa zliba ghuva ya, ka ɗuŋta ka manda ɗatá zuʼi ta ziɗaha his ka dasu ghenen. 23 Ta tsa zliba ghuva ya, ka magafta ka ta gidaŋha his ka dasu. Ka pghuŋta ka his his ta slərpuha wa ni. 24 Ka habafta ka ta tsa ɗaɗatá ziɗaha his ka dasu ya ta tsa gidaŋha his ta wa zliba ghuva ya. 25 Tsa sanlaha ma kuzibiɗima ɗaɗatá ziɗaha his ya ná, ka habuŋta ka ta wa tsa guɗekwha his ya. Ka habafta ka ta dzvuha ifut ŋa nzakwa ni nda təv kəma. 26 Ka magafta ka ta sanlaha ma gidaŋha his ka dasu, ka habuŋta ka ta slərpuha his mista ni nda ma huɗi zliba ghuva təv ifut. 27 Ka magafta ka ta sana gidaŋha his ka dasu, ka pghata ka nda ma mndəra tsa dzvuha ifut ya nda təv kəma, ma vla nzugwata ni nda ta ghəŋa biwira tsa ifut ya. 28 Ka habafta lu ta tsa gidaŋha ta slərpuha zliba ghuva, nda ya ta slərpuha ifut ya nda sləvdzi ka kubwalkubwal, ŋa nzakwa tsa zliba ghuva ya nda hba ta biwira ifut, ŋa kwala ni gigɗaku. 29 Mantsa, ta lam Haruna da tsa vli nda ghuɓa ya, ŋa kla ni ta ghuva ni ta hga zwana Israʼila ghwaŋpəɗ his ta zliba ghuva ta dga guma, ŋa nzakwa ni ka skwa havu ta kəma Yawe ŋa ɗekɗek. 30 Kagha Musa, ka pghamta ka ma tsa zliba ghuva ta dga guma ya ta Urim nda Tumim^ª ŋa klay Haruna ta ghuva ni ta lam tsi ta kəma Yawe. Mantsa, ta lam tsi ta kəma Yawe ya ná, ŋa gɗata ni ta klay ta ghuva ni ta tsa skwiha ta dga guma ŋa la Israʼila ya.

31 Ka magafta ka ta guduŋgaba ka kubwalkubwal ghenen ŋa fanaghatá ifut ta ghəŋa ni. 32 Ka tsapta lu ta ŋurzluŋa ni ma takataka. Gwal ga lgut dzaʼa gaftá tsa ŋurzluŋa ni ya ka wanafta. Manda ŋurzluŋa lguta huta dzaʼa nzakwa tsi ŋa kwala ni kuhwaku. 33 Ta wa guduŋgaba nda ta haɗik, ka maguŋta ka ta rimuŋha nda sləvdzi ka kubwalkubwal, nda ya ka dva ghuz, nda ya ka dva ghəlez. Ka laɓamta lu mataba taŋ ta kwaleleŋha ka dasu ta wa ni ha ka wanafta. 34 Pal kwaleleŋ ka dasu ya ná, pal rimuŋ ta wa tsa guduŋgaba ya ha ka wanafta. 35 Ka suɗavata Haruna ta lagha tsi da magihata slna ŋa snay lu ta ghudzaga tsa kwaleleŋha ya ta lam tsi ta kəma Yawe da vli nda ghuɓa. Mantsa ya ta sab tsi guli, kada kwala mtaku ta slanaghata.

36 Ka magafta ka ta zlembetsi ka dasu ghenen. Ka thafta ka tida manda thatá hati kazlay “nda fa ŋa Yawe” kəʼa. 37 Ka hafta ka ta sləvdzi ka kubwalkubwal ŋa nzakwa ni ta gwambar nda təv kəma ni. 38 Ta wa kuma Haruna dzaʼa nzakwa tsi, ŋa favata Haruna ta krughuviha dzaʼa gata la Israʼila ka ma fitik vla mbəhuha nda ghuɓa. Ta wa kuma ni dzaʼa nzakwa tsi inda fitik, kada tsuʼafta Yawe.

39 Nda sləvdza liŋ kulefeɗ dzaʼa gafta ka ta tsa sɗakw ya, nda sləvdza liŋ kulefeɗ dzaʼa gafta ka ta gwambar, magaf ka guli ta biwir dzaʼa gafta gwal ga lgut. 40 Zwana Haruna ya ná, ka mamaganafta ka ta həŋ ta sɗakwha, nda biwirha, nda gwambarha, ŋa vlaŋtá glaku nda sgit ta həŋ. 41 Ka suɗanavata ka ta zwaŋama gha Haruna, nda zwana ni, ka dzuvata ka ta həŋ nda rɗi, ka pghamta ka ta həŋ ma slna taŋ. Mantsa ya dzaʼa faɗimta ka ta həŋ ma slna dra skwi ŋa ɗa. 42 Ka maganafta ka ta gedzerha ta həŋ ka liŋ ŋa bukwa fərdiʼuwa taŋ, daga misti dikw ta rkufha. 43 Ka suɗivta i Haruna nda zwana ni ta lam həŋ da tumpula guyaku, ka ta lagha həŋ da magihatá slna ma vli nda ghuɓa a tsi, kada kwala həŋ gatá krughuvi ŋa kwala mtaku slanaghatá həŋ. Tsaya skwi dzaʼa mag i Haruna nda inda zivirha ni ŋa ɗekɗek. »