Sabi 30

Gwira dra urdi

1 « Ka magafta ka ta gwira dra urdi, nda udza kwehi dzaʼa magafta ka. 2 Ka gragra dzaʼa nzakwa slrakwa ni nda bughwata ni. Saŋtimitər hutaf mbsak nda təv ya, saŋtimitər hutaf mbsak guli nda təv ya. Mitər turtuk ká slada ni. Ka magafta ka tida tida ta duliha ni. 3 Ka zlərɓafta ka nda dasu ghenen, nda ghəŋa ni, nda slərpuha ni, nda duliha ni, ka wanafta. Ka maguŋta ka ta dasu ta wa ni, ka wanafta. 4 Ka maganafta ka ta gidaŋha his ka dasu nda mista wa ni ta slərpuha his ŋa hahamtá sandlaŋha ŋa klay tida. 5 Ka fifiɗafta ka ta tsa sandlaŋha udza kwehi ya, ka zlərɓata nda dasu.

6 Ka fata ka ta tsa gwir ya nda ta kəma tsa zlala ta mbuŋtá akwata dzratá wi nda paɗuwa vla pla dmaku ta ghəŋa klamha dzratá wi ya. Hada dzaʼa guyakwa yu nda kagha. 7 Inda sərɗək, ŋa dray Haruna ta urdi ŋa dray nda dra ta tsa gwir ya, ma fitika dzaʼa ni da payanatá vla tsatsaftá vu ta pitirla. 8 Inda hawu ta lagha tsi da tsatsaftá vu ta pitirla ya ná, ŋa dray ni ta tsa urdi ya. Ka gɗata kuni ta dra urdi ta kəma Yawe ha zivirha ghuni wa. 9 Yaha kuni da dray ta tsa gwir ya ta hamata urdi, dər skwa pla ghəŋ ŋa dray tsuh tsuh, dər mbəha nimaya. Yaha kuni nda skwi ŋa zlrafta nda slra tida. 10 Turtuk ma vaku dzaʼa maga Haruna ta slərɓa zughu ta duliha tsa gwir ya. Dzaʼa magay nda ma pghaftá usa skwa pla ghəŋ ŋa slərɓa zughu. Turtuk ma vaku dzaʼa gɗata lu ta slərɓaptá zughu ha ta zivir zivirha ghuni. Nda fa tsa gwir ya ŋa Yawe ka skwi ta ghuɓuta, » kaʼa.

Dzəmna vara htsiŋ

11 Ka Yawe nda Musa guli mantsa: 12 « Ma fitik dzaʼa mbəɗ ka ta mbsaka la Israʼila ya ná, ka vlata inda mndu ŋa Yawe ta skwi ŋa vara htsiŋa ni ta mbəɗa ka ta həŋ, kada kwala zləmnda slata mataba taŋ ta mbəɗ ka ta həŋ. 13 Wya skwi dzaʼa vlata inda mndu dzaʼa mbəɗafta lu: Rita daram ya ta kəl lu ka gra skwi ma həga nda ghuɓa, tsaya grama^ª tsedi mkuʼ. Skwi ŋa klanaptá Yawe tsaya. 14 Inda gwal dzaʼa mbəɗafta lu, sliʼafta ta imi hisambsak ka laghwi ta kəma dzaʼa vla tsa skwi ya ŋa Yawe. 15 Haɗ la ka gadghəl dzaʼa sganaghata wu, haɗ la ka pɗu dzaʼa htanaghuta guli ta tsa gram mkuʼ ya wa. Inda mndu dzaʼa vlay ŋa Yawe ta tsa skwi ŋa vara htsiŋ ya. 16 Zlghafta gha ta tsa kfura tsedi ya da la Israʼila ya ná, ŋa klafta gha ŋa maga slna tumpula guyaku. Dzaʼa nzakway ka skwa havu da la Israʼila ta kəma Yawe kazlay vara vara kuni ta htsiŋa ghuni kəʼa, » kaʼa.

Glifiŋ ka ghuva tili

17 Ka Yawe nda Musa guli mantsa: 18 « Ka tsafta ka ta glifiŋ ka ghuva tili nda tughwa ni ka ghuva tili. Ka fata ka ma takataka tumpula guyaku nda gwir. Ka ndəghamta ka ta imi mida, 19 ŋa tay i Haruna nda zwana ni ta tsa imi ya, ŋa mbaza dzvuha taŋ, nda səlaha taŋ. 20 Makəɗ həŋ lami da tsa tumpula guyaku, nda ya makəɗ həŋ lagha da maga slna ta gwir ŋa dra skwa pla ghəŋ ta vu ŋa Yawe ya, ka mbambaziŋta həŋ ta dzvuha taŋ, nda səlaha taŋ, da rwutá həŋ. 21 Ka mbambaziŋta həŋ ta dzvuha taŋ nda səlaha taŋ, da rwutá həŋ. Nda nza tsa zlahu ya ŋa ɗekɗek ŋa Haruna nda zwana ni ha zivir zivirha taŋ, » kaʼa.

Rɗa fata ka ŋa Yawe

22 Ka Yawe nda Musa mantsa: 23 « Ka klafta ka ta urdiha ta zɗuta katakata ka ta nzakway ka: Mur ka imi ka kiluʼ mkuʼ, nda kinamuŋ ka kiluʼ hkən, nda kuzuŋ zɗu ziʼakwa ni ka kiluʼ hkən, 24 nda kassiya ka kiluʼ mkuʼ taɓta daram ya ta kəl lu ka gra skwi ma vli ya nda ghuɓa. Taʼa ka guli ta rɗa zaytuŋ ka litər fwaɗ. 25 Ka magafta ka ka rɗi nda ghuɓa ŋa fata ka ŋa Yawe ta laɓatá urdi manda ya ta laɓanafta midala ta day, ŋa nzakway ka rɗi nda ghuɓa ŋa fata ka ŋa Yawe. 26 Ka masafta ka ta tsa rɗi ya ta tumpula guyaku nda akwata dzratá wi ŋa pghata ka ŋa Yawe. 27 Mantsa ya ta tabəl nda inda huzlaha ni, nda pitirlaha nda huzlaha ni, nda gwira dra urdi, 28 nda gwira pla ghəŋ ŋa dray tsuh tsuh nda inda huzlaha ni tani, nda glifiŋ nda tughwa ni tani. 29 Ka fata ka ka ŋa Yawe ta tsa huzlaha ya ŋa nzakwa taŋ ka skwiha ta ghuɓuta. Inda skwi dzaʼa ksaŋtá tsa huzlaha ya ná, dzaʼa nda fa ka ŋa Yawe. 30 Ka masafta ka ta tsa rɗi ya ta i Haruna nda zwana ni, ka fata ka ta həŋ ka ŋa iʼi Yawe, ŋa magihatá slna dra skwi.

31 Tahula tsa, wya ká ka da mnanatá la Israʼila: “Tsa rɗa fata ka ŋa Yawe ya ná, nda nza ka rɗi nda ghuɓa ŋa Yawe ha ma zivirha ghuni. 32 Yaha lu da masay ta vgha. Yaha mndu səla da walaŋta tskafta ka laɓanafta manda va nana. Nda fa ka ŋa Yawe, ka ngha kuni ka skwi nda fa ka ŋa Yawe. 33 Dər wati ma mndu ta tskafta ka laɓanafta manda va nana, dər ka masanavata hamata mndu a tsi, dzaʼa kliŋ kla lu mataba mndəra taŋ,” » kaʼa.

Urdi nda fa ka ŋa Yawe

34 Ka Yawe nda Musa guli mantsa: « Tskaf tska ka garagara ta urdiha zɗa zɗa ziʼakwa taŋ: Sturaks, nda uniks, nda galbunuŋ, nda urdiha zɗa zɗa ziʼakwa taŋ, nda mandaɓaya urdi ka ŋusliŋ ghenen. 35 Ka magata ka nda tsa skwiha ya ta urdi manda ya ta mag midala, ŋa maganaghatá slughul, ŋa nzata ni ghenen nda fa ka ŋa Yawe. 36 Ka tsəɗaʼata ka ka ŋerɗapta kəzlitit, ŋa fata gha ma tumpula guyaku ta kəma akwata dzratá wi ma tsa vli dzaʼa yu da guyaku nda kagha ya. Ka ngha kuni ka skwi ta ghuɓuta. 37 Yaha mndu da tskafta urdi manda va nana ka laɓanafta ŋa maga hamata slna ghuni. Ka ngha kuni ka skwi nda ghuɓa nda fa ka ŋa Yawe. 38 Dər wati ma mndu dzaʼa magafta manda va nana ŋa ziʼay ni ná, dzaʼa kliŋ kla lu mataba mndəra taŋ, » kaʼa.