Sabi 10

Sliʼakta hiʼa maya

1 Ka Yawe nda Musa mantsa: « La slanaghata Firʼawna, kabga təŋanaf təŋa yu ta ghəŋa ni nda ŋa kwalvaha ni tani, ŋa magata ɗa ta ŋizlaha ɗa mataba taŋ. 2 Mantsa ya tama, ŋa rusay gha ŋa zwana gha nda ya ŋa zighiha gha ya ka yu sunustá ima zgi ta la Masar, nda ya ka yu magatá ŋizlaha ɗa mataba taŋ. Tsaya dzaʼa kəl kuni ka snaŋta kazlay na iʼi Yawe kəʼa, » kaʼa. 3 Ka lagha i Musa nda Haruna da Firʼawna, ka həŋ nda tsi mantsa: « Ka Yawe, Lazglafta la Hebru wa: “Ha yawu dzaʼa gɗavata ka ma kwal kul dzagatá ghəŋ ta kəma ɗa na? Zlana zla ta mnduha ɗa ka sliʼa həŋ, ka tsəlɓa həŋ ta tsəlɓu ŋa ɗa. 4 Ka kwalaghu kwala ka ta zliŋtá həŋ katsi, dzaʼa zligiŋ zla yu mahtsim ta hiʼa maya ta kwakwara gha. 5 Dzaʼa haf ha tɗik ta haɗik ha ŋa kwal kul nghaŋtá vli. Dzaʼa zaɗana zaɗa ta skwiha ta paɗata da paplaha. Dzaʼa zuza ta inda fuha ta ɗyaku nda ɗya ta mtaka ghuni. 6 Dzaʼa ndaghanaf ndagha ta həgaha gha nda ŋa kwalvaha gha, nda ŋa inda la Masar. Ta ngha a i dadaha gha, nda dadaha ni ma dadaha gha, ta mndərga ni ka yawu nzakwa taŋ ha ka sagha ta gita wu,” » kaʼa. Ka mbəɗavatá tsi ka saghu tsi ga Firʼawna.

7 Ka kwalvaha Firʼawna nda tsi mantsa: « Ha yawu dzaʼa zlanata na mndu na ta ŋamaftá dəɓəl na? Zliŋ zla ta na mnduha na ka sliʼa həŋ da tsəlɓu ŋa Yawe, Lazglafta taŋ. Kulam ndana ta sna a kagha kazlay ta zaɗaku Masar kəʼa ra? » ka həŋ. 8 Ka vradanaghatá lu ta i Musa nda Haruna ta kəma Firʼawna. Kaʼa nda həŋ mantsa: « Lawa la, ka dzaʼa kuni da tsəlɓu Yawe, Lazglafta ghuni. Ama i wa nda i wa ta dzaʼa na? » kaʼa. 9 Ka Musa Mantsa: « Dzaʼa sliʼi ŋni nda duhwalha ŋni tani, nda galata mnduha ŋni tani, nda zwana ŋni zgwana nda kwagha ŋni tani. Mantsa rina fisika ŋni nda slaha ŋni tani, kabga nda ra ka dzaʼa ŋni da skalanatá skalu ta Yawe, » kaʼa. 10 Ka Firʼawna mantsa: « Aray! Má nzata Yawe kawadaga nda kaghuni yeya katsi, ka zlighunis zla yu ŋa sliʼa ghuni nda miʼa ghuni nda ya nda zwana ghuni, kabga mamu ndana maga ghwaɗaka skwi ma ghəŋa ghuni! 11 Tsa skwi ta ndanə kuni ya ná, magavata a wa. Zgwana kweŋkweŋ ta dzaʼa da tsəlɓu ŋa Yawe, kabga tsaya skwi ta ɗawu kuni da iʼi! » kaʼa. Ka ghəzliŋtá lu ta həŋ ta kəma Firʼawna.

12 Ka Yawe nda Musa mantsa: « Tɗadap dzva gha ta ghəŋa haɗika Masar, ŋa sliʼagaghata hiʼi maya da zutá inda kuzuŋ ta haɗik nda inda skwiha ya paɗana paplaha, » kaʼa. 13 Ka fadaptá Musa ta dafa ni ta ghəŋa haɗika Masar. Ka vyagaftá Yawe ta falaka silwa ta tsa haɗik ya ta tsa vaghu ya nda rviɗika ni tani. Tsaɗakwa vli, ka hlagaftá tsa falak ya ta hiʼa maya. 14 Ka sliʼagaghatá hiʼa maya ta inda haɗika Masar, ka slata ma inda vli ta kwakwara Masar, furtu furta katakata. Ta sagha a mndərga tsaya wu, səglaghata a guli wa. 15 Ka haftá tsi ta haɗik tɗik. Ka zutá həŋ ta inda skwiha ta ɗyafta ta haɗik, nda yakwa fuha tani demdem ya ta paɗata da paplaha. Haɗ sluhwa mukwenek ta pɗafta ta fu, nda skwiha ta ɗyaku nda ɗya ma vwah, ma inda vli ta haɗika Masar wa.

16 Ka ghunaftá Firʼawna misimmisim hganaktá i Musa nda Haruna, kaʼa nda həŋ mantsa: « Gana ga yu ta dmaku ta Yawe, Lazglafta ghuni, nda ya ŋa kaghuni guli. 17 Pliɗiswa pla ta dmakwa ɗa kay guli! Magawa duʼa da Yawe, Lazglafta ghuni, ŋa klaghuta ni ta ghəŋa ɗa ta na zləmnda ta dza mndu na, » kaʼa. 18 Ka sab Musa ma həga ga Firʼawna, ka mag tsi ta duʼa da Yawe. 19 Ka mbəɗaganaftá Yawe ta falaka mazu ta mbruta katakata, ka hlaghatá tsi ta tsa hiʼa maya ya, ka pghaghatá da drəfa Zaŋwafiha. Haɗ hiʼa maya dər turtuk ta pɗata inda kwakwara Masar wa. 20 Ama ka təŋanaftá Yawe ta ghəŋa Firʼawna kay guli. Zliŋ a ta la Israʼila wa.

Saha grusl ta haɗika Masar

21 Ka Yawe nda Musa mantsa: « Kapadaf dzva gha nda ta luwa. Dzaʼa sasa gurusl ta haɗik Masar, dzaʼa tɗiku tɗika ŋa nzakwa ni manda skwi dzaʼa laviŋta lu ta ksaŋta, » kaʼa. 22 Ka kapadaftá Musa ta dzva ni nda ta luwa, ka saha grusl tɗik katakata ta inda haɗika Masar ka fitik hkən. 23 Ma tsa fitik hkən ya, ngha a la Masar ta mndu sani nda sani wa. Haɗ mndu ta laviŋta sliʼafta ma vli nza tsi wa. Ama inda la Israʼila ya ná, mamu tsuwaɗak ma inda vli nza nza həŋ. 24 Ka hgaftá Firʼawna ta Musa, kaʼa nda tsi mantsa: « Lawa da tsəlɓu ŋa Yawe. Laviŋ lava kuni ta sliʼi nda miʼa ghuni nda zwana ghuni tani. Rina fisikha ghuni, nda slaha ghuni yeya dzaʼa kuni da zlanata hadna, » kaʼa. 25 Ka Musa mantsa: « Kadzeŋkadzeŋ! Faŋnam fa vərɗa kagha ma dzvu ta skwi nda səla ŋa dzaʼa ŋni pla ghəŋ ŋa dray tsuh tsuh ŋa Yawe, Lazglafta ŋni. 26 Guli ná, dzaʼa sliʼi ŋni nda rina ŋni tani. Haɗ skwi nda səla dzaʼa pɗata hadna wa. Mataba ni dzaʼa klaʼata ŋni ŋa vlaŋtá Yawe, Lazglafta ŋni. Sna a ŋni ta ya dzaʼa ŋni vlaŋtá Yawe wu, ba ta lagha ŋni da hada karaku, » kaʼa. 27 Ama ka təŋanaftá Yawe ta ghəŋa Firʼawna kay guli, va a ta zliŋtá la Israʼila ŋa sliʼa taŋ wa. 28 Ka Firʼawna nda Musa mantsa: « Laghu la gha hadna! Ɗasuwa ka ka, yaha ka səglagha da kəma ɗa! Ka vrəglagagha vra ka da iʼi katsi, mtá ta kagha tsa! » kaʼa. 29 Ka Musa mantsa: « Manda ya mna ka, vrəglagaghata a yu ta kəma gha wa! » kaʼa.