Sabi 9

Ketsepa rini

1 Ka Yawe nda Musa mantsa: « La slanaghatá Firʼawna, ka ka nda tsi na: “Ka Yawe, Lazglafta la Hebru nda kagha wa: Zliŋ zla ta mnduha ɗa ka sliʼa həŋ da tsəlɓu ŋa ɗa. 2 Ka kwalaghu kwala ka ta zliŋtá həŋ, ka ŋaghutá həŋ katsi, 3 dzaʼa kladagha kla dzva Yawe ta ketsepi ta furtuta ta ghəŋa rina gha ma mtak, ta ghəŋa plisha gha, nda kəɗihha gha, nda ŋalibwaha gha, nda slaha gha, nda rina fisikha gha! 4 Ama dzaʼa dgana dga Yawe ta rina la Israʼila nda rina la Masar, haɗ ya dər turtuk dzaʼa mtavaghuta mataba inda rina la Israʼila wa,” » kaʼa. 5 Ka tsaftá Yawe ta fitika ni, kaʼa mantsa: « Mahtsim dzaʼa maga iʼi Yawe ta tsaya ta haɗika Masar, » kaʼa. 6 Ga mahtsima ni, ka magatá Yawe ta skwi mna tsi. Ka rwutá rina la Masar nekwnekw, ama haɗ rina la Israʼila dər ka turtuk ta mtavaghuta wa. 7 Ka ghunaftá Firʼawna ta mndu da naghanatá rina la Israʼila, ka slanaghatá lu ná, haɗ ya dər turtuk ta mtavaghuta wa. Ama nduk nda tsa, ta təŋ təŋa ghəŋa Firʼawna, zliŋ a ta la Israʼila ŋa sliʼa taŋ wa.

Zləmnda mbuʼaha

8 Ka Yawe nda i Musa nda Haruna mantsa: « Tsəɗafwa tsəɗa ɗuk ma dzvu ta hutiɗifa uvun, ŋa pghadaftá Musa nda ta luwa ta kəma Firʼawna, 9 ŋa navafta ni ka rgitik ta inda haɗika Masar, ŋa vazakwa ni ka mbuʼa nda rwatá vgha mnduha nda rini tani, ta inda haɗika Masar, » kaʼa. 10 Ka tsəɗaʼata i Musa nda Haruna ta hutiɗifa uvun, ka lagha həŋ slanaghatá Firʼawna. Ka pghadaftá Musa nda ta luwa, ka sab tsi ka mbuʼa nda rwatá vgha mnduha nda rini tani. 11 Laviŋ a ɗəghaha ta gavadaghata ta vata Musa dabga tsa mbuʼa ya wu. Inda vgha taŋ ná, ka mbuʼa manda va ŋa pɗakwa la Masar demdem. 12 Ka təŋanaftá Yawe ta ghəŋ Firʼawna, ka kwalaghutá tsi ta snanatá həŋ, manda ya mnana Yawe ta Musa.

Pghagatá papla ta Masar

13 Ka Yawe nda Musa mantsa: « Tsavaf tsava wrək sərɗək, ka lagha ka ta kəma Firʼawna. Ka ka nda tsi na: Ka Yawe, Lazglafta la Hebru wa: “Zliŋ zla ta mnduha ɗa ka dzaʼa həŋ da tsəlɓu ŋa ɗa. 14 Ndana tama, dzaʼa ghungaghaghatá inda zləmndaha ɗa yu ta vərɗa kagha, nda kwalvaha gha, nda mnduha gha tani. Mantsa ya dzaʼa kəl ka ka snaŋta kazlay na, haɗ ya ta gara vgha nda iʼi ta ghəŋa haɗik tender wu kəʼa. 15 Ka má kapaf kapa yu ta dzva ɗa, ka dzughusta nda zləmnda katsi, kagha nda mnduha gha tani ná, má zwaɗu zwaɗa kuni ta ghəŋa haɗik ɗekɗek! 16 Ama zlagha zla yu nda hafu, ŋa maraghaŋtá mbrakwa ɗa, ŋa tiŋtá hga ɗa ta ghəŋa haɗik demdem. 17 Kulam nda tsa, ta gla ghəŋ ka ta ghəŋa mnduha ɗa, zliŋ a ka ta həŋ wa. 18 Dabga tsaya tama, mahtsim manda na luwa, dzaʼa nzaga nza yu ta papla dagala katakata. Ta maga a mantsa ya ka yawu nzakwa haɗika Masar ha ka sagha ta gita wa. 19 Ndana tama, vla vla ta zlahu ka ghazlamta lu da həga ta rina gha, nda inda skwiha gha ya ma mtak. Inda mnduha, nda rini tani ma mtak kul lamtá da həga ná, dzaʼa nzaga nza papla ta həŋ, ŋa rwuta taŋ,” » kaʼa. 20 Snaŋta sanlaha ma kwalvaha ta vata Firʼawna ta tsa gwaɗa Yawe ya, ka ghudzafta həŋ da zləŋ. Ka hlamtá həŋ ta kwalvaha taŋ, nda rina taŋ da həga. 21 Ama klaf a sanlaha ta tsa gwaɗa Yawe ya ka gwaɗa wu, ka zlanatá həŋ ta kwalvaha taŋ, nda rina taŋ ma mtak.

22 Ka Yawe nda Musa mantsa: « Kapaf kapa ta dzva gha nda ta luwa! Ka pghagata papla ta ghəŋa inda haɗika Masar. Ka pghagata tsi ta ghəŋa mnduha, nda rini tani, nda inda skwiha ta ɗyafta nda ɗya ta haɗika Masar demdem, » kaʼa. 23 Ka kapaftá Musa ta dafa ni nda ta luwa, ka ŋəzlanatá Yawe ta luwa, ka pghagatá tsi ta paplaha. Ka saha wuɗa luwa ta haɗik. Ka pghagatá Yawe ta papla ta haɗika Masar. 24 Nza nza lu ta papla, ka wuɗ luwa ta wuɗ ka suskwa nda paplaha nda papla dagala dagala katakata. Ta maga mndərga tsaya ta haɗika Masar ka yawu nzakwa ni wu. 25 Ka dzaɓ papla ta haɗika Masar ta inda skwiha ma mtak, nda mnduha tani, nda rini tani. Ka dzaɓ tsi ta inda skwiha ta ɗyafta nda ɗya ma vwah, ka ɓaliŋtá fuha demdem ma mtak. 26 Ba ta haɗika Guseŋ vli hada la Israʼila kweŋkweŋ kul ɓhadaghatá tsi.

27 Ka ghunaftá Firʼawna ta mndu da hganaktá i Musa nda Haruna, kaʼa nda həŋ mantsa: « Ndanana ná, gaga yu ta dmaku, ŋa Yawe kahwathwata, ama ŋa iʼi nda mnduha ɗa dmaku. 28 Magawa duʼa da Yawe, ŋa hlanatá ŋəzla luwa, nda paplaha! Dzaʼa zlighunis zla yu, haɗ kuni dzaʼa nzəɗglavata wa, » kaʼa. 29 Ka Musa mantsa: « Laba ɗa ma huɗa luwa ná, dzaʼa kapaf kapa yu ta dzvuha ɗa nda təv Yawe, dzaʼa hlata ŋəzla luwa, nda paplaha. Mantsa ya dzaʼa kəl ka ka snaŋta kazlay na ŋa Yawe haɗik kəʼa. 30 Ama nda sna yu, kagha nda kwalvaha gha ná, haɗ kuni dzaʼa zləŋa Yawe, Lazglafta karaku wa, » kaʼa.

31 Ma tsa fitik ya, badzu badza sanlaha ma nimaya ta hgə lu ka liŋ, nda urz, kabga nda pgha ghəŋa urz, ta vzlizla liŋ. 32 Ama alkama nda mndərga sanlaha ma alkama ta gerɗata ya, badzu a tsaha ya wa.

33 Ka saghu Musa ma həga ga Firʼawna, ka laghwi ta hula luwa. Ka kapaftá tsi ta dzvuha ni təv Yawe, ka hlatá ŋəzla luwa nda paplaha, ka tsaɗaghutá imi guli. 34 Nghay Firʼawna ta tsaɗaghuta imi, hla hla paplaha nda ŋəzla luwa ná, ka kəɗ tsi ta gəgəltá dmaku. Ka təŋglanaftá tsi ta ghəŋ, tsatsi nda kwalvaha ni tani. 35 Ka təŋutá ghəŋa Firʼawna, ka kwalaghutá tsi ta zliŋtá la Israʼila manda ya si mna Yawe nda ma wa Musa ya.