Sabi 8

1 Ka Yawe nda Musa mantsa: « Mnana mna ta Haruna, ka tɗapta tsi ta dzvu ka fadaptá dafa ni ta ghəŋa zalaha, nda ghwaha, nda drəfha, ŋa sliʼaganapta kləŋha təɓsaʼ ta haɗika Masar, » kaʼa. 2 Ka tɗadaptá Haruna ta dzva ni ta ghəŋa imiha Masar, ka sliʼagapta kləŋha təɓsaʼ ndəghanaftá ta haɗika Masar. 3 Ka magatá ɗəghaha ma Masar nda má ɗəgha ɗəgha taŋ manda va tsaya guli, ka sliʼaganapta kləŋha ta haɗika Masar.

4 Ka hgadaghatá Firʼawna ta i Musa nda Haruna, kaʼa nda həŋ mantsa: « Magawa duʼa da Yawe ka hliŋta tsi ta na kləŋha na ta ghəŋa ɗa, nda ya ta ghəŋa mnduha ɗa tani. Dzaʼa zliŋ zla yu ta la Israʼila ŋa dzaʼa taŋ da planatá ghəŋ ta Yawe, » kaʼa. 5 Ka Musa nda Firʼawna mantsa: « Kdəkkdək mghama ɗa mniha mna, ka yawu ta kuma ka ta magay ɗa ta duʼa ta ghəŋa kagha, nda kwalvaha gha, nda mnduha gha, ka hliŋta tsi ta kləŋha ga ghuni nda ya ma həgaha gha. Mantsa tama ŋa pɗata ya ma ghwa Nil kweŋkweŋ, » kaʼa. 6 Kaʼa mantsa: « Mahtsim, » kaʼa. Ka Musa mantsa: « Dzaʼa nzakway manda ya mna ka! Kada snaŋta ka kazlay haɗ mndu taɓta Yawe, Lazglafta ŋni wu kəʼa. 7 Dzaʼa laghu la kləŋha ta vata kagha nda həgaha gha, nda kwalvaha gha, nda mnduha gha, ŋa pɗata ya ma ghwa Nil kweŋkweŋ, » kaʼa.

8 Ka saghu i Musa nda Haruna ga Firʼawna. Ka taw Musa ta taw da Yawe ta ghəŋa kləŋha ta lanaghatá Firʼawna. 9 Ka magata Yawe manda ya ɗawaŋ Musa da tsi. Ka rwutá kləŋha ma həgaha, nda ya ta daɓi tghaha, nda ya ma vwahha. 10 Ka tsakanatá lu gəɗim gəɗim, ka ziʼuta vli ma tsa haɗik ya ghurndiŋ. 11 Kəʼa ka Firʼawna ná, hlap hla ta hafu. Ka təŋanaftá tsi ta ghəŋ, ka kwalaghuta snata ŋa i Musa nda Haruna, manda ya si mna Yawe.

Yutá tsitsi ma Masar

12 Ka Yawe nda Musa mantsa: « Mnana mna ta Haruna ka fadapta tsi ta dafa ni, ka dzaŋta tsi ta rgitika haɗik, ŋa nuta ni ka tsitsiha ta inda haɗika Masar, » kaʼa. 13 Ka magatá i Musa nda Haruna manda va tsaya. Ka tɗapta Haruna ta dzva ni, ka dzuŋtá gəninika haɗik nda dafa ni. Ka nutá tsa gəninik ya ka tsitsiha, ka sliʼafta ta mnduha, nda ya ta rini tani. Ka nutá inda gəninik ta haɗika Masar ka tsitsiha. 14 Ka ŋavata ɗəghaha ma Masar nda ma ɗəgha ɗəgha taŋ ma ŋa zlagigiŋtá tsitsiha guli, ama ka trapta həŋ. Ka gɗavata tsitsiha ta mnduha nda ya ta rini. 15 Ka həŋ nda Firʼawna mantsa: « Mbrakwa Lazglafta na skwi na! » ka həŋ. Ama ka təŋanaftá Firʼawna ta ghəŋ, ka kwalaghuta snatá ŋa i Musa nda Haruna, manda ya si mna Yawe.

Yuta zuɗiha ma Masar

16 Ka Yawe nda Musa mantsa: « Ka tsavafta ka wurək sərɗək mahtsim, ka lagha slanaghata Firʼawna ta fitika saba ni ŋa dzaʼa ta wa ghwa ya. Ka ka dazlay nda tsi: “Ka Yawe na: Zliŋ zla ta mnduha ɗa ka dzaʼa həŋ da tsəlɓu ŋa ɗa. 17 Ka zliŋ a ka ta həŋ wu katsi, dzaʼa zligiŋ zla yu ta zuɗiha tuvulvulvul ta kagha, nda kwalvaha gha tani, nda mnduha gha tani, nda ya ta ghəŋa həgaha gha tani. Dzaʼa ndaghaganap ndagha həŋ ta həgaha la Masar, nda inda vliha ya nza nza həŋ. 18 Baɗu tsaya ná, dzaʼa kuraghu kura yu ta haɗika Guseŋ vli ya ta nzaku mnduha ɗa, ŋa kwala zuɗiha tuvulvulvul lagha da hada, kada snaŋta ka kazlay iʼi Yawe ná, ma tsa haɗik ya yu kəʼa. 19 Dzaʼa huzlinis huzla yu ta mnduha ɗa ta tsa zləmnda dzaʼa slaghaghata ya. Mahtsim dzaʼa magakwa tsa ŋizla ya,” » kaʼa. 20 Ka magatá Yawe manda va ya mna tsi. Ka sliʼadaghata zuɗiha tuvulvulvul bəɗukw da həga ga Firʼawna, nda ya da həga kwalvaha ni, nda ya ta haɗika Masar demdem. Ka ɓadzanatá tsa zuɗiha ya ta vli katakata ta haɗika Masar.

21 Ka hgadaghatá Firʼawna ta i Musa nda Haruna, kaʼa nda həŋ mantsa: « Lawa la ka dzaʼa kuni da planata ghəŋ ta Lazglafta ghuni, ama ma na haɗik na katsi, » kaʼa. 22 Ka Musa nda tsi mantsa: « Laviŋ a aŋni ta magay manda tsaya wu, kabga skwi ta vəl ŋni ŋa pla ghəŋ ŋa Yawe, Lazglafta ŋni ná, ka dzahay nzakwa ni da la Masar na. Ka hna hna ŋni ta wa ira taŋ ta skwi ka dzahay katsi ná, dzaʼa zlərtsay həŋ ta aŋni nda pala. 23 Fitik hkən dzaʼa magata ŋni ta mbaɗa ŋa dzaʼa da mtak da planatá ghəŋ ta Yawe, Lazglafta ŋni, manda ya mnaŋna tsi, » kaʼa. 24 Ka Firʼawna mantsa: « Dzaʼa zlighunis zla yu ŋa dzaʼa ghuni da planatá ghəŋ ta Yawe, Lazglafta ghuni ma mtak. Ama yaha kuni da zaghuta diʼiŋ! Ka maga kuni ta duʼa ta ghəŋa ɗa guli, » kaʼa. 25 Ka Musa mantsa: « Nda sliʼa yu, dzaʼa magay yu ta duʼa da Yawe. Mahtsim, dzaʼa zlagha zla zuɗiha tuvulvulvul ya a mghama ɗa, nda gwal ta kwalvaha gha tani, nda mnduha gha tani, ama yaha ka da nanəgəltá aŋni, yaha ka da kwalaghutá zliŋta la Israʼila, ŋa dzaʼa taŋ da planata ghəŋ ta Yawe! » kaʼa. 26 Ka saghu Musa ga Firʼawna, ka magatá duʼa da Yawe. 27 Ka magatá Yawe manda ya ɗawaŋ Musa da tsi, ka zlanatá tsa zuɗiha tuvulvulvul ya ta Firʼawna, nda kwalvaha ni tani, nda mnduha ni tani. Haɗ zuɗi ta pɗata dər turtuk wa. 28 Kulam nda va tsa guli, ka təŋanaftá Firʼawna ta ghəŋa ni, ka kwalaghuta zliŋtá la Israʼila.