Kɗavakta zləmnda
11
1 Ka Yawe nda Musa mantsa: « Dzaʼa fanagha fa yu ta kɗavakta zləmnda ta ghəŋa Firʼawna nda Masar tani. Tahula tsa, ŋa zlighunista ni hadna. Ma zlighunista ni, ŋa ka ghəzlidighunista. 2 Mnanam mna ma sləməŋ ta la Israʼila kazlay, ka ɗawa inda zgun da sləvda ni, ta ɗawu inda marakw da sləvda ni guli ta huzlaha ka kfura tsedi, nda ya ka dasu, » kaʼa. 3 Yawe ta magata kəl la Israʼila ka mutsaftá zɗakatahuɗi da la Masar. Musa guli ná, nda nza ka mndu dagala ta haɗika Masar ta wa ira kwalvaha Firʼawna, nda ya ta wa ira mnduha.4 Ka Musa nda Firʼawna mantsa: « Wya ka Yawe mnata: “Ma takala dzaʼa lam la yu da ranaftá Masar, 5 ŋa rwuta inda zumaliha ma Masar, zlrafta ni ta zumala Firʼawna ta dzaʼa lafi ta dughuruk ya, ha ta zumala kurɗu ta huʼu, nda ya nda inda zumala rini. 6 Dzaʼa wahay lu ta wahu katakata ta inda haɗika Masar. Ta maga a mantsa ya wu, magəglata a mantsa ya guli wa. 7 Ama nda da la Israʼila, haɗ lu dzaʼa snaŋtá ghughaŋtá kri ta mndu dər rini wu. Tsaya dzaʼa kəl kuni ka snaŋta kazlay dgana dga Yawe ta la Masar nda la Israʼila kəʼa.” 8 Mantsa tama, dzaʼa sliʼak sliʼa inda kwalvaha gha da tsəlɓu ta kəma ɗa nda manay kazlay na: “Lawa la nda inda mnduha ta ksa səla gha tani kəʼa.” Tahula tsa, ŋa saba ɗa, » kaʼa. Ka saghu Musa da Firʼawna nda gufatá ŋuɗuf.