Yanata Tamar ta zivir ta Yahuda
38
1 Ma tsa vaku ya, ka sliʼaftá Yahuda da zwana ma ni ka laha da luwa Ghadulam da sana mndu ta hgə lu ka Hira. 2 Hada, ka nghaŋtá Yahuda ta makwa sana mnda la Kanʼana ta hgə lu ka Suwagh, ka klaftá tsi ka markwa taŋ. Ka lam tsi da tsi, 3 ka zlghaftá tsi ta huɗi, ka yatá tsi ta zwaŋa zgun ka tsanaftá Yahuda ta hga ni ka Gher. 4 Ka zlghəglaftá tsi ta huɗi ka yəglatá tsi ta zwaŋa zgun, ka hgə tsi ka Unaŋ. 5 Ka yata tsi guli ta zwaŋa zgun, ka tsanaftá tsi ta hga ni ka Sela. Ma luwa Kəziv na Yahuda ta yatá lu ta tsa zwaŋ ya.6 Ka klanaftá Yahuda ta marakw ta Gher zumala ni ta nzakway ka Ira, Tamar hga tsa marakw ya. 7 Tsa Gher zumala Yahuda ya ná, zɗəgana a ta Yawe wa, ka dzatá Yawe. 8 Ka Yahuda nda Unaŋ mantsa: « Lam la da markwa zwaŋama gha. Ka wunanaghata ka, ka yanata ka ta zivir ta zwaŋama gha, » kaʼa. 9 Ama nda sna Unaŋ kazlay nzata a tsa zivir ya ka ŋa ni wu kəʼa. Tsaya tama, ma hanay ni ta hani nda tsa marakw ya, pghiŋta ni ta vgha ni ta haɗik ŋa kwala ni yanatá zwaŋ ta tsa zwaŋama ni ya. 10 Zɗəgana a tsa skwi ta mag tsi ya ta Yawe wa, ka dzatá tsi guli. 11 Ka Yahuda nda Tamar ta nzakway ka ghwaʼala ni mantsa: « La nzata ga da gha ka ga ka ta wadga gha hada, ka kzla ka ta glafta zwaŋa ɗa ta nzakway ka Sela, » kaʼa. Tsaw ma ghəŋa ni ya na: « Da mtutá Sela manda zwana ma ni, » kaʼa. Ka sliʼaftá Tamar ka laghwi da nzata ga da ni.
12 Lab la fitik mida tama, ka mtutá markwa Yahuda, makwa Suwagh. Manda ŋəzapta Yahuda ta markwa taŋ tama, ka sliʼaftá tsi ka lafi da Timna kawadaga nda sləvda ni Hira mnda la Ghadulam, da gwal ta gatsa swida tuwakha ni. 13 Ka lagha lu mnanatá Tamar kazlay: « Waʼa laf la dzidza gha da Timna da gatsa swida tuwakha ni » kəʼa. 14 Lagha Tamar ka kliŋtá lguta ŋəzu ta vgha ni, ka bukwaftá tsi ta ghəŋa ni nda geli yaha lu da tsəmafta, ka laghu tsi nzata ta wa tva lami da luwa Ghenayim ta tva dzaʼa da Timna. Tsaw nda ngha Tamar ta glatá Sela, ta vla a Yahuda ta Tamar ŋa Sela ŋa nzakwa ni ka markwa taŋ wa. 15 Ka nghaŋtá Yahuda ta Tamar. Zawardzi ya kaʼa sizlay, kabga nda bukwa kuma ni. 16 Ka mbəɗavatá tsi ka lagha da tsi ta wa tvi, kaʼa nda tsi mantsa: « Kdəkkdək, mbaɗa da ghuni mamu gwaɗa ɗa nda kagha! » kaʼa, kabga sna a tsatsi kazlay ghwaʼala ni ya kəʼa wu. Ka Tamar mantsa: « Nu dzaʼa vlihata ka, kada dzaʼa ka da iʼi na? » kaʼa. 17 Ka Yahuda mantsa: « Dzaʼa tsghaghaf tsgha yu ta zwaŋa gu mataba bra rina ɗa, » kaʼa nda tsi. « Aray! Ama vliha vla ta muluɗay ka ŋanata yu ŋa grafta karaku, ta tsghagaptá ka, » ka Tamar. 18 Kaʼa mantsa: « Nahgani dzaʼa vlaghata yu muluɗay na? » kaʼa. Ka Tamar mantsa: « Ŋizla gha, nda sləvdza ni tani, vliha ka ta na dafa ma dzva gha na guli, » kaʼa. Ka lam tsi da tsi, ka laghu tsi ka huɗi. 19 Ka sliʼaftá Tamar ka laghu dzagha ni. Ka hliŋtá tsi ta tsa gela bukwa ghəŋa ni ya, ka suɗglavatá lguta ŋəza ni.
20 Ka tsəghafta Yahuda ta tsa zwaŋa gu ya nda ta sləvda ni mnda la Ghadulam ya, ŋa zlghafta ni ta tsa skwiha ŋa varay ma dzva tsa marakw ya, ama slanagha a ta tsa marakw ya wa. 21 Ka ɗawaŋtá tsi da sana mnduha ma tsa vli ya, kaʼa mantsa: « Ga tsa karwa si ma Ghenayim ta wa tvi ya na? » kaʼa. « Haɗ karwa ta kəɗ nzata hadna wu, » ka həŋ nda tsi.
22 Ka vraghutá tsi slanaghatá Yahuda, kaʼa mantsa: « Slanagha a yu wa. “Haɗ karwa ma na vli na wu,” ka mnduha ma tsa vli ya guli, » kaʼa. 23 Ka Yahuda mantsa: « Ka hla tsi ta tsa skwi ŋa varay ya ŋa ni! Yaha u nzakway ka skwa ghuɓasay! Wya si tsghadap tsgha yu ta zwaŋa gu, slanagha a kagha wu! » kaʼa.
24 Maga ta tili hkən tahula tsa tama, ka lagha lu mnanatá Yahuda, ka lu mantsa: « Laghu la ghwaʼala gha Tamar da ga karwa ni, waʼa zlghaf zlgha ta huɗi ma tsa ga karwa ni ya, » ka lu. Ka Yahuda mantsa: « Klaghawa kla ka driŋta kuni nda vu, ta ndiri ta ndiri, » ka Yahuda.
25 Klagap kla lu dzibil tama, ka ghunaftá tsi ta mndu da dzidza ni, kaʼa mantsa: « Nghana ngha ta na huzla na. Na ŋizla na nda sləvdza ni tani, nda na dafa na tani ná, ŋa tsa mndu ta zlghaɗivatá huɗi yeya. Kdəkkdək, tsatsif tsatsa ta tsa mndu ya, » kaʼa. 26 Ka graftá Yahuda, ŋa ni ya, kaʼa mantsa: « Mal tsatsi nzakwa ni tɗukwa ka iʼi! Má si dzaʼa klaf kla yu ka vlaŋtá zwaŋa ɗa Sela ŋa markwa taŋ, maga yu wu, » kaʼa. Tahula tsa, hanəgla a Yahuda nda tsi wa. 27 Sagha fitika dgakwa ni, kəʼa ka lu ná, gurzlalaʼ mbuhwali ma huɗa ni. 28 Ta yay yay lu, ka fagatá sani ta dzvu, ka ŋanatá tsa marakw ta yay ya ta dzvu ka hbanaftá sləvdza dva, kaʼa mantsa: « Tiŋəl nana ta saha, » kaʼa. 29 Ama ka vriŋtá tsa zwaŋ ya ta dzva ni, ka tiŋlaghutá zwaŋama ni ta saha. Ka tsa marakw ta yay ya mantsa: « Nda ta wati ghurum saha kagha! » kaʼa. Ka hgə tsi ka Peretsª. 30 Tahula tsa ka saha tsa zwaŋama ni si hbanaf lu ta sləvdza dva ya, ka tsanaftá lu ta hga ni ka Zerahª.