Suna Yusufu
37
1 Ka nzatá Yakubu ta haɗika Kanʼana, ta haɗik ya si nza da ni. 2 Wya ka rusa ta ghəŋa mndəra la Yakubu:Magatá ima Yusufu ghwaŋpəɗ ndəfáŋ, ka nghə tsi ta rina fisik kawadaga nda zwana ma ni guli. Ta ka galaɓay, ta nzaku kawadaga nda zwana Bilha nda ya nda zwana Zilpa miʼa da ni. Ka klədanaghatá Yusufu ta lwa sana ghwaɗaka gwaɗa mataba taŋ ta da ni.
3 Ɗvu ɗva Israʼila ta Yusufu ka malaghutá inda zwana ni, kabga zwaŋa halaku ya ma tsatsi. Ka ɗahanaftá tsi ta sana lgut nda rka tida ka ka nda ɗinakwa ni. 4 Kəʼa ka zwana ma ni ná, ɗvu ɗva da taŋ ka malaghutá inda zwana ma ni, ka husaŋtá tsi ta həŋ, laviŋ a həŋ ta gwaɗa nda tsi nda zɗaku wa.
5 Ka fanaghatá suni ta Yusufu, ka rusanaftá tsi ta zwana ma ni, ka sgavaghatá husaŋta ni ta həŋ kay guli. 6 Kaʼa nda həŋ mantsa: « Kdəkwa kdək fawa fa ta sləməŋ ka sna suni ta faɗighata. 7 Ta haba bakərva alkama mu ma vwah, ka sliʼaftá ŋa ɗa ma bakərva ka sladata, ka sliʼaftá ŋa ghuni ma bakərva ka lagha ka wanafta ka tsəlɓata ŋa ni, » kaʼa. 8 Ka zwana ma ni mantsa: « Ta kumay ka ta ga mgham ta ghəŋa aŋni ra? Ta kumay ka ta nzaŋnaghata ra? » ka həŋ, ka va husəglaŋtá tsi ta həŋ kay guli ta ghəŋa tsa suniha ni, nda tsa gwaɗaha ni ya.
9 Ka fəglanaghatá suni kay guli, ka rus tsi ŋa zwana ma ni. Kaʼa mantsa: « Wya ká sana suni ta faɗighata kay guli. Lagha fitik nda tili nda tekwatsa ghwaŋpəɗ ndeŋ ka tsəlɓu ta kəma ɗa, » kaʼa. 10 Ka rusanaftá tsi ta tsa suna ni ya ta i da ni, nda zwana ma ni. Ka davanaghatá da ni, kaʼa mantsa: « Mndərga wati tsaya ma suni ta faghaghata na? Dzaʼa lagha la iʼi, nda ma gha, nda zwana ma gha, da tsəlɓu ta kəma gha tama rki? » kaʼa. 11 Ka drə zwana ma ni. Ama ka famtá da ni ta tsa gwaɗa ya ma ghəŋa ni.
Skwaptá Yusufu ka vuʼa
12 Ka sliʼaftá zwana ma ni ka laghu da ngha rina fisika da taŋ ma Sekem. 13 Ka Israʼila nda Yusufu mantsa: « Waʼa laghu la zwana ma gha da ngha rini ma Sekem, sawi ka ghuna yu ta kagha da həŋ, » kaʼa. « Wana yu! » ka Yusufu. 14 Ka da ni nda tsi mantsa: « La nghanaghatá zwana ma gha ka ta ɗughwana həŋ, ka ki tsi, ka ta ɗina rini fisikha re ka ki tsi guli, ŋa sagha gha da mnihatá nzakwa taŋ, » kaʼa. Ka ghunaftá da ni daga ma didiŋa Hevruŋ. Ka ɓhadaghata Yusufu da Sekem, 15 ka guyatá sana mndu nda tsi ta ra vli ma mtak. Ka tsa mndu ya nda tsi mantsa: « Nya ta zbə ka na? » kaʼa. 16 Kaʼa mantsa: « Zwana ma ɗa ta zbə yu, kdəkkdək, mniha mna ka ndiga ta ngha həŋ ta rini ya, » kaʼa. 17 Ka tsa mndu ya mantsa: « Sliʼa sliʼa həŋ hadna, kabga nda sna yu ta mnay taŋ kazlay: “Mbaɗma da Dutaŋ kəʼa,” » kaʼa. Ka laghu Yusufu da zbiŋtá tsa zwana ma ni ya, ka slanaghatá tsi ta həŋ ma Dutaŋ.
18 Daga ta diʼiŋ tsi ka nghaŋtá həŋ. Ma kɗaku tsi ndusanavatá həŋ, ka gi dzraftá həŋ ta wi ŋa dzata. 19 Ka həŋ mataba taŋ mantsa: « Waʼa tsa da ni ma suni ya ta sagha! 20 Ndanana tama, mbaɗma! Dzama dza, ka vzaghata mu da gudzuvruŋ. Nimtak ta dughwaɗuta, ka mu dzaʼazlay, ka ngha mu ka waká tsa suna ni ya dzaʼa magay, » ka həŋ. 21 Ka snaŋtá Rubeŋ ta tsa gwaɗa ya, ka kum tsi ta katapta ma dzva taŋ. Kaʼa mantsa: « Ma dza mu nda dza, » kaʼa. 22 Ka Rubeŋ nda həŋ guli mantsa: « Ma dza mu nda dza! Ksafma ksa ka vzaghata mu da na gudzuvruŋ ma na mtak na, ma faf kuni ta dzvu tida, » kaʼa kabga ŋa katapta ma dzva taŋ, ŋa vriŋta da da ni.
23 Ɓhadaghata Yusufu da zwana ma ni, ka ksaftá həŋ ka slurtatá həŋ ta tsa lguta ni nda rka tida ka ka nda ɗinakwa ni ta vgha ni ya. 24 Ka klaftá həŋ ka vzaghata da tsa gudzuvruŋ ya, tsaw tsa gudzuvruŋ ya ná, nda swiʼa, haɗ imi mida wa.
25 Ka nzatá həŋ ka za skwa zay. Kəʼa ka həŋ klaŋtá ghəŋ ná, ka nghaŋtá həŋ ta tskata la Ismayel ta lab ta tvi si ma Gilghat ta dzaʼa ta haɗika Masar. Nda klatá skwiha zɗa zɗa ziʼakwa taŋ kavghakavgha, nda mandaɓaya urdiha ŋa dray nda dra, ta ŋalibwaha taŋ ŋa dzaʼa dzawapta ma Masar. 26 Ka Yahuda nda zwana ma ni mantsa: « Nu ndela mu ma dzata mu ta zwaŋama mu, ka ɗifanatá usa vəl dzata mu na? 27 Mbaɗma! Skwanapma skwa ta la Ismayel, ma dza mu nda dza, zwaŋama mu ya nda va tsa, zimbiɗa mu ya, » kaʼa. « Aray! » ka zwana ma ni. 28 Ta lab la gwal tsakala ta nzakway ka la Midyaŋ nda ta tsa tvi ya. Ka tɗagaftá həŋ ta Yusufu ma tsa vavrəm ya, ka skwanaptá la Ismayel ka sulay hisambsak, ka klaghatá tsaha ya ta Yusufu ta haɗika Masar.
Taway Yakubu ta Yusufu
29 Ka vradaghatá Rubeŋ ta wa tsa gudzuvruŋ ya, haɗ Yusufu mida wa. Ka kwahiŋtá tsi ta lgut ta vghaª ni. 30 Ka vradaghatá tsi slanaghatá zwana ma ni, kaʼa mantsa: « Ta haɗ tsa zwaŋ ya wu hada wa. Iʼi, dzaʼa diga yu ndana tama? » kaʼa.
31 Ka ghwanaftá həŋ ta dugzum, ka klaftá həŋ ta lguta Yusufu ka nzughuvamta ma us. 32 Ka ghunaftá mndu da da taŋ nda tsa lgut nda rka tida ka ka nda ɗinakwa ni ya. Ka həŋ mantsa: « Wana skwi slanagha ŋni, tsəmana tsəma ka lguta zwaŋa gha tsi, ka ki tsi, » ka həŋ.
33 Kəʼa ka Yakubu ná, vani ya, kaʼa mantsa: « Lguta zwaŋa ɗa ya kahwathwata! Nimtak ta dughwaɗuta Yusufu. Nimtak ta ɗatsanapta, » kaʼa. 34 Ka kwahiŋtá Yakubu ta lgut ta vgha ni, ka hbivtá buhu mistiª, kidaghi fitika ni ta tawa zwaŋa ni. 35 Ka sliʼaftá inda zwana zgwana ni nda kwagha ni ka kuma ksanatá ŋuɗuf, ama ka kwalaghutá tsi ta ksanatá ŋuɗuf, kaʼa mantsa: « Nda ima taw ta iri dzaʼa laha yu slanaghatá zwaŋa ɗa ma haɗik, » kaʼa, ka kəɗ tsi ta taway.
36 Ka klaghatá la Midyaŋ ta Yusufu da luwa Masar. Ka skwanaptá həŋ ta Putifar zwira Firʼawna, mali ta ghəŋa gwal ta nghay.