I Abraham nda Abimelek
20
1 Ka sliʼaftá Abraham ka laghu nzata ta haɗika Negev. Ka nzatá tsi ma takataka Kades nda Sur, ka nzəɗavatá tsi ma Gerar. 2 Ka Abraham dabga markwa taŋ Sara mantsa: « Makuma ɗa ya, » kaʼa. Ka ghunaftá Abimelek mghama Gerar ta mnduha klagaghutá Sara. 3 Mantsa tama, ka sagha Lazglafta slanaghatá Abimelek girviɗik ma suni, kaʼa nda tsi mantsa: « Nda mta ka dabga na marakw klaf ka na, kabga mamu zəʼala taŋ, » kaʼa.4 Ta la a Abimelek hanata nda tsi karaku wa, kaʼa mantsa: « Rvera ɗa, dzaʼa psla psla ka ta mndəra mnduha dər ga a həŋ ta dmaku ra? 5 Makuma ɗa ya a, kaʼa nda iʼi ra? Zwaŋama ɗa ya a ka vərɗa tsatsi guli nda iʼi guli ra? Nda ndanu tɗukwa magata yu ma ŋuɗufa ɗa, ga a yu ta dmaku wu, » kaʼa.
6 Ka Lazglafta nda tsi ma suni mantsa: « Iʼi guli ná, nda sna yu maga maga ka ta skwi tɗukwa ma ŋuɗufa gha, pyaf pya yu ta kagha ka magihatá dmaku, tsaya kwal yu vlaghatá tvi ŋa ksaŋta. 7 Ndanana, vranava vra ta markwa tsa mndu ya, ka magaghata tsi ta duʼa, ŋa nzakwa gha nda hafu, ya anabi ya. Ama ka vranava a ka wu, graf gra kazlay dzaʼa mtaku ka kahwathwata, kagha nda inda gwal ga ghuni tani, » kaʼa.
8 Ka sliʼaftá Abimelek wrək tgha, ka hagaktá tsi ta inda kwalvaha ni, ka snanamtá inda tsa skwiha ya da sləməŋa taŋ. Ka zləŋ tsa mnduha ya da zləŋ katakata. 9 Ka hgaktá Abimelek ta Abraham, kaʼa nda tsi mantsa: « Nu mndərga na magaŋna ka na? Dmakwa wu ya maga gha yu? Kəl ka ka klaŋnaktá dmaku ta ghəŋa iʼi nda ya ta ghəŋa luwa ga mghama ɗa na? Magiha maga ka ta skwi ya má dzaʼa kwal kul magavata, » kaʼa. 10 Ka Abimelek nda Abraham guli mantsa: « Nu ndanaŋ ka kəl ka ka magatá skwi mantsa na? » kaʼa. 11 Ka Abraham mantsa: « Haɗ lu ta zləŋa Lazglafta ma na vli na wu, dzaʼa dza dza həŋ ta iʼi ta ghəŋa markwa ini, ka yu si ndanay. 12 Nziya nza tsi ná, makuma ɗa ya kahwathwata, makwa da ɗa ya, ma ɗa a ta yata wu, ka klatá yu ka markwa ini. 13 Manda klafta Lazglafta ta iʼi ka laghwa da ra vli diʼiŋ nda həga da ɗa, ka yu nda Sara mantsa: “Wya zɗakatahuɗi dzaʼa ka magihata: Inda vli dzaʼa lagha u ya na: Zwaŋama ɗa ya, ka ka dzaʼazlay nda iʼi,” ka yu. »
14 Ka hlaftá Abimelek ta rina visik, nda slaha, nda kwalvaha, nda kurɗuha ka vlaŋtá Abraham, vranavaha ta Sara markwa taŋ. 15 Ka Abimelek mantsa: « Wya haɗika ɗa ta kəma gha, nzata gha ma vli ya ta zɗəgaghata. » 16 Kaʼa nda Sara mantsa: « Wya vlaŋ vla yu ta sulay dəmbuʼ ta zwaŋama gha. Tsaya dzaʼa nzakway ka ŋizla da inda gwal ndusa nda kagha kazlay ga a ka ta dmaku wu kəʼa, nda ya da inda mnduha kazlay ksagha a sana skwi wu kəʼa ma na gwaɗa na, » kaʼa.