Zlrafta 19

Dmakwa la Sədum

1 Ka ɓhadaghatá tsa duhwalha Lazglafta his ya da luwa Sədum ga hawu, ta nzaku Lut ta wa tgha lami da luwa Sədum. Ka nghaŋtá Lut ta həŋ, ka sliʼaftá tsi ka lab da guya həŋ, ka tsəlɓatá tsi ta kəma taŋ ka dzatá ghəŋ ta haɗik. 2 Kaʼa mantsa: « Kdəkwa kdək sawa da həga ga kwalva ghuni mghamha ɗa, ka mbaziŋta kuni ta səlaha ghuni ka hana kuni ga ini, ka sliʼafta ghuni wurək tgha ga sərɗək ka kɗa tva ghuni, » kaʼa. Ka həŋ mantsa: « Kay! dzaʼa han ta daɓi ŋni, » ka həŋ. 3 Ka va mbrəh Lut ta həŋ ka ŋəɗa ŋəɗa, ka sliʼaftá həŋ ka laghu da taŋ. Ka maganatá tsi ta skwa zay ta həŋ, danaha ta gatu kul haɗ is mida ta həŋ guli, ka zutá həŋ.

4 Ta la a həŋ da hani wu, ka sliʼadaghatá inda mnduha ma luwa, la Sədum wanaftá tsa həga ya. Nda duhwalha tani, nda la galata mndu tani, haɗ mndu ta pɗavaghuta wa. 5 Ka hag həŋ ta Lut, ka həŋ mantsa: « Ga tsa mnduha ta sam da ghuni hawu na ya na? Hləgaŋnap hla ta həŋ ka hana ŋni ta hani nda həŋ, » ka həŋ.

6 Ka sab Lut ta wa tgha da gwaɗa nda həŋ, ka vruguŋtá tgha ndaga mahulhula ni. 7 Kaʼa mantsa: « Kdəkwa kdək zwana ma ɗa, ma mag kuni ta ghwaɗaka skwi! 8 Wana daghala kwagha ɗa his ta kul snaŋtá zgun, ka hlagaghunap hla yu ta həŋ, ka maga kuni ta skwi manda ya ta zɗəgaghunata nda həŋ. Ama na mnduha na ná, ma gwaɗanaf kuni ta həŋ, matbayha ɗa ya ta sam da həga ga ini, » kaʼa. 9 Ka həŋ mantsa: « Laghu la gha! Kagha mayəm ta sagha da nzata hadna guli ná, ta tsa guma yu ta ghəŋa kaghuni ka ka! Wana ŋni dzaʼa magaghatá skwi ka malaghutá ŋa taŋ, » ka həŋ. Ka tiŋw həŋ ta Lut nda mbraku, ka gavadaghata ka dzaʼa ɓliŋtá tgha. 10 Ama ka tsghagaptá tsa mnduha his ya tɗadamtá Lut da həga, ka huŋtá wa tgha. 11 Ka ghulpiŋtá həŋ ta tsa mnduha ta wa tgha ya, nda duhwalha tani, nda galata mnduha tani, ka traptá həŋ ta tsatsəglaftá wa tgha lam da həga.

Mbanaftá Lut

12 Ka tsa mnduha his ya nda Lut mantsa: « Mamu mnduha gha hadna ra? Ka mamu gwasa gha, nda zwana zgwana gha, nda kwagha gha, nda inda zbuha gha, la hligiŋtá həŋ ma na vli na, 13 kabga dzaʼa zaɗanatá na vli na ŋni. Katakata ɓhata wahu ta ghəŋa mnduha ma na vli na da Yawe. Tsaya kəl Yawe ka ghunagatá aŋni ŋa zaɗanata, » ka həŋ.

14 Ka sliʼaftá Lut ka laghu da mnay ŋa gwasiha ni ta dzugwa kwagha ni, kaʼa mantsa: « Sliʼafwa sliʼa misimmisim ka sliʼapta kuni ma na vli na, kabga dzaʼa zaɗanatá na luwa na Yawe, » kaʼa. Ama ma ndana gwasiha ni ya ná, gaga mndani ya, ka həŋ.

15 Watatta tsaɗakwa vli, ka mblu tsa duhwalha Lazglafta ya ta Lut, ka həŋ mantsa: « Sliʼaf sliʼa misimmisim, kla ta markwa ghuni nda na kwagha gha his wana həŋ na, da zaɗaghatá lu ma dmakwa na luwa na, » ka həŋ. 16 Mbaɗa Lut ka laghu da gərɗa vgha. Lagha tsa mnduha ya ka ksafta ta dzvu, mantsa ya markwa taŋ nda tsa kwagha ni his ya, ka kligiŋtá həŋ diʼiŋ nda luwa, kabga tawa tawa Yawe ta hiɗahiɗa tida. 17 Manda hligiŋta taŋ ta həŋ, kaʼa mantsa: « Hwaya ka katafta ka ta hafa gha! Ma nghap ka nda hul, ma sladava ka ma daɓi. Hwaya ta ghwá, da zaɗaghatá lu, » kaʼa. 18 Ka Lut nda həŋ mantsa: « Mantsa a mghama ɗa wu, kdəkkdək. 19 Wana mutsaf mutsa kwalva gha ta zɗakatahuɗi ta wa ira gha, ka mariɗiŋta ka ta glakwa zɗakwa gha ka zlihata nda hafu. Ama iʼi, laviŋ a yu ta hwayafta ha ta ghwá kul ɓhiɗivatá na zləmnda na ka mtuta ɗa wu. 20 Waʼa zwaŋa luwa hadaʼa, ndusa ŋa hwayamta ɗa dida. Zwaŋa luwa ya, ka hwaya yu da hada da kataftá hafa ɗa, » kaʼa. 21 Kaʼa nda tsi mantsa: « Yaw! Tsuʼaf tsuʼa yu ta tawa gha, haɗ yu dzaʼa zaɗanatá tsa luwa ta gwaɗ ka ya wa. 22 Hwaya misimmisim, ka dzaʼa ka da ɗifaghuta hada. Haɗ sana skwi dzaʼa laviŋta yu ta magay ka ta lam a ka dida wu, » kaʼa. Tsaya kəl lu ka hga tsa luwa ya, ka Tsughwar.

Zaɗanatá Sədum nda Ghamura

23 Mbessa vzlazlaŋ ta lam Lut da luwa Tsughwar. 24 Ma tsa fitik ya, ka nzagatá Yawe ta vu nda hutiɗifa vu ghandand ta ghəŋa Sədum nda Ghamura. Yawe ta nzagata ta luwa. 25 Ka zaɗanatá tsi ta tsa luwaha ya nda inda tsa daɓi ya, nda inda mnduha ma tsa luwaha ya, nda inda skwi ta ɗyafta nda ɗya ta haɗik tani. 26 Ka nghaptá markwa Lut nda ga mahulhul, ka nuta tsi ka hutaya slughul.

27 Ka sliʼaftá Abraham wrək sərɗək, ka lab da tsa vli si slada tsi kawadaga nda Yawe ya. 28 Ka nghadaptá tsi təv Sədum nda Ghamura, nghadapha ta inda kwakwara tsa daɓi ya. Ka nghaŋtá tsi ta ɗukwakwa ɗiŋ ta sliʼafta ta haɗik, manda ɗiŋa vu dagala. 29 Ma zaɗanata Lazglafta ta tsa luwaha ma daɓi ya, ka havaptá tsi ka Abraham, ka kligiŋtá tsi ta Lut ma tsa zaɗaku ma zaɗanata ni ta tsa luwaha si nza Lut mida ya.

Lama sliʼiŋsliʼiŋ da həga ga Lut

30 Tahula tsa, ka sliʼaftá Lut ma Tsughwar ka laghu da nzata ta ghwá kawadaga nda kwagha ni his, kabga ksuta zləŋ ka nzata ma Tsughwar. Ka laghu tsi nzata ma galigha kawadaga nda həŋ. 31 Ma sana fitik tama, ka tsa makwa ka mali ya nda sagəŋa ni mantsa: « Wana nda hala da u, haɗ zgun ma na haɗik na ŋa sagha gwaɗguʼuwata manda ya ta mag lu ta ghəŋa haɗik tender wa. 32 Sawi! Suŋ u sa ta ghuzu ta da u, ka hanata u nda tsi, kada nzulanata u ta zivira da u, » kaʼa. 33 Ka sunustá həŋ ta ghuzu ta da taŋ ta tsa rviɗik ya, ka sliʼaftá mali ka hnata nda da ni. Sna a ta fitika hanata ni da tsi wu, sna a ta fitika saghwa ni da tsi guli wa.

34 Ga mahtsima ni, ka tsa mali ya nda sagəŋ mantsa: « Wya hana hana iʼi nda da ɗa ɗahawu kay, sunus u sa ta ghuzu gita ta na rviɗik na guli, ka dzaʼa kagha hanata nda tsi. Ka nzulanata u ta zivira da u, » kaʼa. 35 Ka sunustá həŋ ta ghuzu ta da taŋ, ta tsa rviɗik ya guli. Ka sliʼaftá tsa makwa ka sagəŋ ya, ka hanata nda tsi. Sna a ta fitika hanata ni da tsi wu, sna a ta fitika saghwa ni da tsi guli wa. 36 Ka zlaghaftá tsa kwagha Lut ya his his ta huɗi nda da taŋ. 37 Ka yatá tsa mali ya ta zwaŋa zgun, ka hgə tsi ta hga ni ka Muwav. Tsatsi dzidza ni ma la Muwav ha gita. 38 Tsa makwa ka sagəŋ ya, ka yatá tsatsi ta zwaŋa zgun guli, ka hgə tsi ta hga ni ka Benʼami. Tsatsi dzidza ni ma la Ghamuŋ ha gita.