सते आत्मा अनि लबड आत्मतुन नड्डुम तेडा करि किय्वल
4
1 लाड्नुर सोप्तलिर्निट!
‘नह्गा बगवंतना आत्मा मंत’ इन्जेर वेह्वल हर वोरोन बरोसा किय्मट.
बति अव आत्मङ बगवंतनल वातङ कि सेले इन्जेर परिक्सा कीम्ट.
बारितेके वेलेटिर लबड बोदा गुरुर दुनियते पेसितेर.
2 ते मिरट बगवंतना आत्मतुन इहिन करि कियना: बद्ते आत्मा येसु किरिस्तु माय्नना रूप्ने बगवंतनल वातोर इन्जेर वोपंतयो, अद आत्मा बगवंतना आंद.
3 बति माय्नना रूप्ने येसु वातोर इन्जेर बद्ते आत्मा वोपोयो, अद बगवंतना आत्मा आयो.
आतल आत्मा किरिस्तुनोर पगा-दारना आंद.
आतल आत्मा वांता इन्जेर मिरट मोदोल केन्ज्तिट.
अद इंके दुनियतगा वासिन मंता.
4 बति ना मरि-मियड दात्नुर्निट!
मिरट बगवंतनुर आंदिट.
मी रोपो मंवल बगवंतना आत्मा, दुनियतगा मंवल आत्मतुन तेर डगुर आंद.
अदेन साटि, वूरङ लबड बोदन मिरट वोप्मकि.
5 लबड बोदा गुरुर दुनियतुर आता काड्कि, दुनियतङ गोस्टिङे वड्कंतेर.
वूरङ गोस्टिङ दुनियतुर वोपंतेर.
6 बति मरट बगवंतनुर आंदट.
बगवंतन करि कीतुर वूर मा बोदा वोपंतेर.
बगवंतन करि किय्मकि वूर, मा बोदा वोपुर.
इदेन पिय्सि, मरट बद सते आत्मा अनि बद लबड आत्मा इंवल तेडा करि किया परंतट.
बगवंतल पेर्मा वाले आंदुर
7 लाड्नुर सोप्तलिर्निट!
मरट वोरोन वोरोर पेर्मते सूड्कट.
बारितेके पेर्मा बगवंतन हिंदल मा रोपो पुटंता.
पेर्मते सूड्वलिर सम्दिर बगवंतनुर मरि-मियड आंदिर अनि वूरकुन बगवंतल टावा.
8 बगवंतले पेर्मता रूप्ने मंवल आता काड्कि, पेर्मते सूडुर वूर बगवंतन करि कीतुर आयुर.
9 तंवोर मरिन हिंदल मरट जीवते मंले, तनकुन मंवल वोरोरे मरिन इद दुनियते रोह्तोर.
इद तरिकते बगवंतल तंवा पेर्मतुन माकुन तोह्तोर.
10 मरट बगवंतन पेर्मा कीतट इन्जेर आयो बति, तनय माकुन लाड कीसेर मंतोर.
अदेन साटिने तंवोर मरि बलिदान आसि, मावङ पापकुन कंडि कीनुर इन्जेर रोह्तोर.
इदे करल पेर्मा आंद.
11 लाड्नुर सोप्तलिर्निट!
बगवंतले माकुन इचोर पेर्मते सूड्ता काड्कि, मरट गिर तप्वक वोरोन वोरोर पेर्मते सूडना.
12 बगवंतन बोरे मायनल बस्केन सूड्मकि.
बति मरट वोरोन वोरोर पेर्मते सूड्तेके, बगवंतल मा रोपो मंदंतोर.
वोना पेर्मा मा रोपो बर्पुर बडे मांता.
13 बगवंतल तंवा आत्मा माकुन सीतोर.
इदेन हिंदल, मरट वोन्गा अनि वोर मह्गा उंदि आसि मंतोर इंवल माकुन टावा.
14 बाबो बगवंतल तंवोर मरिन दुनियतुरकुन बचि किय्ले रोह्तोर.
अपोस्तुल्क आय्वलिर ममोट वोन सूड्सि, इद गवा वेह्चेर मंतोम.
15 बगवंतनोर मरि येसु आंदुर इन्जेर वोप्वल, बगवंतनगा वोर अनि वोन्गा बगवंतल उंदि आसि मंदंतोर.
16 अनि मरट, बगवंतल मा पोरो तोह्ता पेर्मतुन करि कीसि, बरोसा इर्तट.
बगवंतले पेर्मता रूप्ने मंवल आंदुर.
पेर्मते सूड्वलिर बगवंतनगा उंदि आसि मंदंतेर अनि बगवंतल वूर्गा उंदि आसि मंदंतोर.
17 मह्गा बगवंतना पेर्मा बर्पुर आसि मत्ता काड्कि, तस्वा किय्वल दिवोसुन नेटि मरट वेरिवक्ने मंदंतट.
बारितेके इद दुनियते किरिस्तु पिस्ता तीरे मरट गिर पिसेर मंतट.
18 ईतल पेर्मतगा वेरे मनो.
बारितेके करल पेर्मा वेरेतुन तेंड्सि वाटंता.
बगवंतल सिक्सा कीनुर इन्जेर बोर्ते वेरियंतोरो, वोर अद पेर्मतगा बर्पुर बडे मायोर.
19 मोदोल बगवंतल माकुन लाड कीतोर.
अदेन साटिने मरट बगवंतन अनि दुस्रुरकुन पेर्मा कीसेर मंतट.
20 “बगवंतन पेर्मा कींतोन” इन्जेर वेह्चेर, तंवा सङा मंवल बक्तन पेर्मा कियोर वोर लपङि आंदुर.
दिसेर मंवल बक्तने पेर्मते सूडोर वोर, दिसोर वोर बगवंतन बहन पेर्मा किया परंतोर?
21 “बगवंतन पेर्मा किय्वल, तंवा सङा मंवल बक्तन गिर पेर्मते सूडना” इंवल आगे बगवंतल माकुन सीतोर.