3
1 बाबो बगवंतल माकुन बेय पेर्मा कीता काड्कि, तंवुर मरि-मियड इन्जेर केय्ले गिर वोप्सेर मंतोर.
मरट करलेन बगवंतनुर मरि-मियड आंदट.
बति इद गोस्टि दुनियतुरकुन टावा सेले.
बारितेके बगवंतन वूर करि किय्मकि.
2 लाड्नुर सोप्तलिर्निट!
इंके मरट बगवंतना मरि-मियड आसि मंतट.
मरट बविसत्ने बहन मंदंतट इंवल बगवंतल अजुन तोहोरे.
बति किरिस्तु उंडे उंदि जोका वानेके, वोर बहन मंदंतोर इंवल मरट सूडंतट.
अस्के मरट गिर अह्ने मंदंतट इंवल माकुन टावा.
3 इहिन आसा किय्वल हर वोरोर, येसु पवित्रा आसि मत्तपे, तना गिर पवित्रा आसि मंदंतोर.
4 पाप किय्वल हर वोरोर बगवंतनङ आगेन पिय्सि ताकोर.
आगेन पिय्सि ताक्वक मंवले पाप आंद.
5 बति मरट कीतङ पापकुन कंडि किय्लेके, येसु किरिस्तु वातोर इंवल मीकुन टावा.
वोन्गा बदे पाप सेले.
6 ते किरिस्तुना बक्तितगा निल्सि मंवल बोरे आयि पाप कीसेर मनोर.
बति पर्बुन सूड्मकि अनि पर्बुन बारेते करि किय्मकि वोरे, पाप कीसेर मंदंतोर.
7 ना मरि-मियड दात्नुर्निट!
मीकुन बोरे पसि किय्वक्ने दिहंते मंट.
वोर पर्बु नियत्नोर आसि मत्तपिनय, नियत्ने ताक्वल हर वोरोर नियत्नोरे आंदुर.
8 बति पाप कीसेर मंवल हर वोरोर सय्तंता बाज्नोर आंदुर.
बारितेके मोदोडल सय्तन पाप्क कीसेरेन मंतोर.
सय्तंतङ कामकुन नासेडम किय्लेके, बगवंतनोर मरि येसु किरिस्तु, इद दुनियते वातोर.
9 बगवंतनुर मरि-मियड आय्वलिर बूरे गिर पाप कीसेर मनुर.
बारितेके बगवंतना गुन वूर्गा मंदंता.
वोनुर मरि-मियड आता काड्कि, वूर पाप कीसेर मंदा परुर.
10 इदेन पिय्सि बगवंतना अनि सय्तंदा मरि-मियडुन नड्डुम तेडा करे मांता.
नियत्ने ताकुर वूर अनि दुस्रुरकुन पेर्मते सूडुर वूर, बगवंतनुर मरि-मियड आयुर.
वोरोन वोरोर पेर्मते सूडट
11 ‘वोरोन वोरोर पेर्मते सूडट्’ इंवल इद बोदा मिरट मोदोडल केन्ज्तय आंद.
12 मरट कयिंतुन दात मंवा.
वोर सय्तंता बाज्नोर आता काड्कि, तंवोर तमुन जक्तोर.
+ तमुन बारि जक्तोर?
बारितेके वोनोर तमुर नियत्ने ताक्सेर मत्तोर अनि वोर कयिन बगड-नियत्ने ताक्सेर मत्तोर.
13 ते ना दादलिर-बायिक्निट, उंदि मोका दुनियतुर मीकुन पसंद किय्वेके गिर गुल आय्मट.
14 मरट किरिस्तुनुर बक्तलिरकुन पेर्मते सूड्सेर मंतट.
इदेन हिंदल मरंतुन वीड्सि,* पिस्वडेके वातट इन्जेर माकुन टावा.
पेर्मते सूडोर वोर उंडे गिर मरंतगन निल्सि मंतोर.
15 तंवा सङा मंवल बक्तन पसंद कियोर वोर, माय्नन जक्वल आंदुर.
बोरे आयि माय्नन जक्वन, बस्केट पिस्वल जीवा पुटो इन्जेर मीकुन टावय.
16 येसु मा साटि तंवा परन सीतोर.
इदेन हिंदल, करल पेर्मा बातल इंवल मरट करि कींतट.
मरट गिर मा सङा मंवलिर बक्तलिर साटि, परन सिय्वल जिमा मा पोरो मंता.
17 दुनियते वोरोर चोकोट पिसेर, तंवा सङा मंवल बक्तन जुरत मंता इन्जेर करि कीसि गिर, दया तोहोर वोन्गा बगवंतना पेर्मा बहन मंदर?
18 ना मरि-मियड दात्नुर बक्तलिर्निट!
मरट मावा पेर्मतुन सिरिप गोस्टिनेन आयो बति, सत्ने काम्क कीसि तोह्कट.
19 अहन पेर्मा कीतेकेन, मरट सत्ना बाज्नुर आंदट इन्जेर माकुन वोड्कि आंता.
अनि बगवंतना चर्नते वेरिवक्ने निला परंतट.
20 अस्के गिर मन-दिल्क मा पोरो कसुर वाट्तेके वेरिवा.
बारितेके बगवंतन सम्दो टावा अनि वोर मावा मन-दिलतुन तेर डगुर आंदुर.
21-22 लाड्नुर सोप्तलिर्निट!
मावङ मन-दिल्क मा पोरो कसुर वाट्वेके, बगवंतन मुने मरट दर्यम्ने मंदा वचो.
अनि मरट बगवंतनङ हुकुम्क पिय्सि, वोन आनंद सीनल काम्क कीकट्ते, तल्क्ता अद सम्दो वोर माकुन सींतोर.
23 मरट येसु किरिस्तुनगा बरोसा इरना अनि वोरोन वोरोर पेर्मते सूडना इन्जेर, माकुन बगवंतल तंवङ आगेङ सीतोर.
24 बगवंतनङ आगेन पिय्सि ताक्वल बगवंतनगा उंदि आसि मंदंतोर.
अनि बगवंतल वोन्गा उंदि आसि मंदंतोर इंवल गोस्टि माकुन टावा.
बारितेके, वोर सीता पवित्रा आत्मा मा रोपो मंता.