माकुन मदत किय्वल किरिस्तु
2
1 पर्बुनुर बक्तलिर्निट!
मिरट ना मरि-मियड दात्नुर आंदिट.
मिरट पाप किय्वक्ने मंदना इन्जेर इव गोस्टिङ मीकुन लिहि कीसेर मंतोन.
तेर बति मह्गटल बोरे पाप कीनुर्ते, मा हिंदल आसि, बगवंतन सङा वड्क्ले, नियत्नोर येसु किरिस्तु मंतोर.
2 वोर मावङ पापकुन कंडि किय्ले, बलि चडे मातोर.
सिरिप मावङ पापकुन साटिने आयो बति, दुनियतुर सम्दिरङ पापकुन साटि बलि चडे मातोर.
3 मरट बगवंतनङ आगेङ पिय्सि ताक्तेके, वोर माकुन टावये इंवल तप्वक करे मांता.
4 ‘बगवंतल नाकुन टावय्’ इन्जेर वेह्चेर, वोनङ हुकुम्क पिय्सि ताकोर वोर लपङि आंदुर.
आतोनगा सतेम मनो.
5 बति बगवंतनङ आगेङ पिय्सि ताक्वनगा करलेन बगवंतना पेर्मा बर्पुर मंदंता.
इदेन हिंदल मरट वोन्गा उंदि आसि मंतट इन्जेर करि कींतट.
6 ‘बगवंतना बक्तिते पिसेर मंतोन्’ इन्जेर वेह्वल, येसुन दाते ताका लागर.
पूना तरिकते पडना हुकुम
7 लाड्नुर सोप्तलिर्निट!
नना इंके मीकुन लिहि किय्वल पूना बोदा आयो बति, मिरट मोदोडल केन्ज्ता, पडनय आगे आंद.
8 बति मीकुन पूना तरिकते अद पडना आगेतुन लिहि कीसेर मंतोन.
इदे सतेम येसुनगा अनि मिह्गा गिर मंता.
सत्ना वेड्चि पार्वडुन हिंदल, सिकटि कमि आसेर मंता.
9 ‘वेड्चितगा मंतोन्’ इन्जेर वेह्चेर, तंवा सङा मंवल बक्तन पेर्मा किय्वक मंवल इंके वेरि गिर सिकटितेन मंतोर.
10 तंवा सङा मंवल बक्तन पेर्मा किय्वल वेड्चितगा मंवल आंतोर.
वोन्गा पाप्नेके वोय्वल बतय सेले.
11 बति तंवोर सोप्तल आय्वल बक्तन पेर्मा कियोर वोर, सिकटितगन पिसेर मंतोर.
सिकटि वोनङ कडकुन नदुर बंद कीता काड्कि, वोर बेके दांतोरो, वोने टावा सेले.
12 ना मरि-मियड दात्नुर्निट!
येसु किरिस्तुना पोरोडेन मीवङ पाप्क मापि आतङ.
13 बाबुर दात्नुर्निट!
कलि गडे मायन मुनेतल मंवन मिरट करि कीतिट.
पूना-पूनि बरोसा इर्वलिर्निट!
मिरट सय्तंतुन मेय्तिट.
14 ना मरि-मियड दात्नुर्निट!
बाबो बगवंतन करि कीतिट.
बाबुर दात्नुर्निट!
कलि गडे मायन मुनेतल मंवन मिरट करि कीतिट.
पूना-पूनि बरोसा इर्वलिर्निट!
मिह्गा सक्ति मंता.
मीवङ दिल्क्नगा बगवंतना वचन जीवते मंता.
मिरट सय्तंतुन मेय्तिट.
अदेन साटिने मी सम्दिरकुन इव गोस्टिङ लिहि कीसेर मंतोन.
15-16 दुनियतुन आयि, दुनियतगा मंवडुन आयि पेर्मा किय्मट.
बारितेके दुनियते मंवल सम्दो गिर, इत्तेके मेंदोडा आसा, कड्क्ना आसा अनि पिस्वडा गर्वा-गमंडि, बाबो बगवंतनल वातङ आयोङ.
इव सम्दो दुनियतल वातङ आंदुङ.
दुनियतुन पेर्मा किय्वल, बाबो बगवंतन पेर्मा किया परोर.
17 इद दुनिया अनि तान्गटल पुट्तङ आसङ मूरे मांतङ.
बति बगवंतना इचा तीर ताक्वल बस्केट पिसंतोर.
किरिस्तुनुर पगा-दारकुन बारेते दिहंते मंट
18 ना मरि-मियड दात्नुर्निट!
इद आक्रिता गट्का आंद.
किरिस्तुनोर पगा-दारल वाय्वल मंतोर इन्जेर मोदोल केन्ज्तिट.
इंकेट्के वेलेटिर पगा-दार्क पेसितेर.
इदेन हिंदल, इदे आक्रिता गट्का इन्जेर करि कीसेर मंतट.
19 वूर मह्गटले पेसितुर आंदिर बति, मावुर आयुर.
वूर करल मावुर आय्मड इत्तेके, मह्गा उंदि आसि मंदिर.
वूर मह्गटल सोत्तेर इत्तेके, मावुर आयुर इन्जेर करि कियना.
20 बति बगवंतल, पवित्रा आत्मा मी रोपो इर्ता काड्कि, सतुन बारेते मी सम्दिरकुन टावा.
21 इद मीकुन लिहि कीसेर मंतोन.
बारितेके मिरट सतेमुन बारेते टावा सेलुर वूर आय्विट बति, टावा वालिर आंदिट.
अदे आय्वा, बदे लबड गोस्टि सत्नगटल वायो इंवल गिर मीकुन टावा.
22 ‘येसु, बचि किय्वल किरिस्तु आयोर्’ इन्जेर वेह्वले लपङि आंदुर.
वोर आतोर मायनल किरिसतुन पगा-दारल आसि, बगवंतल बाबोन अनि मरिन वोपोर.
23 बोर्ते मरिन वोपोरो, वोर बाबोन गिर वोपोर.
मरिन वोप्वल बाबोन गिर वोप्वल आंतोर.
24 मिरट मोदोडल केन्ज्तिट अदेन, मी दिल्क्नगा बस्केट इरट.
अहन इर्किट्ते, मरिन सङा अनि बाबोन सङा मिरट येकि आसि मंदंतिट.
25 इद बस्केट मंवल जीवता वाग्दन येसुये माकुन सीतोर.
26 मीकुन पसि किय्ले कोसिद किय्वलिर बारेतेन, इव गोस्टिङ लिहि कीसेर मंतोन.
27 बति बगवंतल तंवा पवित्रा आत्मा मी रोपो इर्ता काड्कि, सतेमुन बारेते मीकुन बोरे दुस्रोर बोदा किया लागो.
अद आत्मा बद करल अनि बद लबड इंवल मीकुन सम्दो करुसंता.
इद लबड आयो, सतेमे आंद.
पवित्रा आत्मा मीकुन करुस्तपिनय किरिस्तुना बक्तितगा निल्सि मंट.
बगवंतनुर मरि-मियड