1वा योहन
योहन लिहि कीता मोदोडा चिटि
जीवा वाले वचन
1
1 नना अनि ना बरोबर्तुर अपोस्तुल्क वोर वेह्नेके केन्ज्तोम.
मा कड्क्ने वोर किय्वलिक काम्क सूड्तोम.
मा केय्क्ने कुद वोन इट्तोम.
वोर कलि गडे मायन मुनेतले मंवल आंदुर.
पर्जतुन बस्केट मंवल जीवा सिय्वल अनि बगवंतना वचन वोरे आंदुर.
वोन बारेतेन मीकुन वेह्चेर मंतोम.
2 वोर बस्केट मंवल जीवा वाले, तोले बाबो बगवंतन सङा मत्तोर.
बति बगवंतल वोन माय्नना जल्मा सियुसि, मह्गा सारि कीतोर.
ममोट वोन सूड्तोम अनि वोन बारेता सतेमुन मीकुन वेह्चेर मंतोम.
3 मिरट मा बरोबर बक्तितगा उंदि आसि मन्जि, ताना अनुबव येतना इन्जेर ममोट सूड्ता अनि केन्ज्ता अदेन बारेते मीकुन वेह्चेर मंतोम.
बारितेके मरट बगवंतन सङा अनि वोनोर मरि येसु किरिस्तुन* सङा उंदि आसि पिसेर मंतट.
4 मावा आनंद बर्पुर आयना इन्जेरेन इव गोस्टिङ मीकुन लिहि कीसेर मंतोन.*
बगवंतल वेड्चि आंदुर
5 वोर वेह्ता केन्चि, मीकुन ममोट वेह्वल बतल इत्तेके, बगवंतल वेड्चि आसि मंतोर.
वोन्गा इचुर गिर सिकटि सेले.
6 ते मरट बगवंतन सङा उंदि आसि पिसेर मंतोम इन्जेर वेह्चेर सिकटितगा* ताक्तेके, मरट गिर लबड वड्क्तपे आंता.
सतेमुन पिय्सि ताक्तप आयो.
7 बति बगवंतल वेड्चिते मत्तपिनय मरट गिर वेड्चिते* ताक्तेके, बक्तितगा उंदि आसि पिसेर मंदा परंतट.
अनि वोनोर मरि येसु किरिस्तुना नेतुर मावङ सम्दो पाप्कनल माकुन सुदुड कींता.
8 मह्गा पाप सेले इन्जेर वेह्कट्ते, मावा मरट पसि कीतुर आंतट.
मह्गा सतेम मनो.
9 बति उंदि मोका मावङ पापकुन बगवंतना चर्नते वोप्तेके, वोर बरोसा वाले अनि नायम्नोर आता काड्कि, वोर मावङ पापकुन मापि कींतोर.
अनि करब काम्कनल माकुन सुदुड कींतोर.
10 मरट पाप किय्मकि इन्जेर वेह्कट्ते, बगवंतन लपङि कीतप आंता.
वोना वचन मा रोपो मनो.