बरोसा दुनियतुन मेयंता
5
1 येसुये बचि किय्वल किरिस्तु आंदुर इन्जेर नम्वलिर सम्दिर, बगवंतना मरि-मियडा लेकते वांतेर.
बूर्ते बाबोन पेर्मा कींतेरो वूर, वोनुर मरि-मियडुन गिर पेर्मते सूडंतेर.
2 मरट बगवंतन पेर्मा कीसेर, वोनङ आगेन पिय्सि ताक्ता काड्कि, वोनुर मरि-मियडुन गिर पेर्मते सूडंतट इंवल माकुन करे मांता.
3 बगवंतन पेर्मा किय्वल इत्तेके, वोनङ आगेन पिय्सि ताक्वले.
वोनङ आगेङ वजन वालेक आयोङ.
4 बारितेके बगवंतनोर मरि-मियड आय्वल हर वोरोर, दुनियतुन मेयंतोर.
मरट येसुनगा इर्ता बरोसतेन मेयंतट.
5 येसुय, बगवंतनोर मरि इन्जेर बरोसा किय्वलिर मात्रमे दुनियतुन मेयंतेर.
6 बगवंतनल दर्तुरितगा वातोर वोर येसु किरिस्तुये आंदुर.
वोर सिरिप बाप्तिस्मा येत्लेके वाय्मकि बति, येते बाप्तिस्मा येच्चि, मोद्नगा टाङि कीता पेजे नेतुर तुह्ले इन्जेर वातोर.
बगवंतना आत्मा सत्ना आता काड्कि, अद वेह्वल गवा बरोबर आंद.
7-8 मूंद गवङ मंतङ*: पवित्रा आत्मा, येर अनि नेतुर.
इव मूंदुते येसुन बारेते उंदिय गवा वेह्चेर मंतङ.
9 मरट माय्नलिर वेह्ता गवतुन वोपंतट बति, इदेन तेर बगवंतना गवा वेले डगुर आंद.
बारितेके अद गवा कुद तंवोर मरिन बारेता आंद.
10 बगवंतनोर मरिन पोरो बरोसा इर्वनगा, इद गवा मंदंता.
बगवंतन बोर्ते नंमोरो वोर, बगवंतन लपङि कीतोर आंतोर.
बारितेके तंवोर मरिन बारेते वेह्ता गवतुन वोर नंमकि.
11 बगवंतल माकुन बस्केट पिस्वल जीवतुन सीतोर.
इद जीवा तंवोर मरिनगा मंता.
इदे बगवंतना गवा आंद.
12 बूर्ते बगवंतनोर मरिनगा बरोसा इरंतेरो, वूरकुन इद जीवा पुटंता.
बूर्ते बरोसा इरुरो, वूरकुन इद जीवा पुटो.
आक्रिता गोस्टि
13 बगवंतनोर मरि येसुनगा बरोसा इर्वलिर मीकुन, बस्केट पिस्वल जीवा पुटंता.
इद गोस्टि मीकुन करे मायना इन्जेरेन इव सम्दि लिहि कीसेर मंतोन.
14 बगवंतना इचतुन पिय्सि मरट बतल तल्क्तेके गिर, वोर माकुन करलेन सींतोर इंवल टावा.
15 मरट तल्क्वल वोर केन्जंतोर इंवल टावा मत्तेके, तल्क्तङ अव माकुन पुटंतङ इन्जेर गिर टावये.
16 तम्वा सङा मंवल बक्तल मरन तरो अद पाप किय्वल सूड्तेके, वोन साटि मिरट पार्तना कियना.
अस्के बगवंतल वोर पापेस्तन पिसुसंतोर.
बति मरंतेके वोय्वल पाप* किय्वलिर साटि पार्तना कीम्ट इन्जेर वेह्चेर सेलोन.
17 बगड-नियत्ने ताक्वलिक सम्दो काम्क, पाप्के आंदुङ.
बति सम्दो पाप्क मरंतेके ताकुसोङ.
18 बगवंतना मरि-मियड आय्वलिर पाप्क कीसेर मनुर इन्जेर माकुन टावये.
बगवंतनोर मरि वूरकुन काबाड्ता काड्कि, वूर सय्तंदा केयदुन बूड मनुर.
19 मरट बगवंतनुर मरि-मियड आंदट इंवल अनि दुनियतगा मंवलिर कड्मतुर सम्दिर सय्तंदा केय्देन मंतेर इंवल गोस्टि माकुन टावये.
20 मरट सते बगवंतन करि कीनल बगवंतनोर मरि माकुन गियन सिय्ले वातोर.
अनि अदेन वोर सीतोर इन्जेर गिर माकुन टावये.
मरट वोर सतेवंतेनगा अनि वोनोर मरि येसु किरिस्तुनगा उंदि आसि मंतट.
वोरे करल बगवंतल अनि बस्केट पिस्वल जीवा आंदुर.
21 ना लाड्नुर मरि-मियड दात्नुर्निट!
मूर्तिना जोलित सोंवक्ने मीवा मिरट काबाडट.