पिलेमोन
पिलेमोंतुन लिहि कीता चिटि
दंडोस्क
1
1-2 मा सङा काम किय्वल लाड्नोर पिलेमोंतुन, अप्पिया बायिन, सिपायिन दात मंवल अर्किपुन अनि मीवा रोन मीरे माय्वल चर्चितुर* सम्दिर साटि, पव्लु इंवना इद चिटि लिहि कीसेर मंतोन.
नना अनि मा तमुन दात मंवल तिमोति, येसु किरिस्तुना चोकोट्ना कबुडुन पचर कीता काड्कि, जेलतगा अर्सि मंतोम.
3 मा बाबो बगवंतल अनि येसु किरिस्तु पर्बु मीकुन पेर्मता-दया अनि सांति सियिर!
पार्तना अनि दनेवाद
4 नना बस्केते नी साटि पार्तना कींतोनो, अस्के नी बारेते बगवंतन दनेवाद वेह्चेर मंदंतोन.
5 बारितेके, नीकुन येसु पर्बुन पोरो मंवल बरोसा अनि येसुनुर बक्तलिर पोरो तोह्वल नीवा लाड अनि पेर्मता-दयतुन बारेते नना केन्ज्तोन.
6 मरट उंदि तीर्दा बरोसतुर आता काड्कि, येसु किरिस्तुनङ सम्दि आसिर्वादकुन बारेते, नीवा गियन अद बरोसतुन हिंदल, बडे मायना इन्जेर पार्तना कींतोन.
7 ये दादा!
पवित्रा येसुनुर बक्तलिरकुन लाड्दे वेले मदत कीसि, वूरकुन आनंद सीति.
इद गोस्टि नावा दिलतुन गटि-दीर्या सीसि, वेले आनंद सीता.
ओनेसीमोन साटि विनंति किय्वल
8 निमे किय्वलिक कामकुन बारेते येसु किरिस्तुना पोरोडे हुकुम सीनल नाकुन अदिकार मंता.
9 बति वेडिल माय्ननल आय्वल पव्लुना येसु किरिसतुन साटि जेल बोगे मासेर, नीकुन पेर्मते कोर्सेर मंतोन.
10 ओनेसीमोंतुन पोरो निमे दया तोहना इन्जेर, नीकुन विनंति कीसेर मंतोन.
नना जेल्दगा अर्सि मनेके, वोर ओनेसीमोन पर्बुनोर बक्तल आता काड्कि, ना तोडो पुट्तोर मरिन दात मंतोर.
11 इदेन मुने नीकुन वेन हिंदल बतय पाय्दा पुट्मकि.
बति इंके वेन हिंदल नीकुन अनि नाकुन इविर्कुंते पाय्दा मंता.
12 पिलेमोनु!
इंके नावा तडकितुन मोडि मंवल ओनेसीमोंतुन निह्गा सारि कीसेर मंतोन.
13 निमे मोदोल नाकुन बहन मदत कीतियो, अह्ने चोकोट्ना कबुर वेह्वडुन हिंदल, जेल्दगा अर्सि मंवल नाकुन, इंके वेर ओनेसीमोन गिर मदत कियना इंवल इचा मत्ता.
14 बति नीवा हुकुम सेल्वा नना बतय किया परोन.
उंदि मोका इद चोकोट्ना मदत नाकुन कीका इंद्किते, नावा जुल्मते आय्वा नीवा इचा मत्ता तीरे कीम, इन्जेर कोर्सेर मंतोन.
15 ओनेसीमोन कहि रोज्क निह्गटल पाके मासि मत्तोर.
बस्केट गिरे स्वर्ग्नगा नी सङा मंदन साटिने, इहिन जर्ग्तयो बतलो.
16 वोर इंके सिरिप नीवोर दासि माय्नले आयो बति, किरिसतुन नम्तोर मा बरोबर्तोर लाड्नोर बक्तल आंदुर.
येसु पर्बुन हिंदल ओनेसीमोन नाकुन तेर वेले करुम्नोर आंदुर इन्जि सम्जे माम.
17 ते निमे नाकुन बगवंतना सेवतगा नी बरोबर मंवल ईसा दारन दात सम्जे माकिते, नाकुन करुम कीतपे ओनेसीमोन गिर करुम कीम.
18 वेर निह्गा बतय तप तुङ्सि मंदनुर सेलेके बतय बाकि मंदनुर्ते, नावा पोरोडे लिहि कीसि इरा.
19 ‘ननय अद बाकितुन कंडि कींतोन्’ इन्जेर पव्लु इंवना ननय इद गोस्टितुन कुद लिहि कीसेर मंतोन.
बति निमे नीवा पिस्वल पूरो जिन्गनिता नाकुन बाकि मंति इन्जेर नना हेतु किय्वल जुरत सेले.
20 अदेन साटि पर्बुन नम्तोर ना तोडो पुट्तोर तमुन दात, येसु किरिसतुन साटि नाकुन इद मदत कीसि, नावा दिल्ता इचतुन पूरि कीम.
21 नीवा मान-मर्यदतुन पोरो नाकुन बरोसा मंता.
नना तल्क्ता अदेन तेर अदिक कींति, इन्जेर नाकुन टावये.
अदेन साटिने, इद चिटि नीकुन लिहि कीसेर मंतोन.
22 उंडे उंदि गोस्टि बतल इत्तेके, वेर्तलिर साटि मंवल कम्रतुन ना साटि तयर कीसि इरा.
नीवङ पार्तनङ केन्चि, बगवंतल नाकुन निह्गा सारि किय्ले वोप्मड मंदर इन्जेर आसते सूड्सेर मंतोन.