2वा तेसलोनिका
तेसलोनिकतुरकुन लिहि कीता रेंडवा चिटि
दंडोस वेह्वल
1
1 मा बाबो बगवंतनगा अनि येसु किरिस्तु पर्बुनगा बरोसा इर्सि ताक्वलिर तेसलोनिका चर्चितुर साटि पव्लु, सीलल अनि तिमोति इंवलिर इद चिटि लिहि कीसेर मंतोम.
2 मा बाबो बगवंतल अनि येसु किरिस्तु पर्बु मीकुन पेर्मता-दया अनि सांति सियिर.
किरिस्तु मल्सि वाता पेजे बगवंतल तस्वा किय्वल
3 मावुर दादलिर-बायिक्निट!
मीवा बरोसा वेले चोकोट बडे मासेर मंता.
अनि मिरट वोरोन वोरोर वेले पेर्मते सूड्सेर मंतिट.
इदेन हिंदल मी बारेते बगवंतन बस्केट दनेवाद वेह्चेर मंदंतोम.
4 बारितेके मीकुन वाय्वलिक दुक्सन अनि तक्लिबकुन वोर्चेर बरोसते ताक्सेर मंतिट.
अवेन बारेते मीकुन डगुर-पान सीसेर बगवंतनुर चर्चिनुर्गा वेह्चेर मंतोम.
5 इंके मिरट बगवंतना राजुन साटिने दुक्सङ बोगे मासेर मंतिट.
मिरट बगवंतना राज्नगा नेङ्ले कामि सिय्वलिरा लेकते वांतिट.
बगवंतल नाय्दे तस्वा कींतोर इंवडुन इद निसनित मोडि मंता.
6 बगवंतल, मीकुन दुक्सा सिय्वलिरकुन वूर दगट्ना सिक्सा सिय्वल नायम आंद.
7 येसु पर्बु तंवुर सक्ति वालिर दूतलिर सङा स्वर्गनल वाता पेजे, दुक्सङ बोगे माय्वलिर मीकुन अनि माकुन बगवंतल आरम सींतोर.
8 बगवंतन करि कियुर वूरकुन अनि मा येसु पर्बुना चोकोट्ना कबुडुन वोपुर वूरकुन पोत्वल तड्मितगा सिक्सा सींतोर.
9-10 पर्बु वाय्वल दिवोसुन नेटि, वूर पर्बुना चर्नतल अनि वोना मय्मता सक्तितल पाके मासि, बस्केट नासेडम इंवल सिक्सा बोगे मांतेर.
बति वोन्गा बरोसा किय्वलिर हिंदल वोन मय्मा अनि डगुर-पान पुटंता.
इदेन मुने वोन बारेते ममोट वेह्ता गवतगा मिरट बरोसा इर्ता काड्कि, वूर मय्मा सिय्वलिरा लेकतगा मिरट गिर वांतिट.
11-12 अदेन साटि बगवंतल मीकुन बततुन लासि केय्तोरो, अदेन मिरट किया परना इन्जेर, ममोट बगवंतन रोजि मी साटि पार्तना कीसेर मंतोम.
अदे आय्वा, मिरट चोकोट कियना इन्जेर सोन्च किय्वल हर उंदि आसतुन, अनि बरोसते मिरट किय्वल हर उंदि कामुन, बगवंतल तंवा सक्तिते पूरि कियना इन्जेर गिर पार्तना कीसेर मंतोम.
मी हिंदल, मावोर येसु किरिस्तु पर्बुन मय्मा वायना, अनि मीकुन पर्बुना मय्मतगा ईसा पुटना इन्जेर गिर, पार्तना कीसेर मंतोम.
इद काम बगवंतना अनि येसु किरिस्तु पर्बुना पेर्मता-दयतेन जर्गंता.