पूना जिन्गनित साटि नियम्क
3
1-2 बगवंतल किरिसतुन बहंते नेंडुस्तोरो, अह्ने वोन्गा बरोसा इर्ता पेजे, मीकुन गिर वोन बरोबर नेंडुस्तोर.
+ अनि वोर किरिस्तु बगवंतना तिना बग्ला* राजा-गादितगा उच्चि मंतोर.
अदेन साटि, स्वर्ग्नङ गोस्टिन बारेतेन पर्पेडे माम्ट बति, दर्तुरित पोरोडङ गोस्टिन बारेते रंदि किय्मट.
3 बारितेके, पडना जिन्गनित पिय्सि मीवा मरन आता.
अनि इंके, मीवा पूना जिन्गनि किरिसतुन सङा बगवंतनगा राकि कीसि मंता.
4 बस्केते पूना जिन्गनि सिय्वल किरिस्तु दिसंतोरो, अस्के मिरट वोन सङा दिसि, वोना मय्मतगा ईसा येतंतिट.
5 अदेन साटि, मीवा मेंदोडगा मंवल पाप्ना गुंतुन जक्सि वाटट.
पीर किय्वल, बे-सुदुड ताक्वल, कड वाट्सि इर्वल अनि करेबलिक आसङ इंवलिक, इव सम्दोन बर्पुर सुटि कियना.
अनि बद सूडा नाके पह्जे इंवल गुन गिर सुटि कियना.
बारितेके, इद उंदि तरिकते मूर्तिना पूजा कीता लेकते वांता.
6 इवेन पिय्सि ताक्वलिर पोरो बगवंतना सोङ रेयंता.
7 मीवा पडना जिन्गनितगा मिरट गिर इव गुनकुन पिय्सि ताक्सेर मत्तिट.
8 बति इंके, मिरट सोङ, सिर्डियल गुन, करब किय्वल, चह्डिङ अनि चेच्रलिक गोस्टिङ वड्क्वल इंवलिक, इव सम्दो गुनकुन सुटि कियना.
9 वोरोन सङा वोरोर लबड वड्क्मट.
बारितेके, मीवा पडना जिन्गनितङ गुन्क सुटि कीतिट.
10 अनि मीकुन पूना जिन्गनि पुड्ता.
कलि गडि किय्वल बगवंतना गुन-गांतुन पिय्सि, तनकुन बर्पुर करि किय्ले, तंवा मोडि मीवा पूना जिन्गनितुन तयर कीसेर मंतोर.
11 इहिन तयर किय्वडगा दुस्रोक जातिनुर* सेलेके यूदुल्क्ना जातितुर इंवल तेडा सेले.
तोल कत्रि कियुस्तुर सेलेके कियुस्मकि वूर इंवल तेडा सेले.
करितुर वूर सेलेके करिमकि वूर मुसपरिर* इंवल तेडा सेले.
दासिर सेलेके माल्कलिर इंवल तेडा सेले.
इव सम्दो बेद-बाव्क बवे मुके आयोङ बति, सिरिप मा सम्दिर रोपो मंवल किरिस्तुये मुके आंदुर.
12 बगवंतल मीकुन लाड कीसि, तंवुर पवित्रा वालिर इन्जेर नेमि कीतोर.
अदेन साटि, किवुल वाय्वल मन, दया, चुडुर-पान, सादु-पान अनि वोर्चि ताक्वल इंवलिक ईतङ सम्दो गुनकुन पिय्सि ताकट.
13 हेतु इरट!
पर्बु मीकुन मापि कीता काड्कि, पेर्मते वोरोनङ वोरोर तपकुन मापि कीम्ट.
मिह्गटल बोरे आयि तप कीतेके गिर, वोर्चि ताक्सेर, वोन मापि कीम्ट.
14 इवे आय्वा, पेर्मते गिर ताकट.
इद पेर्मा सम्दिरकुन बर्पुर येकि कीसि इर्ले, कामि सींता.
15 मीवङ दिलकुन तना सिय्वल सांतिते किरिस्तु ताकुसियिर.
इदेन साटिने, मीकुन उंदि मेंदोडगा येकि आसि मंले, बगवंतल केय्तोर.
ते वोन दनेवाद वेह्चेर मंट.
16 किरिस्तुना वचन मी रोपो बर्पुर मंदा सीम्ट.
मीवा पूरो बुदि-गियंतुन वाप्रि कीसि, वोरोन वोरोर करुसेर, सुद्रि कीम्ट.
बगवंतना वचंतङ कीर्तन्क, बगवंतन डगुर-पान सिय्वलिक बजन्क, बगवंतना आत्मा मीवा दिलतगा सिय्वलिक बाव-बक्तितङ पाटङ वार्सेर, बगवंतन दनेवाद वेह्चेर मंट.
17 अचोरे आय्वा गोस्टितेन आयि, काम कीसि तोह्वडेन आयि, मिरट बतल कीतेके गिर बति, येसु पर्बुना पोरोडेन कीम्ट.
वोन हिंदल बाबो बगवंतन दनेवाद वेह्चेर मंट.
किरिस्तुना कुटुंबतुर मंवल तरिका
18 ये, मर्मिङ आतङ बायिक्निट!
मी माड्सुर वेह्ता तीर ताकट.
पर्बुनगा बरोसा इर्वलिर इहिन ताक्वल बरोबर आंद.
19 ये, मर्मिङ आतुर दादलिर्निट!
मीवङ वेय्लोकुन दुक्सा लागनल ताक्मट बति, अवेन पेर्मते सूडट.
20 ये, मरि-मियड्निट!
हर उंदि गोस्टितगा मीवुर अवल-बाबो वेह्ता तीर ताकट.
इहिन मीवा ताक्वल पर्बुन आनंद सींता.
21 ये, अवल-बाबुर्निट!
मी मरि-मियडुन किचा किचा लागनल किय्मट.
बारितेके वूरङ दिलकुन दुक्सा लागंता.
22 ये, दासिर आय्वलिर दादलिर-बायिक्निट!
दुनियतगा मंवलिर मी माल्कलिर मीकुन मेचना इन्जेर वूर सूड्नेकेन आय्वा, हर गट्का गिर वूर वेह्ता तीर सम्दो कियना.
मिरट पर्बुन मानि कीता काड्कि, नमकम्ने काम्क कीसेर मंदना.
23-24 मिरट बद काम कीतेके गिर बति, बर्पुर दिल्ते कियना.
बारितेके, मिरट सिरिप माय्नलिरा सेवा कीसेर सेल्विट बति, पर्बु आय्वल किरिस्तुना सेवा कीसेर मंतिट.
अनि वोना पर्जा आय्वल मीकुन, वोर पर्बुनले ईसता पंडि पुटंता इंवल टावा.
25 वोर पर्बु बोने बेद-बाव्ते सूडोर.
अदेन साटि, तप कीतोर वोना तपुन पिय्सि, तप्वक सिक्सा पुटंता.