पिलिपि
पिलिपितुरकुन लिहि कीता चिटि
दंडोस्क
1
1 पिलिपि नगुडे मंवल चर्चितुर अदिकारकुन, अगा मदत किय्वलिरकुन अनि मेय्तुर बक्तलिरकुन पव्लु इंवना इद चिटि लिहि कीसेर मंतोन.
मा येसु किरिस्तुनुर दासिर आय्वलिर नना अनि तिमोतिना मीकुन दंडोस दोसि, इद चिटि रोह्चेर मंतोम.
2 मा बाबो बगवंतल अनि येसु किरिस्तु पर्बु मीकुन पेर्मता-दया अनि सांति सियिर!
पव्लुना दनेवाद अनि पार्तना
3-5 नना मीकुन चोकोट्ना कबुर वेह्तोन.
अद केन्चि बरोसा इर्तिट अंटितल, इद कबुडुन पचर किय्ले, मिरट नाकुन मदत कीसेर मंतिट.
अदेन साटि नावा मंदगा बस्के-बस्केते मीवा गोस्टि हेतु वांतयो, अस्के मी सम्दिर साटि आनंद्ने पार्तना कीसेर, मी बारेते मा बगवंतन दनेवाद वेह्चेर मंतोन.
6 इद चोकोट्ना कामुन मी नड्डुम बगवंतले सुरु कीतोर.
येसु किरिस्तु मल्सि वानल वेरि, बगवंतल इद कामुन महनल सुटि कियोर इंवल, नाकुन बर्पुर बरोसा मंता.
7 मोदोल नना चोकोट्ना कबुडुन वेह्चेर, अद सतेम आंद इन्जेर निरुपन कीसि तोह्चेर मनेके अनि इंके जेल्दगा मनेके गिर मिरट इद काम्नगा ना बरोबर ईसा येत्तिट.
इदेन हिंदल मिरट ना दिलतगा मत्ता काड्कि, इहिन नना मी बारेते सोन्च किय्वल बरोबर आंद.
8 येसु किरिस्तु मीकुन लाड कीता तीरे, नावा दिलतगा गिर मीकुन सूडना इन्जेर जीवा आसेर मंता इंवडुन बगवंतले गवा मंतोर.
9 मी बारेते ना पार्तना बतल इत्तेके:
मिरट बगवंतन बारेता सत्ना गियंते वोरोन वोरोर पेर्मा तोह्वडगा अनि चोकोट्नङ काम्क किय्ले, अद गियंतुन वाप्रि किय्वडगा वेले बडे मायना.
10 अस्के बद असल इंवल करि कीसि, अदेन किया परंतिट.
अद तीर्दे किरिस्तु मल्सि वाय्वल दिवोसुन नेटि, मिरट दिलतगा बर्पुर सुदुड आसि, बे-कसुर वालिर आसि, मंदा परंतिट.
11 मी रोपो येसु किरिस्तु मत्ता काड्कि, मिरट नियत्नङ काम्क कीसेरेन मंदना.
इदेन हिंदल, बगवंतना पोरोल अनि डगुर-पान बडे मांता.
किरिस्तुना कबुर पचर आता काड्कि, पव्लु आनंद येत्वल
12 दादलिर-बायिक्निट!
नाकुन जर्ग्तङ करब्नङ गट्नङ सम्दो चोकोट्ना कबुर उंडे अदिक पग्रे माय्लेके जर्ग्तङ इन्जेर, मिरट करि कियना इंवले नावा आसा.
13 बहन इत्तेके, नना किरिसतुन हिंदले हात्कडिङ अर्सि, सिक्सा बोगे मासेर मंतोन इंवल, राज महलतुन केप्वलिर्कुन* अनि मेय्तुर सम्दिरकुन गिर करे माता.
14 इहिन जेल्दगा मंवडुन हिंदल, बगवंतना वचन दुस्रुरकुन वेरिवक्ने वेह्ले, पर्बुनगा बरोसा इर्वलिर दादलिर-बायिकुन गटि-दीर्या वाता.
15-17 इहिन कहितुर किरिसतुन पेर्मा किय्वडुन हिंदल, चोकोट्ना कबुर सतेम आंद इन्जेर निरुपन किय्ले, नेमे मातोम इन्जेर करि कीसि, पेर्मते अनि चोकोट-पांदे अद कबुडुन पचर कीसेर मंतेर.
बति उंडे कहितुर नना हात्कडिने कोंडे मासि मनेके, ना पोरो पगा अनि कुटा कुटा आसि, उंडे अदिक दुक्सा सियना इन्जेर किरिसतुन बारेते पचर कीसेर मंतेर.
18 बहन कीतेके गिर बतय आयो.
बारितेके चोकोट पांदेन आयि, कपट्नेन आयि किरिस्तुना कबुर मात्रम पचर आसेर मंता.
अदेन साटि नाकुन आनंद लाग्सेर मंता.
हो!
नना उंडे मुने गिर आनंद येतंतोन.
19 बारितेके मीवङ पार्तनना अनि येसु किरिस्तुना आत्मता बर्पुर मदतुन हिंदल, नाकुन चोकोट जर्गंता* इंवल टावा.
20 नना बर्पुर दर्यम्ने नावा पिस्वडुन हिंदले आयि, सावदुन हिंदले आयि, लजे माय्वल जुरत सेले.
इदेन बद्लि, इद नावा मेंदोडगा बस्केट किरिसतुन डगुर-पान वायना इन्जेर आसते सूड्सेर मंदंतोन.
21 बारितेके नना पिस्वल किरिसतुन साटिने, अनि नना साकते नाकुन उंडे अदिक पाय्दा मंता.
अद बतल इत्तेके, येसुन सङा बस्केट मंदंतोन.
22 बति नना उंडे पिसिन मंद्कते, येसु किरिस्तुना सेवा उंडे अदिक किया परंतोन.
अदेन साटि इव रंडुनगा बदेन आचनयो नाके टावा सेले.
23 नना इव रंड आसन हिंदल तकपिका आसेर मंतोन.
उंदि तीर्दे सूड्तेके इद मेंदोडुन सुटि कीसि, किरिस्तुना चर्नते मंदना इंवल आसा, मंदे पुटंता.
इदे सम्दिन चोकोट्ना आंद.
24 बति उंडे उंदि तीर्दे सूड्तेके, नना मी साटि इहिन पिसि मंवल वेले जुरत मंता.
25 ते इदेन हिंदल, किरिस्तुनगा मंवल मीवा बरोसा अनि आनंद बडे माय्ले, मी बरोबर पिसि मंदंतोन इंवल नाकुन वोड्कि आता.
26 ते नना मिह्गा मल्सि वाय्वल सूड्सि, येसु किरिस्तु नाकुन बचि कीतोर इन्जेर वोन डगुर-पान सींतिट.
किरिसतुन डगुर-पान तर्वलिर मोडि पिसट
27 नाकुन बतल बहन जर्ग्तेके गिर बति, मिरट किरिस्तुना चोकोट्ना कबुडुन डगुर-पान तरनल पिसट.
नना मिह्गा वातेके सेलेके वाय्वेके गिर बति, मिरट सम्दिर उंदि मंदे, उंदि आत्मते, बोने वेरिवक्ने चोकोट्ना कबुडुन निरुपन कीसेर, बरोसतगा गट निल्सेर मंतिट इंवल नना केन्जना.
28 मिरट इहिन पिस्किट्ते, ‘बगवंतल तप्वक वूरकुन बचि कींतोर अनि माकुन नासेडम कींतोर्’ इंवल गोस्टि मीवुर पगा-दार्क करि कींतेर.
29 बगवंतना दयते किरिस्तुनगा बरोसा इर्वल मोकय आय्वा, वोन साटि दुक्सङ बोगे माय्वल मोका गिर सीतोर इंवल मिरट हेतु कियना.
30 इदेन मुने, नना इव दुक्सन बहन बोगे मातोन अनि इंके गिर अव दुक्सन नड्डुम बहन मंतोन इंवल मिरट सूड्तिट.
मिरट गिर अह्ने दुक्सङ बोगे मासेर मंतिट.