येसु येड्विर सिस्यलिरकुन दिस्वल
21
1 अद आता पेजे, येसु उंडे उंदि जोका गलिलया सम्दुर्ता* डर्डितगा सिस्यलिरकुन इद तरिकते दिस्तोर:
2 सीमोन-पेतुरु, येमल इंवल तोमल, गलिलया येरियता काना चहर्तोर नतनियेल, जेबेदयिनुर मर्क अनि येसुनुर सिस्यलिर्गटल उंडे इविर मीरे मासि मत्तेर.
3 अस्के सीमोन-पेतुरु, “नना मीन्क पिय्ले दांतोन” इन्जेर वूरकुन वेह्तोर.
ते वूर, “ममोट गिर नी सङा वांतोम” इन्जेर इत्तेर.
अनि सोन्जि रूकतगा उद्तेर बति, अद रातुन वूर बतङे पिय्मकि.
4 पोड्द पेसिनेके, येसु डर्डिते निल्सि मत्तोर बति, वूर सिस्यलिर वोन वोड्के माय्मकि.
5 अस्के येसु, “दादलिर्निट!
तिंले मीन्क पिय्तिट कि?”
इन्जेर पूसि कीतोर.
ते वूर “पिय्मकि” इन्जेर वेह्तेर.
6
जारतगा वेले मीन्क अर्वल
अस्के मीन्क अरंतङ” इन्जेर वेह्तोर.
ते वोर वेह्ता तीर जार वाड्तेर.
अस्के बेय वेले मीन्क अर्तङ.
ते अद जारदुन रूकत पोरो तहा पर्मकि.
7 अस्के येसु लाड किय्वल सिस्यल, “वोर पर्बु आंदुर!”
इन्जेर पेतुरतुन वेह्तोर.
ते अद गोस्टि केन्ज्ता बरोबर, वोर डूंड्कोला मत्ता काड्कि, आङ्डे केर्तोर अनि डर्डिते सोंले सम्दुरतगा डेय्तोर.
8 मेय्तुर सिस्यलिर डर्डितल रंड नुह्क (200) कूटङ लङ मत्ता काड्कि, मीन्क अर्सि मंवल जार ऊम्सेर अदे रूकते वातेर.
9 रूका डर्डिते येव्ता पेजे, वूर रेय्तेर.
अस्के वूरकुन इचुङ सारिङ अनि गोकन पोरो वाट्सि मंवलिक मीन्क दिस्तङ.
10 अस्के येसु, “मिरट इंके पिय्तङ मीन्क्नगटल इचुङ पिय्सि वरट” इन्जेर इत्तोर.
11 ते सीमोन-पेतुरु रूकतगा सोन्जि, नोडे पिय्सि येतल जारदुन डर्डिते ऊम्तोर.
अद जार नूटा पनस मूंद (153) डगुक मीन्क्ने निन्चि मत्ता.
तेर बति अद जार सर्मकि.
12 अस्के येसु, “वासि तिंट!”
इन्जेर सिस्यलिरकुन केय्तोर.
ते वोर पर्बु इन्जि करे माता काड्कि, ‘निमे बोनि आंदि?’
इन्जेर बोरे वोन पूसि किय्मकि.
13 ते येसु सारिङ अनि मीन्क वूरकुन तूसि सीतोर.
14 येसु सासि-नेंड्ता पेजे सिस्यलिरकुन दिस्वल इद मूडवा जोका आंद.
पेतुर्ता बह्के माता बरोसतुन येसु सुद्रि किय्वल
15 वूरा तिंवल आता पेजे येसु, “योहंतोर मरि सीमोन!
वीर्गटल तेर अदिक नाकुन पेर्मा कींति कि?”
इन्जेर सीमोन-पेतुरतुन पूसि कीतोर.
ते “हो पर्बु!
नना पेर्मा कींतोन इन्जि नीकुन टावये” इन्जेर पेतुरु इत्तोर.
ते येसु, “ना गोरे पिलना चोकोट-वायुट सूडा”+ इन्जेर वेह्तोर.
16 उंडे उंदि जोका येसु, “योहंतोर मरि सीमोन!
नाकुन करल पेर्मा कींति कि?”
इन्जेर पूसि कीतोर.
ते, “हो पर्बु!
नना पेर्मा कींतोन इन्जि नीकुन टावये” इन्जेर पेतुरु इत्तोर.
ते येसु, “ना गोरेना चोकोट-वायुट सूडा” इन्जेर वेह्तोर.
17 मूडवा जोका येसु, “योहंतोर मरि सीमोन!
नाकुन करल पेर्मा कींति कि?”
इन्जेर पूसि कीतोर.
‘नाकुन पेर्मा कींति कि?’
इन्जेर मूडवा जोका पूसि कीता काड्कि, पेतुरु दुक्सते, “हो पर्बु!
मीकुन सम्दि टावये.
नना नीकुन पेर्मा कींतोन इन्जेर गिर टावये” इन्जेर इत्तोर.
ते येसु, “ना गोरेना चोकोट-वायुट सूडा” इन्जेर पेतुरतुन वेह्तोर.
18 अनि “इद सतेम आंद.
डियोनि मनेके नीवा निमे नडि आव्रि कीसि, नीकुन पसंद वाता जागतगा दांति.
बति बुडियनि आता पेजे, निमे केय्क चह्चि मनेके, उंडे वोरोर नीकुन दोह्चि, पसंद सेले अद जागते वोंतोर” इन्जेर येसु वेह्तोर.
19 पेतुरु बातल मरन आसि, बगवंतन मय्मा तरंतोर इंवल तोह्ले, येसु इहिन वेह्तोर.
अहन वेह्ता पेजे, “ना बक्ति पिय्सि ताका” इन्जेर इत्तोर.
20 पस्का सड्दा जेवुन कीनेके, पर्बुनगा उंडे इचुर करुम उर्न्गे मासेर, ‘पर्बु!
वोर बोर आंदुर?’
इन्जेर पूसि कीतोर वोर, येसु लाड किय्वल सिस्यल, तम्वा पेजेय वासेर पेतुरतुन दिस्तोर.
21 ते वोन सूड्सि पेतुरु, “पर्बु!
वेन बतल जर्गंता?”
इन्जेर येसुन पूसि कीतोर.
22 ते येसु, “नना उंदुंदि जोका वानल वेरि, वोर मंवल नाकुन पसंद मत्तेके, वोन बारेते नीक बतल आयि.
सिरिप निमे ना बक्ति पिय्सि ताका” इन्जेर पेतुरतुन वेह्तोर.
23 अदेन हिंदल, वोर सिस्यना मरन आयो इंवल गोस्टि बक्तलिर नड्डुम कप्ता.
बति येसु लाड किय्वल सिस्यन बारेते, अहन वेह्मकि.
सिरिप, “नना उंदुंदि जोका वानल वेरि, वोर मंवल नाकुन पसंद मत्तेके, वोन बारेते नीक बतल आयि” इन्जेर वेह्तोर.
आक्रिता गोस्टि