बगवंतना हुकुमुन योनल वोप्वल
3
1-2 अस्के बगवंतना वचन उंदुंदि जोका, “निमे तेच्चि निनेवा इंवल मुके नगुडे सोन्जि, नन नीकुन वेह्ता कबुडुन अगा पचर कीम” इन्जेर योनन केन्जा वाता.
3 अदेन साटि योनल तेच्चि, बगवंतल हुकुम सीता तीर निनेवा नगुडे सोत्तोर.
बगवंतल हुकुम सीता तीर योनल निनेवा नगुडे सोंवल
4 योनल अद निनेवा नगुडुन रोपो नेङ्सि, उंदि दिया ताकनचोर लक ताक्सि, “उंडे (40) चालिस रोज्क्ने इद नगुर सते नास आंता” इन्जेर पचर कीतोर.
निनेवा नगुडेर लोकुर चुक चुके माय्वल
5 ते निनेवा नगुडेर योनल वेह्ता बगवंतना गोस्टित पोरो बरोसा इर्सि, उपस मंवल दिनम टरि कीतेर.
गरिब-हरिब्ना, बेद-बाव सेल्वक सम्दिरे पापनल मल्तोम इन्जि, तोहन साटि पोतेङ* गूंडि कीतेर.
निनेवा नगुडेर लोकुर पापनल चुक चुके माय्वल
6 अद निनेवा नगुडोर राजल केन्चि तना गिर कचुरितल रेय्सि तना पोंड्सि मत्ता अद राजलिर पोंड्वल कप्डि कुडुसीतोर अनि पोते गूंडि कीसि नीरदुन पोरो उत्तोर.*
7-9 उत्ता पेजे निनेवा नगुडोर राजल, “नना अनि नावुर मंत्रिर इहिन निर्नय येत्तोम: ममोट सम्दिर अनि जंवर गिर उपसे मंदना.
इत्तेके वेय्लो-मायनल अनि डोर-जंवर बतङे तिंवा उंवा.
सम्दिरे तमो किय्वलिक करब काम्क सुटि कीसि, तमो जुल्मते कियुस्वलिकुन मर्न्गा लागर.
वेय्लो-माय्नलिर पोतेङ गूंडि किया लागर अनि जंवरकुन पोरो गिर पोतेङ वाटा लागर.
माय्नलिर सम्दिरे तम्वा तन-मंदे पूरो बगवंतन विंति कियना.
इहिन मरट कीतेके मोका बगवंल तनकुन वाता वेले सोङुन कमि कीसि मा पोरो दया तोह्चि माकुन नासेडम किय्वक दानुर” इन्जेर हवल दारलिर सङा निनेवा नगुडे वेहुसीतोर.
निनेवा नगुडोर राजल कचुरितगा मंवल
10 अद निनेवा नगुडेर तम्वङ करब कामकुन सुटि कीतेर.
अद सूड्सि बगवंतल मन मार्युसीसि मुने वेह्तपिनय वूरकुन नासेडम किय्मकि.