योनन दुक्सा लाग्वल
4
1-2 इद सूड्सि योनन बेय दुक्सा लाग्ता अनि सोङ आतोर.
ते इहिन पार्तना कीतोर: “ये बगवंता!
निमे दया अनि दिल-दार्तोर बगवंतनि आंदि.
अनि सोङुन वाय्वक पेर्मा किय्वनि आंदि इन्जेर टावय. अदेन साटि वूरकुन नासेडम किय्वक मापि कींति इन्जेर गिर नाकुन टावय. ना देस्ने मनेकेन नना इहिन आयर इन्जेर सोन्च कीसि, निनेवा नगुडुन बद्लि तार्सिस सोंले पेसितोन.
3 ये बगवंता!
नाकुन जका. बारितेके नना वूरकुन वेह्तपिनय जर्ग्सेर सेले. अदेन साटि पिस्वडुन तेर सातय नयम” इन्जेर बगवंतन विनंति कीतोर.
4 अद केन्चि बगवंतल “नना वूरकुन नासेडम किय्मकि इन्जि निमे सोङुन वाय्मा” इन्जेर वेह्तोर.
योनल मंडा वाट्सि, अद दड्मिते उद्वल
वेलि अनि पुडि
5 अस्के योनल अद नगुडा सिडयिङ बाज्नेके सोन्जि, अगा उंदि मंडा वाट्सि, “नगुडुन बतल बहन आंतयो सूड्का” इन्जेर अद दड्मिते उत्तोर.
6 बगवंतल योनन वाता दुक्सा कमि कियन साटि योनना तलत पोरो दड्मि सीनल उंदि वेलितुन पिरुसि बेर्सुसीतोर.
अद वेलितुन सूड्सि योनल बेय कुसि आतोर.
7 बति दुस्रो नेटि बय-बय आनेके बगवंतल उंदि पुडित तयर इर्सि मत्तोर.
ते अद पुडि वेलितुन कत्रि कीता.
अस्के अद वेलि वार जूर्ता.
8 कडक येद्दि तेर्नेके कास्ता वडि गिर सिडयिङ रोह्तोर.
योनना तलदुन येद्दि लाक्ता.
योनल कडक येदिते बेवोस आय्वल
9 अस्के बगवंतल, “इद वेलितुन हिंदल गिर निमे बारि सोङुन वाति?”
इन्जेर योनन पूसि कीतोर. ते योनल “हो! नाकुन सायना अचोर सोङ वाता” इत्तोर.
10 बति बगवंतल “निमे कस्टम किय्मकि अनि अद वेलितुन पोसि गिर किय्मकि.
उंदि रात्ने पुट्सि बेर्सि उंदि दिहतेन वार जूर्ता इद वेलितुने रंदि कीसेर मंति.
11 ते, तप-वोप करे मायो वूर उंदि लाक वीसा हजरकुन तेर अदिक मांदि अनि सम्दि डोर-जंवर्क्ने मंवल निनेवा इंवल मुके नगुडा गोस्टितुन बारेते, नना बचोर रंदि दोसा लागर?” इन्जेर योनन सङा इत्तोर.