योनल बगवंतन पार्तना किय्वल
2
1 अद मींदुन रोपोडल योनल तंवोर बगवंतन इहिन पार्तना कीतोर,
2 “नना इद डगुर गंडम्ने मनेके, नीकुन पार्तना कीतोन.
निमेय नाकुन जवब सीति.
नावा जीवा सोन्जेर मनेके नना नीकुन विनंति कीतोन.
ते निमे नावा विनंतितुन केन्ज्ति.
3 निमे नाकुन कोल सम्दुर्ता अड्ग्नगा वाटुस्ति.
हेल्वङ सिर्मुट आसि, नाकुन नीवङ येतङ बोव्रिङ मुडुस्तङ.
4 ‘नीवा चर्नतल नना टूटे मासि गिरे, नीवा पवित्रा मंदिर्तेके मल्सि सूड्का’ इन्जेर सोन्च कीतोन.
5 नाकुन नेस्का वाय्वक सम्दुर्ता येर गेर-पासि मुच्ता.
सम्दुर्ता जाडि ना तलदगा सिर्मुट गूंडे माता.
6 नना बस्केट्के पोरो वाय्वक्ने दर्तुरि तंवङ कावक केह्ता.
सम्दुर्तङ गुटना अड्गुन बूड रेय्सि मंतोन इन्जि मत्तोन.
बति ना बगवंता येहोवा निमे, नावा जीवतुन मरंतल पिसुसीति.
7 नावा जीवा बेवोस आनेके नना नीकुन हेतु कीतोन.
नीवा पवित्रा मंदिरतगा ना विनंति येव्ता.
8 काम सियोङ अव मूर्तिना बक्ति किय्वलिर नीवा पेर्मता-दयतुन तम्वा केय्दे सोडुसंतेर.
9 बति नना नीवा डगुर पांदा पाटा वार्सेर, नीकुन मोक कंडि कींतोन.
नन काल कर्ता मोकुन कंडि किय्वक्ने सोनोन.
निमेय बचि किय्वनि आंदि”
इन्जेर बगवंतन पार्तना कीतोर.
10 अस्के बगवंतल अद मींदुन हुकुम सीतोर.
ते अद मीन योनन डर्डिते कक्सि वाड्ता.
मीन योनन डर्डिते कक्सि वाट्वल