योना
योनन बगवंतना हुकुम केन्जा वाय्वल
1
1-2 तोले बगवंतना वचन अमितयिनोर मरि योनन पावे मासि, “निनेवा इंवल मुके नगुडेरा पाप जास्ति आय्वल नना सूड्तोन.
योना निमे तेच्चि अगा सोन्जि, ‘बगवंतल इद नगुडुन नासेडम किय्वल मंतोर’ इन्जि, वूरकुन पचर कीसि वेहा” इन्जेर हुकुम सीतोर.
3 बति योनल बगवंतना हुकुमुन कात्रि किय्वक्ने वोना चर्नतल परर आयना इन्जि, उर्पटा योप्पेकु चहर्दे सोत्तोर. अनि तार्सिस्ने* सोंवल डगुर रूकतुन सूड्सि, टिकिट येच्चि पेसितोर.
वडि-दूंदडे रूका कोंडे माय्वल
4 अस्के बगवंतल सम्दुरतुन पोरो डगुर वडि-दूंदड वायुसीतोर.
अद वडि-दूंदडे बेय डगुर तुपान तेत्ता.
अदेन हिंदल रूका टुक्डेङ आसि, सोंवल गति वाता.
योनल बगवंतन कात्रि किय्वक्ने तार्सिस नगुडे पेसिवल
5 रूका ताकुस्वलिर सम्दिरे बेय वेरिसि, तम्वङ पेनकुन हेतु कीसेर किलितेर.
वूर रूकत हल्को कियना इन्जि, रूकते वोसेर मंवलिक चीजकुन सम्दुरतगा वाडि सीतेर.
अदेन मुनेने योनल रूकता बूड्ना अंतरतगा सोन्जि, बेय नरुम्सेर मत्तोर.
6 ते रूकतोर केप्टेन वोन्गा सोन्जि, “रेय जोप्लिया!
नीकुन इंके बहन जोप पिय्ता? निमे तेच्चि, नी पेंदुन हेतु कीम. मोका अद पेंतेर दया तोह्तेके, मरट मुडुङ्वक्ने पिसा परंतट” इन्जेर योनन सङा इत्तोर.
वडि-दूंदड वायन साटि कारन
7 अस्के रूका ताकुस्वलिर तम्वा तमा, “मरट चिटिङ वाट्सि, इद गंडम बोन हिंदल वातयो करि कीकट” इन्जि, चिटिङ वाड्तेके चिटितगा योनना पोरोल पेसिता.
8 ते वूर, “नी हिंदले इद गंडम वाता? निमे बतल काम कींति? निमे बगटल वाति? नीवा बद देस आंद? नीवा बद जाति आंद? इव सम्दो माकुन वेहा” इन्जेर पूसि कीतेर.
9-10 अस्के वोर, “नना हेब्रि जातितोना आंदुन.
सम्दुरतुन अनि बोमितुन गडि कीतोर, वोर स्वर्ग्नगा मंवल बगवंतना बक्ति किय्वना आंदुन.
बगवंतना हुकुमुन कात्रि किय्वक दुस्रो बाज सोन्जेर मंतोन” इन्जेर वूरकुन वेह्तोर.
ते वूर उंडे अदिक वेरिसि, “निमे इहिन बारि कीति?” इन्जेर पूसि कीतेर.
11 अद वकत्ने सम्दुर्तङ हेल्वङ वडि-दूंदडे बडे मासेर मत्तङ.
* योनन सङा वूर, “इंके अव सिम-सम दबे मायना इत्तेके, नी साटि ममोट बतल कियनयो वेहा” इन्जेर पूसि कीतेर.
12 ते “नना कीता तपुन हिंदले, इद वडि-दूंदड वाता.
अदेन साटि नाकुन तह्चि, सम्दुरतगा वाटट.
अस्के सम्दुर सांत आंता” इन्जेर वेह्तोर.
13 तेर बति वूर रूकतुन डर्डिते तर्ले बेय कोसिद कीतेर.
बति वडि-दूंदडे सम्दुर्तङ हेल्वङ बडे माय्वल कीनेके, रूकतुन डर्डिते तरा पर्मकि.
योनन सम्दुर्ता येतगा तह्चि वाट्वल
14 अदेन साटि वूर, “ये बगवंता!
मा विंति केन्जा! निमेय इद गंडम वायुसीति. वेर मायनल बतय तप किय्मकि. तेर बति वेना परन टेंडंतोम. इदेन हिंदल मा पोरो कसुर वाट्मा” इन्जेर किलिसेर,
15 योनन तह्चि सम्दुरतगा वाट्तेर.
वाट्नेकेने सम्दुर्तङ हेल्वङ सिम-सम दबे मातङ.
16 इद सूड्सि वूरकुन बगवंतना वेरे पिय्ता.
ते बगवंतन मोक कंडि कीसि, बक्तिते ताक्ले गोस्टि सीतेर.
17 अद वकत्ने उंदि डगुर मीन योनन मिङना इन्जेर बगवंतल तयर इर्सि मत्तोर.
योनल मूंद दिहङ मूंद रात्क अद मींदा पेटित रोपोने मत्तोर.