इज्रयेल पर्जा तम्वुर पगा-दारकुन उल्टा किय्वल पार्तना
यात्रा कीसेर येरुसलेम वर्सि सोंवलिर वार्वल कीर्तन
129
1 “मावा जवन-पांदल मोदोल कीसि, मा पगा-दार्क माकुन वेले दुक्सङ सीसेर वातेर”
इन्जेर इज्रयेल पर्जा वेहंतेर.
2 “मावा जवन-पांदल मोदोल कीसि,
मा पगा-दार्क माकुन वेले दुक्सङ सीसेर वातेर.
तेर बति वूर माकुन हारि किया पर्मकि.
3 ऊड्वलिर नावा डेंड्कित पोरो ऊड्तेर.
वूर नाय्न्गडङ गीतोन मोडि लह्क लह्क गाव्क कीतेर.
4 बति येहोवा देवल नायम वाले आंदुर.
करेबलिर दोह्तङ नोडेन वोर नमुसि वाट्तोर” इन्जेर इज्रयेल पर्जा वेहंतेर.
5 सियोंतुर पोरो पगा पिय्वलिर सम्दिर,
लजे मासि पेजे मल्सि सोत्तेर.
6 वूर रोत पोरो पिर्ता जाडितुन मोडि मंनिर.
अद जाडि बेर्स्वक मुनेन वार-जूरंता.
7 कोय्वन अद जाडि वोना मुटिमेन गिर आयो.
पेंड्किङ दोह्वन तंवा उर्न्गिमेन गिर आयो.
8 सरिये वूर बाजुन आसि वीड्वलिर,
“येहोवा देवना आसिर्वाद मी पोरो मनि.
येहोवा देवना पोरोडे मीकुन आसिर्वाद सींतोम” इन्जेर वेह्वक मंनिर.