कीर्तना 80

#देस मल्सि बाता अहन चोकोट आयना किय्वल पार्तना

पाटा वारुस्वन साटि: आसप्ना कीर्तन

1 इज्रयेल पर्जतुन काबाड्वल गाय्कि आय्वल बगवंता! केवि सीसि केन्जा.

मंदत मोडि योसेप्ना संतांतुन ताकुस्वनि,

केरुबुल्क इंवलिक स्वर्ग्नङ दूतलिकुन नड्डुम

कचुरितगा उद्वल बगवंतनि नीवा वेड्चि पारुसा.⁺

2 येप्रायिम्ना, बेंयमींता अनि मनसेना कांदान्क्नुर मुने,

नीवा सक्ति अनि ताकदुन तोह्‍चि माकुन बचि किय्ले वरा.

3 बगवंता, मोदोल मत्तपिनय माकुन सुद्रन कीम.

ममोट मरंतल बचे मानल नीवा दया मा पोरो तोहा.

4 स्वर्ग्नङ दलम्क्नोर अदिकारि आय्वल येहोवा देवा!

नी पर्जता विनंतितुन जवब सिय्वक्ने

उंडे बचेजेल सोङ्ने मंदंति?

5 कड्क्ना काडेडुन कानेत मोडि वूरकुन सीसेर मंति.

बेय वेले काडेडुन वूर उंडन साटि सीसेर मंति.

6 माकुन अनि मा सिर्मुट्नुर नड्डुम जग्डा पुटुसेर मंति.

मा पगा-दार्क वूरकुन पसंद वाता तीर माकुन चेडि कीसेर मंतेर.

7 स्वर्ग्नङ दलम्क्नोर अदिकारि आय्वल येहोवा देवा!

बगवंता, मोदोल मत्तपिनय माकुन सुद्रन कीम.

ममोट मरंतल बचे मानल नीवा दया मा पोरो तोहा.

8 निमे ईजिप्टनल उंदि आङुर्क्ना वेलितुन तेर्सि तत्ति.

अनि दुस्रोक जातिनुरकुन पूडुसीसि, तान अगा उर्स्ति.

9 तान पह्‍जे मत्ता अद जागतुन तयर कीति.

तानङ सीर्क रोपो कोल पार्सि, अद देसेम पूरो पग्रे माता.

10 ताना दड्मिते काल्वडा बाज्नङ गुटन मुच्ता.

अनि तानङ कांदङ तलवडा बाज्नङ पेर्सा देवदार मरकुन तेर वेले डगुक मत्तङ.

11 तानङ कांदङ पोरयिङ्ना बाज्ना नड्डुम्ना सम्दुर वेरि पार्तङ.

अनि तानङ कोड्डिङ सिडयिङ बाज्ना युप्रटिस लव्डि वेरि पग्रे मातङ.

12 अद वाडित सिर्मुट्ना गोडतुन बारि अरुस्ति?

सरिय सोंवलिर सम्दिर तानङ पंडिङ कोय्सेर मंतेर.

13 केडता पदि तान सीर्कनल हालि कीसि तिन्जेर मंता.

वहुक्नङ पियङ-काल्क तान तिन्जेर मंतङ.

14 स्वर्ग्नङ दलम्क्नोर अदिकारि आय्वल येहोवा देवा!

स्वर्गनल उंदि जोका वरिसि सूडा!

अनि इद आङुर्क्ना वेलितुन बचि कीम.

15 निमे नी तिना केय्दे उर्स्ता आङुर्क्ना मोडोकतुन बचि कीम.

नी साटि निमे राकि कीता वेलितुन काबाडा.

16 वूर तान नट्क्सि, तड्मिते डुंडुसि वाड्तेर.

नीवा सोङुन हिंदल वूर पर्जा मूरे मायिर.

17 बति नीवा तिना बाजुन निल्सि मंवन सात सीम.

निमे पोसि कीति वोर मरिन सङा नीवा बुजा बलम सात मनि.

18 अस्के निह्‍गटल ममोट बह्‍के माय्वक मंदंतोम.

निमे मावा परंतुन ताकद सीम.

अस्के ममोट नीवा पोरोडेन पार्तना कींतोम.

19 स्वर्ग्नङ दलम्क्नोर अदिकारि आय्वल येहोवा देवा!

बगवंता, मोदोल मत्तपिनय माकुन सुद्रन कीम.

ममोट मरंतल बचे मानल नीवा दया मा पोरो तोहा.