कीर्तना 72

राजन साटि किय्वल पार्तना

सोलोमोंता कीर्तन

1 ये बगवंता! राजन नीवङ नाय्दङ कानुनकुन बारेते

अनि राजनोर मरिन नीवा नियतुन बारेते करुसा.

2 वोर नियतुन पिय्सि नीवा पर्जतुन तस्वा कींतोर

अनि नायदुन पिय्सि दाबे मासि मंवलिर नीवुरकुन तस्वा कींतोर.

3 नीवा नियतुन पिय्सि डङलिक गुटङ अनि चुडुक गुटङ

पर्जा सम्दिरकुन सांतिता पंडि सियिङ.

4 काया-कस्टम बोगे माय्वलिरकुन नाय्दे तस्वा जर्गुसंतोर.

गरिब लोकुरुर मरि-मियडुन बचि कीसि,

वूरकुन दुक्सा सिय्वलिरकुन दाबि कीसि वाटंतोर.

5 हाबडगा पोड्द अनि नेलेन्ज मनल वेरि,

पिडिनङ-पिडिङ पर्जा निह्‍गा बाव-बक्तिता वेरेते पिसिर.

6 जाडि कोय्ता पडिदुन पोरो अर्वल पिरदुन मोडि,

अनि बोमितुन पुह्‍वल, चोकोट्ना पिरदुन मोडि वोर राज ताकुसिर.

7 वोर राजल आसि मंवल गट्कते, नियत्नुर बडे मांतेर.

नेलेन्ज मूरे मानल वेरि, वूरकुन पह्‍जे मत्ता अद सम्दो मुक्तरि पुटंता.

8 वोना राज उंदि सम्दुर्तल मोदोल कीसि उंडे उंदि सम्दुर वेरि,

अनि युप्रटिस लविडल सुरु कीसि दर्तुरितङ कोन्क वेरि ताकुसंतोर.⁺

9 बोडि गुटनगा पिस्वलिर पर्जा वोर वेह्‍ततीर ताका लागर.

अनि वोर दुस्मन-दारकुन हारि कीसि तंवङ कालकुन बूड इरंतोर.^*

10 तर्सिस्नुर राजलिर अनि लंकनुर राजलिर वोन टेक्सा दोहंतेर.

सेबतुर राजलिर अनि सीबतुर राजलिर वोन इनम्क तरंतेर.

11 राजलिर सम्दिर वोनङ काल्क करंतेर.

दुस्रोक सम्दो जातिनुर वोना सेवा कींतेर.

12 बारितेके तनकुन दिक सेलुर वूर विनंति कीतेके वूरकुन मदत कींतोर.

चुडुर-पान कीसि दाबे मासि मंवलिरकुन सुटि कियुसंतोर.

13 बोरे मदत कियुर वूर पोरो अनि गरिबकुन पोरो दया तोहंतोर.

गरिब्क्ना परंतुन वोर बचि कींतोर.

14 वूरकुन दाबि कीसि दुक्सा सिय्वलिर कपेटलिर्गटल वूरा परंतुन सुटि कियुसंतोर.

वूरा परन राजना नदुडे वेले विलुवता आंद.

15 वोर राजल बस्केट जीवते मंनिर.

सेबतगा पुट्वल सोने वोन सिय्वल जर्गि.

वोर चोकोट मंदना इन्जेर पर्जा बस्केट पार्तना कींतेर.

दिवोस पूरो गिर वोन आसिर्वाद सीसेर मंदंतेर.

16 पूरो देसेम्नगा अनि डङलिक गुटन पोरो बर्पुर पंटा पंडंता.

अद पंटा लेबनोंता पंटतुन मोडि बर्पुर पंटा पंडि.

बोमित पोरोडा हिर्वल जाडितुन मोडि अद नगुडा पर्जा बडे मायिर.

17 वोर राजना पोरोल बस्केट निल्सि मनि.

वोना पोरोडुन पोड्द मनल वेरि, कीर्ति बडे मासेर मनि.

वोन हिंदल सम्दिरकुन आसिर्वाद पुटि.

सम्दो जातिनुर वोन आसिर्वाद येत्तोर इन्जेर वेहिर.

18 बगवंतल आय्वल इज्रयेल पर्जतोर येहोवा देवन डगुर-पान वायि.

सिरिप वोरे मय्मतङ कार्यङ किय्वल आंदुर.

19 वोना मय्मा वाले पोरोडुन बस्केट डगुर-पान वायि.

पूरो दर्तुरि वोना मय्मते निन्चि मनि.

आमेन! आमेन!

20 येसयिनोर मरि दाविद्नङ पार्तनङ इचोट्के मार्तङ.