कीर्तना 71

वेले वहि वाले मायनल कीता पार्तना

1 येहोवा देवा, नाकुन काबाड्कि इन्जेर नीवा कोरते वासि मंतोन.

नाकुन बस्केन लजन वाटेङ आया सिय्मा.

2 नीवा नियतुन पिय्सि नाकुन तपुसीम.

नावा गोस्टितुन दिहंते केन्चि नाकुन बचि कीम.

3 नना बस्केट निह्‍गा वासि मनल नाकुन काबाड्वल पेर्सा बंडति आसि मन.

निमेय नावा पेर्सा बंडति अनि तान पोरो मंवल किलति आंदि.

नाकुन बचि किय्ले आगे सीम.⁺

4 ना बगवंता, करेबलिरा केय्दल नाकुन बचि कीम.

नुक्सन किय्वलिरा केय्दल अनि दाबि कीसि इर्वलिरा केय्दल नाकुन बचि कीम.

5 ना पर्बु, येहोवा देवा! नी पोरोन नना आसा इर्सि मंतोन.

नावा चुडुर-पांदल नी पोरोन बरोसा इर्सि मंतोन.

6 अवना पीटे अर्तोन अगटल, निमेय नाकुन सात सीसेर मंति.

अवना गर्बितल नावा जल्मा आयुस्वनि निमेय आंदि.

अदेन साटि नना बस्केट नीकुने डगुर-पान सींतोन.

7 निमे नाकुन ताकद वाले किलति आता काड्कि,

वेलेटिर नाकुन सूड्सि गुल आनल नमुना आसि मंतोन.

8 नीवा कीर्तितुन अनि मय्मतुन बारेते,

नावा तोड्डि दिवोस पूरो डगुर-पान सीसेर मंदंता.

9 नावा वेडिल-पांदे नाकुन सुटि किय्मा.

नावा ताकद कम्जोर आता पेजे नाकुन सुटि किय्मा.

10 नावुर पगा-दार्क ना बारेते वड्क्सेर मंतेर.

ना परन येत्ले डाव पोसेर मंवलिर,

मीरे मासि सोन्च कीसेर मंतेर.

11 अनि वूर, “बगवंतल वोन सुटि कीतोर.

देट वोन पूड्सि पिय्कट.

वोन मा केय्दल सुटि कियुस्वल बोरे सेलोर” इन्जेर मंतेर.

12 बगवंता, नह्‍गटल लङ मन्मा.

ना बगवंता, नाकुन मदत किय्ले वेय्ने वरा.

13 ना परन येत्ले सूड्वलिर पगा-दार्क लजे मासि नासेडम आयिर.

नाकुन नुक्सन किय्ले सूड्वलिरा लजा सोन्जि सिर्मिंदिङ आयिर.

14 नना बस्केट आसते नी साटि सूड्सेर मंदंतोन.

नना उंडे अदिक नीकुन कीर्ति सीसेर मंदंतोन.

15 नीवङ नियत्नङ कामकुन अनि बचि किय्वडुन बारेते नना रोजि वेह्‍चेर मंदंतोन.

अवेन लेकना इत्तेके, ना सङा आया परो.

16 पर्बु येहोवा बगवंतल कीतङ सक्ति वालेक कार्यङ पोडि कीसि वेहंतोन.

सिरिप नीवा नियतुन बारेतेन पोडि कीसि वेहंतोन.

17 बगवंता, नावा चुडुर-पांदले नाकुन करुसेर वाति.

इंके वेरि नीवङ मय्मतङ कार्यन बारेते वेह्‍चेर वातोन.

18 बगवंता, वाय्वल पिडितुरकुन नीवा बुजा बलमुन बारेते वेहंतोन.

जल्मा आय्वलिर सम्दिरकुन नीवङ ताकद्नङ कार्यन बारेते वेहंतोन.

इद तीर्दे नना वेहनल तला पिड्चि डुगा डुगा आतेके गिर नाकुन सुटि किय्मा.

19 बगवंता, नीवा नियत पोरो हाबडुन येवनच्चोर मंता.

बगवंता, निमे मय्मतङ कार्यङ कीसि मंति.

ये बगवंता, नी दात्नोर बोरे सेलोर!

20 ममोट बेय वेले दुक्सङ बोगे मानल कीतोनि आंदि.

बति निमे मावा जीवतुन तावंति.

बोमिता अड्ग्ना जागतल निमे माकुन मर्ला तेहंति.

21 नावा मान नाकुन मल्सि वानल बडि कीम.

ना बाजुन मल्सि, नाकुन सांति सीसि सुम्जि कीम.

22 ना बगवंता, नना गिर नीवा सतेमुन पिय्सि,

कर्नाट नेकुसेर नीकुन डगुर-पान सींतोन.

इज्रयेल पर्जतोर पवित्रा बगवंता,

चोंड्कतुन नेकुसेर नीकुन डगुर-पान सींतोन.

23 नावा परंतुन निमे दकुस्ततुन हिंदल,

नावङ सिव्लिङ नीकुन डगुर-पान सीसेर आनंद्ने वारंतङ.

24 नाकुन नुक्सन किय्ले सूड्वलिरा हिजत सोडिता.

वूरा लजा सोन्जि सिर्मिंदिङ आसि मंतेर.

बति नावा वेन्जेर दिवोस पूरो नीवा नियतुन बारेते वेहंता.