दनेवाद अनि डगुर-पान सिय्वल कीर्तन
पाटा वारुस्वन साटि: उंदि कीर्तन.
66
1 कलितगा मंवलिर सम्दिर लोकुर्निट! बगवंतन बारेते कुसिता पाटा वारट!
2 वोना मय्मा वाले पोरोडुन डगुर-पान सीम्ट.
वोन मय्मा सीसि, डगुर-पान सीम्ट.
3 इद तीर्दे बगवंतन डगुर-पान सीम्ट:
“नीवङ मय्मतङ काम्क दड्कि तिनल मंतङ.
नीवा ताकदुन हिंदल, नी दुस्मन-दार्क जूके मासि निह्गा वांतेर.
4 कलितुर सम्दिर लोकुर नीकुन दंडोस दोसि, डगुर-पान सियिर.
नीवा पोरोडुन हिंदल, नीकुन कीर्ति सीसेर वारिर.”
रेला.
5 बगवंतल किय्वलिक मय्मतङ कामकुन सूड्ले वरट.
नरिमन्कलिर साटि वोर कीतङ कामकुन सूड्तेके,
वोर बेय वेरिनल दिसेर मंतोर.
6 वोर सम्दुरतुन वत्ता बोमितुन दात कीतोर.
अदेनल मावुर लोकुर ताक्सेर वीड्तेर.
अगा वोर कीततुन पिय्सि आनंद येत्तेर.+
7 वोर तंवा महा सक्तितुन हिंदल, बस्केट राज कींतोर.
मर्ला-बड्वलिर तम्वा तमा डगुर-पान किय्वा.
बारितेके दुस्रोक जातिनुर पोरो, वोर तंवा नदुर वाट्सि मंतोर.
रेला.
8 सम्दो जातिनुर्निट! मा बगवंतन डगुर-पान सीम्ट.
वोन बारेते जोर्ते वारट.
9 माकुन जीवते इर्वल वोरे आंदुर.
वोर मा कालकुन गसुर्का सियोर.
10 बगवंता! निमे माकुन परिक्सा कीसेर मंति.
तड्मितगा चांदितुन येंडुस्तप माकुन गिर येंडुस्ति.
11 निमे माकुन वूर पिय्सि वोनल कीति.*
मा नडिन पोरो डगुर वजन इर्ति.
12 मा पगा-दार्क्नङ रत्क मा तलत पोरोडल सोनल कीति.
ममोट तड्मिनगा अनि येह्क्नगा अर्तोम.
तेर बति, निमे माकुन सम्दो बर्पुर मंवल जागतगा ताकुस्ति.
13 डुंडुस्वलिक बलिदान्क पिय्सि नीवा जागतगा वांतोन.
नना वोप्तङ अव मोकुलकुन कंडि कींतोन.
14 नाकुन दुक्सा वाता पेजे ना सिव्लिङ पल्क्तङ मोकुलकुन,
अनि ना तोड्दे वोप्तङ मोकुलकुन नना कंडि कींतोन.
15 पोडेलकुन, कोडुतङ गोरेन अनि दूपुन तचिकुन नी साटि डुंडुसि बलिदान सींतोन.
अनि कोंदन, हेरे बोकुकुन तचि बलिदान सींतोन.
रेला.
16 बगवंतन पोरो बाव-बक्तिता वेरेते पिस्वलिर्निट!
मिरट सम्दिर वासि, केन्जट!
वोर ना साटि कीतङ कार्यन नना केन्जुसंतोन.
17 नना वोन दुक्सते पार्तना कीतोन.
अस्केने ना तोड्दे बेय चोकोट्ना पाटा वाता.
18 ना दिलतगा मंवल पापुन चुक-चुके माया बीगर,
पर्बु नावा पार्तनतुन केन्जोर.
19 बति वोर बगवंतल, ना पार्तनतुन करलेन केन्ज्तोर.
वोर ना पार्तना-विनंतितुन वोप्तोर.
20 वोर बगवंतने डगुर-पान वायि!
बारितेके वोर ना पार्तनतुन केन्ज्तोर.
अनि तंवा मारियो अद पेर्मतुन नह्गटल टेंड्सि वाट्मकि.