बगवंतना पेर्मता-दया अनि तस्वा
पाटा वारुस्वन साटि: दाविद्ना कीर्तन - इदेन वोर येदोम्नोर दोयेगु सव्लुनगा सोन्जि, “दाविद पेर्सोर कटोडल अहिमेलेक्नगा सोत्तोर”+ इन्जेर वेह्ता पेजे लिहि कीतोर.
52
1 ये ताकद वालेनि! निमे कीता करबुन हिंदल पोके मासेर मंति. बति नाकुन पूरो दिवोस बगवंतना मारियो अद पेर्मा काबाड्सेर मंता.
2 पसि किय्वनि! दार मंवल मङलिना मय्जत मोडिता नीवा वेन्जेर लबड वेह्चि,
नाकुन नासेडम किय्ले पिलन्क वाट्सेर मंता.
3 चोकोट किय्वडुन तेर, वायुट किय्वल,
अनि करल वेह्वडुन तेर, लबड वेह्वले निमे पसंद कींति.
रेला.
4 ये कपट्ना वेन्जेर वालेनि!
अदिक नासेडम किय्वलिक लबड गोस्टिने निमे पसंद कींति.
5 अदेन साटि बगवंतल, बस्केन मंवक्ने नीकुन नासेडम कींतोर.
नीकुन वोर नीवा रोतल सीर्क अरिक तेर्सि वाटंतोर.
जीवते मंवलिरा देसनल नीकुन मूरि कीसि वाटंतोर.
रेला.
6 इद सम्दो नियत्नुर सूड्सि वेरेते गुल आंतेर.
अनि वोर करेबन सूड्सि कव्सेर इहिन,
7 “इचुला! वेर मायनल तनकुन काबाड्ले बगवंतनगा बरोसा इर्मकि.
बति तंवा दन-दव्लतुन पोरो बरोसा इर्तोर.
ईतोर मायनल उंडे इच्चुर करब काम्क कीसेर,
तंवा नासेडमुन तनय कोर्तोर आंतोर” इन्जेर चेडि कींतेर.
8 बति, ननते बगवंतना रोतगा चिल्लल ओलिवा मरत मोडि मंतोन.
बगवंतना मारियो अद पेर्मतुन बरोसा कीसेर मंतोन.
9 निमे जर्गुस्ततुन पिय्सि, बस्केट दनेवाद वेह्चेर डगुर-पान सींतोन.
नीवुर बक्तलिर नड्डुम नीवा चोकोट्ना पोरोडुन कीर्ति सींतोन.