कीर्तना 51

#मापि पुटन साटि किय्वल पार्तना

पाटा वारुस्वन साटि: दाविद्ना कीर्तन. बेत्सेबन सङा गल्ति कीता पेजे नातन पर्वक्तल, दाविद्नगा वासि, वोना गल्तितुन वोर सम्जे मानल कीतोर. अद आता पेजे इद कीर्तन दाविद लिहि कीतोर.

1 ये बगवंता! नीवा मारियो अद पेर्मतुन ना पोरो तोहा.

किवुल वाय्वल नीवा गुंते नावङ पापकुन मोडि कीम.

2 नावङ कसुक येंडनल नाकुन चक्ने नोरा.

नाकुन तुंड्ता पाप्ना डागनल सुदुड कीम.

3 नावङ कसुकुन बारेते नाकुन टावय.

नावङ पाप्क ना मुने तात्कर दिसेरेन मंदंतङ.

4 सिरिप नीकुने उल्टा पाप कीसि मंतोन.

नी नदुडुन मुनेने कसुर कीसि मंतोन.

अदेन साटि ना बारेते नीवङ गोस्टिङ सतेम्नङ आंदुङ.

नाकुन तस्वा कीनेके नियतुन पिय्सि बरोबर तस्वा कींति.⁺

5 नना पाप्ना गुंते जल्मा आतोन.

करलेन नावा अवना पीटे नना पिंडम आसि मत्ततले पापिना आसि मंतोन.

6 निमे नावा मन-दिलतुन रोपो सतेमुन कोर्सेर मंति.

नावा मन-दिलतुन रोपो नीवा गियंतुन करुसींति.

7 नना सुदुड आनल नावङ पाप्कनल नाकुन सुदुड कीम.

अस्के नना पाल्दल गिर चक दव्रल दिसंतोन.

8 नावा कुसि अनि आनंद नाकुन तिरिसि सीम.

निमे उरुस्तङ बोकङ कुसि येतिङ.

9 नावङ पापकुन दुम सूड्सेर मन्मा.

नावङ सम्दो कसुकुन मोडि कीम.

10 बगवंता, ना रोपो सुदुड दिल सीम.

ना दिल्ते चोकोट ताकनल नीवा बरोसा वाले आत्मतुन नाकुन सीम.

11 नीवा चर्नतल नाकुन बह्‍रि डग्लि किय्मा.

नीवा पवित्रा आत्मतुन नह्‍गटल तेंड्मा.

12 नाकुन पाप्ना सिक्सतल बचि कीति अस्के,

सीति अद आनंदुन मल्सि नाकुन सीम.

नीवा गोस्टि तीर ताक्वल मंदुन सीसि गटि-दीर्या सीम.

13 अस्के नीवा सरि-मारगुन बारेते मर्ला बड्वलिरकुन करुसंतोन.

अद केन्चि वूर पापेस्तलिर नी बाजुन मलंतेर.

14 नाकुन बचि किय्वल बगवंता.

जीवङ येत्ता गल्तितल नाकुन तपुसीम.

अस्के नावा वेन्जेर नीवा नियतुन बारेते कुसि येतंता.

15 पर्बु, ना तोड्डि नीवा डगुर-पांदुन पचर कीनल,

नावङ सिव्लिन कोलि कीम.

16 निमे बलिदानकुन कोर्वनि आय्वि.

उंदि मोका कोर्मड इतेके नना अस्क्सि सींदुन.

डुंडुसि सिय्वल बलिदान नीकुन पसंद सेले.

17 बति बगवंता! मन-दिलतगा कमि-पान कीसि मंवल बलिदाने नीकुन पह्‍जे.

कमि-पान कीसि दुक्सा बोगे मासि मंवल दिलतुन निमे तेंड्सि वाट्वि.

18 नीवा दयते सियोन नगुडुरकुन मदत कीम.

येरुसलेम नगुडङ गोडङ मर्ला दोहुसा.

19 अस्के नियत्नङ बलिदान्क, डुंडुसि सिय्वलिक बलिदान्क

अनि चचोलके सिय्वलिक अर्पनन निमे वोपंति.

अस्के लोकुर नी साटि बलिदान्क सिय्वल बोव्लतगा कुरन बलिदान सींतेर.