2वा बागम
(कीर्तन्क्ना 42-72)
#दुस्रो देस्नगा दासि-पान किय्वल वोरोना पार्तना
पाटा वारुस्वन साटि: कोरहुना संतांदुर वार्ता कीर्तन.
42
1 लविडा येतुन साटि माव आसा कीतपिनय, बगवंता, नी साटि नावा परन आसा कींता.
2 नावा परन, जीवा वाले बगवंतन साटि बेय आसते पर्पेडे मासेर मंता.
वोर बगवंतना चर्नते नना बस्के सोन्जि निल्का?
3 वूर बस्केट ना सङा, “नी बगवंतल बगा मंतोर?” इन्जेर इनेके,
नर्का-पियल नावा काडेर नाकुन चंदि आता.
4 इदेन मुने सड तुङ्वल मांदितुन नना बगवंतना मंदिरतगा ताकुसींदुन.
अहन ममोट सोन्जि आनंद्ने पाटङ वार्सेर बगवंतन डगुर-पान सींदुम.
बति इंके अव गोस्टिन हेतु कीसि नावा दिल टूटे माता.
5 ना परंति, निमे बारि कुसुम्ने मंति?
ना रोपो निमे बारि लह्कि वर्सेर मंति?
बगवंतन पोरो आसा इरा.
वोरे नाकुन बचि किय्वल अनि ना बगवंतल इन्जेर,
उंडे गिर नना वोने डगुर-पान सींतोन.
6 ना बगवंता, ना परन ना रोपो कुसुम्ने आसि मंता.
अदेन साटि योर्दन येरियतल, हेर्मोन गुटतल,
अनि मिसार गुटतल, नना नीकुन हेतु कीसेर मंतोन.
7 नीवा येता ऊसना आवज रदा रदा इन्जेर केन्जा वासेर मंता.
नीवा येतङ दारङ अनि हेल्वङ सम्दो गिर ना पोरोडल पोङ्सेर मंतङ.
8 तेर बति बगवंतल पियडा येलते तंवा मारियो अद पेर्मतुन आगे सींतोर.
नर्कडा येलते वोन बारेता पाटतुन
अनि नाकुन जीवते इर्वल बगवंतन बारेता पार्तना गिर नाकुन सात मंदंता.
9 अदेन साटि नाकुन काबाड्वल बंडत मोडि मंवल बगवंतन सङा,
“निमे नाकुन बारि मरुङ्सेर मंति?
ना पगा-दार्क सिय्वल तक्लिबुन हिंदल नना बारि दुक्सते मंदना?” इन्जेर पूसि कींतोन.
10 ना दुस्मन-दार्क रोजि, “नी बगवंतल बगा मंतोर?” इन्जेर पूसि कीसेर मंतेर.
वूर रेह्चि वड्क्तङ अव गोस्टिन हिंदल, नावङ बोकङ उरुसेर मंतेर.
11 ना परंति, निमे बारि कुसुम्ने आसि मंति?
ना रोपो निमे बारि दुक्सते कुह्चेर मंति?
बगवंतनगा आसा इर्सि मन.
वोरे नाकुन बचि किय्वल ना बगवंतल आंदुर.
अदेन साटि वोने नना डगुर-पान सींतोन.