बेमरिते मनेके किय्वल पार्तना
पाटा वारुस्वन साटि: दाविद्ना कीर्तन
41
1 गरिबकुन पोरो दया तोह्वल आसिर्वाद येत्वल आंतोर. आपतितगा मनेके येहोवा देवल वोर आतोन बचि कींतोर.
2 येहोवा देवल वोन काबाड्सि वोना परंतुन पिसुसंतोर.
बोमितगा वोर आसिर्वाद येत्वल आंतोर.
पगा-दार्क्ना केय्दे वोन निमे हव्लि किय्वि.
3 वोर बेमरिते कटुडगा अर्सि मनेके, येहोवा देवा वोन राकि कींति.
वोन दुक वानेके निमेय वोन चोकोट कींति.
4 बति ननते, “येहोवा देवा, नीवा नदुडुन मुने नना पाप कीसि मंतोन.
ना पोरो दया तोह्चि, नाकुन चोकोट कीम” इन्जेर कोर्तोन.
5 बति ना पगा-दार्क ना बारेते,
“वोर बस्के सानुर? वोना पोरोल बस्के मूरे मायर?”
इन्जेर करब वड्क्सेर मंतेर.
6 वोरोर नाकुन सूड्ले वातेके लबड वड्कंतोर.
वोना दिल पापुन गटि कीसेर मंता.
वोर सोन्जिकुन बाजर्क्नगा अवेन बारेते वेहंतोर.
7 ना पगा-दार्क मीरे मासि ना पोरो कुसा कुसा चह्डिङ वड्कंतेर.
नाकुन नासेडम किय्ले करब सोन्च कीसेर मंतेर.
8 अनि वूर, “सोनो अद बेमरि, वोन चेट्गूड्सि मंता.
इङे वोर तंवा बीडर्तल तेदा परोर” इन्जेर वेह्चेर मंतेर.
9 नना बरोसा किय्वल, ना लाड्नोर सोप्तल, ना सङा सारि तितोर वोर,
नाकुन पायन साटि उल्टा तेत्तोर.+
10 बति येहोवा देवा, दयते नाकुन तेहा.
अस्के नना वूरा बद्लि येतंतोन.
11 ना दुस्मन-दारल नाकुन मेया परोर.
इदेन हिंदल नना इत्तेके नीकुन वेले इस्टम इंवल करि कीतोन.
12 नना नियत्ने ताक्ता काड्कि, नाकुन अर्सि सोंवक्ने निपुसीति.
नीवा चर्नते नाकुन बस्केट निपुसि इरंति.
13 इज्रयेल पर्जतोर बगवंतल आय्वल येहोवा देवन
पिडिनङ पिडिङ बस्केट डगुर-पान वायि.
आमेन! अह्ने वायि!+