येहोसुवा 19

सिम्योंता कांदांतुरकुन पुट्ता अद ईसा

1 रेंडवा जोका चिटिङ वाड्ता पेजे सिम्योन कांदांतुरा पोरोडे चिटि पेसिता. वीरा ईसा यूदा कांदांतुरा ईसत रोपो मत्ता.

2-6 सिम्योंता कांदांतुरा ईसतगा, बेयेर्सेबा⁺ (सेबा), मोलदा, हसर-सुवल, बाला, येजेम, येल्तोलद, बेतुल, होर्मा, सिक्लग, बेत-मर्कबोत, हजर-सूसा, बेत-लेबयोत अनि सारुहेन इंवलिक तेरा (13) नगुक अनि अवेकुन सिर्मुट्नङ नह्‍क सम्दो गिर मत्तङ.

7-8 इवे आय्वा आयिन, रिंमोन, येतेर अनि आसन इंवलिक नालुङ नगुक अनि बालत-बयेर इंवल नेगेव्ता रामा येरिया वेरि अवेकुन सिर्मुट्नङ नह्‍क सम्दो गिर वूरा ईसतगन वातङ.

सिम्योंता कांदांतुरकुन पुट्ता अद ईसा इद आंद. 9 सिम्योंता कांदांतुरकुन वाता अद ईसता बोमि, यूदा कांदानुरा ईसतुन रोपो सिय्वल जर्ग्ता. बारितेके यूदा कांदांतुरा ईसतगा वेले बोमि मत्ता.

जेबुलुंता कांदांतुरकुन पुट्ता अद ईसा

10 मूडवा जोका चिटिङ वाड्ता पेजे जेबुलुंता कांदांतुरा पोरोडे चिटि पेसिता.

इद कांदांतुरा ईसता दूरा सारिद इंवल नगुडल सुरु आता. 11 अगटल अद दूरा पोरयिङ बाज मंवल मरला इंवल नगुर वेरि सोत्ता. अदेनल उंडे मुने दबसेत इंवल नगुर वेरि सोन्जि, अगटल योक्नेयम्नगा मंवल वत्ता लव्डि वेरि येव्ता. 12 अद दूरा सारिदनल सिडयिङ बाज मंवल किस्लोत-ताबोर नगुर वेरि सोत्ता. अगटल दाबेरत चहरतुन वीड्सि, पोरो मंवल यापिया चहर वेरि येव्ता. 13 अगटल अद उंडे गिर सिडयिङ बाज्नेके गात-हेपर नगुर अनि इत्का-कासिन चहर वेरि सोत्ता. अवेनगटल रिंमोन नगुडुन वीड्सि, पोरयिङ्नेके मंवल नेया चहर्तेके मल्ता. 14 अद तलवडा बाज्ना दूरा हंनातोन नगुडुन वीड्सि, इप्तयेल लोदि वेरि सोन्जि आग्ता. 15 इवे आय्वा कटत, नहलल, सिम्रोन, इदला, बेत्लेहम इंवलिक मीरि कीसि सम्दो बारा (12) नगुक अनि अवेकुन सिर्मुट्नङ नह्‍क सम्दो गिर वूरा ईसतगन वातङ.

16 इव जेबुलुंता कांदांतुरकुन पुट्ता अद ईसतगा मंवलिक नगुक अनि अवेक्नङ नह्‍क आंदुङ.

इसकर्ता कांदांतुरकुन पुट्ता अद ईसा

17 नाल्गवा जोका चिटिङ वाड्ता पेजे इसकर्ता कांदांतुरा पोरोडे चिटि पेसिता.

18-21 इद कांदांतुरा ईसतगा येज्रेयेल, केसुलोत, सूनेम, हपरयिम, सियोन, अनहारत, रबित, किसियोन, येबेज, रेमेत, येन-गनिम, येन-हदा अनि बेत-पसेस इंवलिक नगुक मत्तङ. 22 वूरा दूरा ताबोर, सहजुमा, बेत-सेमेस इंवलिक नगुकुन वीड्सि, योर्दन लव्डि वेरि सोन्जि आग्ता. इव सम्दो सोला (16) नगुक अनि अवेकुन सिर्मुट्नङ नह्‍क सम्दो गिर वूरा ईसतगन वातङ.

23 इव इसकर्ता कांदांतुरकुन पुट्ता अद ईसतगा मंवलिक नगुक अनि अवेक्नङ नह्‍क आंदुङ.

आसेर्ता कांदांतुरकुन पुट्ता अद ईसा

24 अय्दवा जोका चिटिङ वाड्ता पेजे आसेर्ता कांदांतुरा पोरोडे चिटि पेसिता.

25-26 इद कांदांतुरा ईसतगा हेल्कत, हालि, बेतेन, अक्सप, अलमेलेक, अमद अनि मिसयेल इंवलिक नगुक मत्तङ. अनि वूरा पोरयिङ बाज्ना दूरा कर्मेल गुटतल सुरु आसि, सिहोर-लिब्नत वेरि सोत्ता. 27 अगटल अद दूरा सिडयिङ बाज्नेके मंवल बेत-दागोन चहरतुन वीड्सि, जेबुलुंता कांदांतुरकुन सीता ईसता इप्तयेल लोदि वेरि सोत्ता. अगटल तलवडा बाज्नेके मल्सि बेत-येमेक, नेयियेल चहरकुन वीड्सि, उंडे गिर तलवडा बाज्नेके मंवल काबुल चहर वेरि सोत्ता. 28 अगटल अब्दोन^*, रेहोब, हंमोन, काना अनि डगुर सीदोन वेरि इंवलिक नगुकुन वेरि सोत्ता. 29-30 अगटल ताना दूरा काल्वडा बाज रामतेके मल्सि, सिर्मुट गोडा दोह्‍चि मंवल तूरु नगुडेके सोत्ता. अगटल अद दूरा होसा चहरतुन वीड्सि, नड्डुम्ना सम्दुर वेरि सोन्जि आग्ता. इद बोमित रोपोने, महलब, अक्जिब, उंमा, आपेक, रेहोब इंवलिक नगुक मत्तङ. इव सम्दो मीरि कीसि वीसा रंड (22) नगुक अनि अवेकुन सिर्मुट्नङ नह्‍क सम्दो गिर वूरा ईसतगन वातङ.

31 इव आसेर्ता कांदांतुरकुन पुट्ता अद ईसतगा मंवलिक नगुक अनि अवेक्नङ नह्‍क आंदुङ.

नप्तालिना कांदांतुरकुन पुट्ता अद ईसा

32 अरवा जोका चिटिङ वाड्ता पेजे नप्तालिना कांदांतुरा पोरोडे चिटि पेसिता.

33 वूरा दूरा हेलेपनल, जाननिम्नगा मंवल पेर्सङ सिंदूरा मरकनल सुरु आसि, सिडयिङ बाज्ना अदामि-नेकेब नगुर, यब्नेयेल वेरि सोत्ता. अगटल लकुम वेरि सोन्जि, योर्दन लविडगा आग्ता. 34 अगटल पोरयिङ बाज मल्सि अज्नोत-ताबोरतुन वीड्सि, हुकोक नगुर वेरि सोन्जि आग्ता. काल्वडा बाज्ना दूरा जेबुलुंता ईसा वेरि सोत्ता. अनि पोरयिङ बाज्ना दूरा आसेर्ता ईसा वेरि सोत्ता. सिडयिङ बाज्ना दूरा योर्दन लव्डि वेरि सोत्ता. इद दूरा यूदना^* कांदांतुरा ईसा वेरि सोन्जि आग्ता. 35-38 सिर्मुट गोडङ मंवलिक चहर्क, जिदिम, जेर, हंमत, रकत, किनेरेत, अदमा, रामा, हसोर, केदेस, येद्रेयि, येन-हासोर, इरोन, मिग्दलेल, होरेम, बेत-आनत, बेत-सेमेस इंवलिक सम्दो मीरि कीसि वोनिस (19) नगुक अनि अवेकुन सिर्मुट्नङ नह्‍क सम्दो गिर वूरा ईसतगन वातङ.

39 इव नप्तालिना कांदांतुरकुन पुट्ता अद ईसतगा मंवलिक नगुक अनि अवेक्नङ नह्‍क आंदुङ.

दानुना कांदांतुरकुन पुट्ता अद ईसा

40 येडवा चिटि दानुना कांदांतुरा पोरोडे पेसिता.

41-46 वूरकुन सीता अद ईसतगा जोरा, येस्तयोल, इर-सेमेस, सालबिन, अयलोन, येत्ला, येलोन, तिम्ना, येक्रोन, येल्तेके, गिब्बेतोन, बालत, जेहुद, बेने-बेरक, गात-रिमोन, मेयर्कोन, रक्कोन अनि योप्पता येरिया पूरो वूरा बोमितगन वातङ.

47 दानुना कांदांतुरकुन अद ईसतगा मोदोल मत्तुर वूर पगा-दार्क तेंड्सि पूड्तेर. ते तलवडा बाज्नेके पोरो सोन्जि अगा मंवल लेसेम नगुडुर सङा लडेय कीसि, तान्गा मंवलिरकुन तल्वर्क्ने पासि जक्तेर. अनि तान आगुटि कीसि, तम्वा कांदांतोर मोदोडोर बाबो ‘दानु’ इन्जेर अद नगुडुन पोरोल दोस्तेर.

48 इव दानुना कांदांतुरकुन पुट्ता अद ईसतगा मंवलिक नगुक अनि अवेक्नङ नह्‍क आंदुङ.

येहोसुवना ईसते वाता अद बोमि

49 सम्दो कांदानुरकुन वूरङ ईसङ तूसि सीता पेजे, इज्रयेल पर्जा नूनुनोर मरि येहोसुवन गिर ईसा सीतेर. 50 बहन इत्तेके, मोदोल येहोवल “वोना पसंद वाता अद चहर तल्कवचो” इन्जेर आगे सीसि मत्तोर. अदेन साटि वोर येहोसुवल, येप्रायिम कांदांतुरा गुटत पोरोडा ईसतगा मंवल तिम्नत-सेरहु^* चहरतुन तल्क्तोर. ते वूर सीतेर. अद चहरतुन उंडे उंदि जोका दोह्‍चि, तान्गन मत्तोर.

51 येलियाजर कटोडल अनि नूनुनोर मरि येहोसुवल, इज्रयेल पर्जतुर पेदोल्क मीरे मासि, सिलोहुतगा मंवल बगवंतन पार्तना-विंति किय्वल डेरतगा, येहोवना चर्नते सम्दो कांदानुरकुन चिटिङ वाट्सि तूसि सीतङ ईसङ इव आंदुङ. अद तीर्दे बोमि तूस्वल काम मार्ता.