येहोसुवा 18

मेय्ता बोमितुन ईसङ किय्वल

1 इज्रयेल पर्जा अद देसुन आगुटि किय्वल आता पेजे, वूर सम्दिर सिलोहुतगा मीरे मातेर. अनि पार्तना-विंति किय्ले डेरतुन निपुस्तेर. 2 बति बगवंतल वाग्दन सीता अद बोमितगा ईसा येत्ले, इज्रयेल पर्जतल उंडे येडुङ कांदानुर मेय्सि मत्तेर.

3 अदेन साटि येहोसुवल इज्रयेल पर्जत सङा, “मी तोत्तुरोर बगवंतल येहोवल मीकुन सींतोन इन्जेर वाग्दन कीता बोमितुन आगुटि किय्ले, मिरट उंडे बारि कोरुम कींतिट? 4 मीवा हर कांदांतल मुविर माय्नलिरकुन आचट. वूरकुन नना इद बोमिता नक्सा बहन मंता इंवल करि किय्ले रोहंतोन. वूर सोन्जि हर उंदि कांदांता ईसा बचोर मंता इंवल लिहि कीसि नह्‍गा तरंतेर. 5 वूर तान येडुङ ईसङ कींतेर. यूदना कांदांतुर काल्वडा बाजुन तम्वा ईसता दूरत रोपोन मंदना अनि योसेप्ना कांदांतुर^* तलवडा बाजुन तम्वा ईसता दूरत रोपोन मंदना. 6 बस्केते मिरट मेय्ता अद बोमितुन येडुङ ईसङ कीसि लिहि कीसि तरंतिटो, अस्के नना मा बगवंतल आय्वल येहोवना चर्नते मी साटि अव ईसनङ चिटिङ वाटंतोन.

7 “लेवि कांदांतुरकुन मी नड्डुम बोमिता ईसा पुटो. बारितेके वूर येहोवा बगवंतना सेवता कटोडा-पान किय्वले वूरा ईसा आंद. येहोवनोर सेव्कल मोसे, रूबेंता अनि गादुना कांदांतुरकुन अनि मनसेना कांदांतुर्गटल अर्दो पिला कांदानुरकुन योर्दन लविडुन सिडयिङ बाज ईसङ तूसि सीतोर” इन्जेर वेह्‍तोर.

8 ते वूर माय्नलिर तेच्चि, अद देस्ना बोमिता समचार लिहि किय्ले सोंले आनेके वूर सङा, “मिरट सोन्जि पूरो बोमि वेलिसि, ताना नक्सा अनि तान बारेते लिहि कीसि नह्‍गा पिय्सि वरट. अस्के नना सिलोहुतगा येहोवना चर्नते मी साटि चिटिङ वाड्सि, ईसङ तूसंतोन” इन्जेर येहोसुवल आगे सीतोर. 9 ते वूर माय्नलिर सोन्जि, देसेम पूरो वेलिसेर, येडुङ ईसङ कीसेर, नह्‍क्ना लेका अनि अवेन बारेते लिहि कीतेर. अनि अद बोमिता नक्सा रेह्‍चि सिलोहुतगा मंवल येहोसुवनगा तत्तेर. 10 ते येहोसुवल वूर साटि, अगा सिलोहुतगा येहोवा बगवंतना चर्नते, वूरङ ईसङ पिय्सि चिटिङ वाड्तोर. अव चिटिनगा पोरोल्क पेसिता तीर अद बोमितुन वूर इज्रयेल पर्जतुन तूस्तोर.

बेंयमींता कांदांतुरकुन पुट्ता अद ईसा

11 अहन मोदोल जोका चिटिङ वाड्ता पेजे बेंयमीन कांदांतुरा पोरोडे चिटि पेसिता. अद चिटितगा मत्ता अद ईसतङ दूरङ यूदा कांदांतुरा अनि योसेप्ना कांदांतुरा ईसत नड्डुम मत्तङ.

12 ते वूरा ईसता तलवडा बाज्ना दूरा योर्दन लविडल मोदोल आसि, येरिको नगुडुन तलवडा बाज पोरो सोत्ता. अनि अगटल गुटना येरियतुन वीड्सि, बोडि गुटनगा मंवल बेत-अवेन चहर वेरि मत्ता. 13 अगटल अद ईसता दूरा काल्वडा बाज्ना लूज इंवल बेतेल वेरि सोत्ता. अगटल बूड रेय्सि काल्वडा बाज्नेके बेत-होरोन सोन्जि, उंडे गिर काल्वडा बाज्ना गुटत पोरोडा अतरोत-अदार चहर वेरि सोत्ता.

14 वूरा पोरयिङ बाज्ना दूरा बेत-होरोंतुन मुने मंवल गुटतल सुरु आसि, काल्वडा बाज्नेके मोडि मल्सि, यूदा कांदांतुरा नगुर आय्वल किर्यत-यारिम इंवल किर्यत-बाल वेरि सोत्ता.

15 अद किर्यत-यारिम्ना दूरतल वूरा ईसता काल्वडा बाज्ना दूरा सुरु आंता. अद दूरा पोरयिङ मंवल नेप्तोया इंवल जला वेरि मत्ता. 16 अगटल अद दूरा रेपायिम लोदिता तलवडा बाज मंवल गुटत बूड सोत्ता. इद गुटत हंदा बाज बेन-हिनोम लोदि मत्ता. अनि अद लोदि येरुसलेम्नल^* काल्वडा बाज्नेके दांता. अद दूरा हिनोम लोदिये येन-रोगेल वेरि बूड सोत्ता. 17 अद येन-रोगेल्तल तलवडा बाजुन मोडि मल्सि, येन-सेमेस वेरि सोत्ता. अगटल अदुमिम्नेके वर्वल सरदुन मुने मंवल गेलिलोतु इंवडेके सोत्ता. अगटल उंडे बूड रेय्सि, रूबेंता कांदांतोर बोहन इंवना बंडत करुम आग्ता. 18 अद तलवडा बाज्ना बेत-अरबा वेरि सोत्ता. अगटल तान मुने मंवल लोदितगा रेय्सि, तलवडा बाज बेत-होग्ला वेरि सोत्ता. 19 तान्गटल अद दूरा, योर्दन लव्डि साता सम्दुरतगा मीरे माय्वल वेरि सोत्ता. इद वूरा काल्वडा बाज्ना दूरा आंद.

20 योर्दन लव्डिये वूरा सिडयिङ बाज्ना दूरा आंद.

इव वूर बेंयमींता कांदांतुरकुन पुट्ता ईसतङ दूरङ आंदुङ.

बेंयमींता कांदांतुरकुन ईसते वातङ अव नगुक

21-24 बेंयमींता कांदांतुरा ईसते,

येरिको, बेत-होग्ला, येमेक-केजिज, बेत-अराबा, सेमरयिम, बेतेल, आविम, पारा, वोप्रा, केपा-अंमोनि, वोप्नि, गेबा इंवलिक बारा (12) नगुक अनि अवेन सिर्मुट्नङ नह्‍क गिर वूरा ईसतेन वातङ.

25-28 इवे आय्वा गिबियोन, रामा, बेयेरोत, मिस्पे, केपिरा, मोसा, रेकेम, इर्पियेल, तरला, सेला, येलेपु, येरुसलेमु इंवल येबुसियुल्क्ना नगुर, गिबिया अनि किर्यत-यारिम^* इंवलिक चोव्दा (14) नगुक अनि अवेन सिर्मुट्नङ नह्‍क गिर वूरा ईसतेन वातङ.

इव वूर बेंयमींता कांदांतुरकुन पुट्ता ईसता बोमितगा मंवलिक नगुक अनि नह्‍क आंदुङ.