योसेप्ना संतांदुरकुन पुट्ता अद ईसा
16
1 योसेप्ना संतांदुरकुन इत्तेके मनसेना अनि येप्रायिम कांदांतुरकुन वाता ईसा येरिको नगुडुन करुम योर्दन लविडगा सुरु आसि, अद येरिको नगुडुन सिडयिङ बाज्नङ जलन वीड्सि, बोडि गुटये पोरो मंवल बेतेल नगुर वेरि सोत्ता. 2 इद बेतेल इंवल लूज नगुडल अर्कियुल्क्ना येरियतगा मंवल अतरोत नगुर वेरि सोत्ता. 3 अगटल बूड पोरयिङ बाज यप्लेतियुल्क मंवल बूड्ना बेत-होरोंतुन वीड्सि, गेजेर नगुर वेरि सोन्जि, अगटल नड्डुम्ना सम्दुर वेरि अद दूरा मत्ता. 4 इदेनगा योसेप्नुर मर्क मनसेना अनि येप्रायिम्ना कांदांतुरकुन ईसा पुट्ता.
येप्रायिम्ना कांदांतुरकुन पुट्ता अद ईसा
5 येप्रायिम्ना कांदांतुरा दूरा इत्तेके, वूरङ पिला कांदान पिय्सि, वूरा ईसते वाता बोमिता दूरा इहिन मत्ता.
वूरा दूरा सिडयिङ बाज्ना अतरोत-अदार्तल सुरु आसि, पोरो मंवल बेत-होरोन वेरि सोत्ता. 6-7 अगटल नड्डुम्ना सम्दुर्तेके सोत्ता. तलवडा बाजुन मंवल मिक्मेततल सिडयिङ बाज मंवल तानत-सिलोतेके मोडि मल्सि, यानोहा वेरि सोत्ता. अद यानोहतल काल्वडा बाजुन मल्सि, अतरोत नगुर अनि नारह चहर्क्नेके सोत्ता. अगटल येरिको नगुडुन लग्सि योर्दन लव्डितेके बह्रि वाता. 8 तलवडा बाज्ना दूरा, तपुयतल मोदोल आसि, पोरयिङ बाज काना इंवल वच्चि कोल मंवल लोदितुन वीड्सि, नड्डुम सम्दुर वेरि मत्ता. इव येप्रायिम्ना कांदांतुरा ईसतङ दूरङ आंदुङ.
9 इवे आय्वा, उंडे कहितङ वीर येप्रायिम्ना कांदांतुरङ नगुक मनसेना कांदांतुर्गटल अर्दो पिला कांदानुर लोकुरा ईसते वाता बोमितगा मत्तङ. 10 वीर येप्रायिम्ना कांदांतुर गेजेरतगा मंवलिर कनानियुलकुन वूरा येरियतल तेंड्सि पूडा पर्मकि. अदेन साटि वूर नेट्क वेरि गिर येप्रायिम्ना कांदांतुरा सेवा कीसेर दासिर आसि मंतेर.