येहोसुवा 15

यूदा कांदांतुरकुन पुट्ता अद ईसा

1 यूदा कांदांतुरकुन, वूरङ पिला कांदान पिय्सि, पुट्ता अद ईसा काल्वडा बाज येदोम्ना दूरा वेरि अनि अह्‍ने काल्वडा बाज आक्रि मंवल सीन इंवलिक बोडि गुटना येरिया वेरि मत्ता.

2 वूरा काल्वडा बाज्ना दूरा अद साता सम्दुर्ता काल्वडता आक्रिता कोड्डितल सुरु आता. 3 अद अक्रबिम^* वर्वल जागते काल्वडा बाज सोन्जिकुन, सीन इंवलिक बोडि गुटङ वेरि मत्ता. अगटल अद कादेस-बर्नियता काल्वडा बाजनल वीड्सि, हेस्रोंतगा सोत्ता. अगटल अद्दर येव्सि, कर्का इंवल जागतेके मल्ता. 4 अहन मल्सि अस्मोन सोन्जि, अगटल ईजिप्ट्ना वत्ता लव्डि वेरि येव्सि, अगटल नड्डुम सम्दुर्ता डर्डि वेरि सोत्ता. वूरा काल्वडा बाज्ना दूरा अद तीर्दे मत्ता.

5-6 सिडयिङ बाज्ना दूरा साता सम्दुर्ता काल्वडता कोड्डिता डर्डितल मोदोल आसि योर्दन लविडा आक्रि वेरि मत्ता. अदे जागतल तलवडा बाज्ना दूरा मोदोल आसि, पोरो बेत-होग्लतेके सोत्ता. अगटल तलवडा बाज्नेके बेत-अराबा वेरि मत्ता. अगटल अद दूरा रूबेंता कांदांतोर बोहन इंवना बंडा वेरि सोत्ता. 7 अद आता पेजे अद दूरा आकोर इंवल लोदितुन वीड्सि, देबिर नगुर वेरि सोत्ता. अगटल तलवडा बाज मंवल गिल्गाल नगुडेके मोडि मल्ता. अदुमिम इंवल वर्वल सरदुन तलवडा बाज्नेके गिल्गाल मत्ता. इद अदुमिम वर्वल सरि आकोर लोदितुन काल्वडा बाज मत्ता. अद दूरा येन-सेमेस इंवल जलतुन वीड्सि, येन-रोगेल वेरि सोत्ता. 8 अद दूरा बेन-हिनोम लोदिये पोरो सोत्ता. इद लोदि येरुसलेम^* नगुडुन काल्वडा बाज मत्ता. अगटल बेन-हिनोम लोदितुन मुने मंवल गुटतल पोरयिङ बाज्नेके सोत्ता. इद रेपायिम इंवल जातितुर मंवल लोदिये तलवडा बाज्नेके मंवल आक्रिता बागम आंदु. 9 अद दूरा अद डेङल गुटतल, नेप्तोया इंवल जला वेरि सोत्ता. अगटल अद येप्रोन गुटत पोरो मंवलिक नगुक्ने सोत्ता. अगटल अद बाला^* वेरि सोत्ता. 10 अद दूरा पोरयिङ मंवल बालतल सेयिरु गुटतेके मोडि मल्ता. यारिम^* गुटता तलवडा बाजनल वीड्सि, बेत-सेमेस नगुर वेरि बूड रेय्सि, तिम्ना नगुडल वीड्ता. 11 अद दूरा तलवडा बाज्ना येक्रोन वेरि सोत्ता. अनि अगटल उंडे मुने सिक्रोन वेरि सोन्जि, अगटल बाला गुटन अनि यब्नेयेल चहरतुन वीड्सि मुने, नड्डुम्ना सम्दुर वेरि सोत्ता.

12 पोरयिङ बाज्ना दूरा अद नड्डुम्ना सम्दुर्ता डर्डि पूरो मत्ता.

इव सम्दो यूदा कांदांतुरङ पिला कांदानुर मंवल येरियतङ दूरङ आंदुङ.

कालेब्ना ईसते वाता बोमि

13 बगवंतल आगे सीता तीर येहोसुवल, वूर यूदा कांदांतुरा दूरत रोपोडा उंदि येरियतुन येपुनेनोर मरि कालेबुन सीतोर. अद बद इत्तेके, किर्यत-अर्बा, इदेन हेब्रोन गिर इंतेर. (अर्बा इंवल अनकु जातितोर बाबो आंदुर.) 14 अद येरियतल कालेब अनक्ना संतांदुर मुविरकुन इत्तेके, सेसयि, अहिमान अनि तल्मयि इंवलिरकुन पूडि सीसि तान आगुटि कीतोर.

15 अगटल वोर देबिर नगुडगा पिसेर मंवलिर सङा लडेय किय्ले सोत्तोर. इदेन तोले किर्यत-सेपेर इन्जेर केय्ंदिर. 16 अनि कालेब, “किर्यत-सेपेर नगुडुर सङा लडेय कीसि, तान आगुटि किय्वन ना मियड अक्सन सीसि मर्मिङ कींतोन” इन्जेर डवुन्डि पायुस्तोर. 17 ते कालेब्नोर तमुर कनज्नोर मरि ओत्नियेल अद नगुडुरकुन हारि कीसि, तान आगुटि कीतोर. अदेन साटि कालेब तंवा मियड अक्सन वोन सीसि मर्मिङ कीतोर.

18 ते अक्सल माड्सोना रोन सोत्ता पेजे, “वाव्टुन बरोबर येतङ जलङ गिर सीम इन्जि बाबन तल्का” इन्जेर ओत्नियेलतुन हक्लि कीता. बति^* अक्सले कुद तंवा सेड्मिते सोन्जि, गादित पोरोडल रेय्ता. अद सूड्सि कालेब, “नीकुन बतल पह्‍जे?” इन्जेर मियडुन पूसि कीतोर.

19 ते अद, “बाबा नाकुन नीवा आसिर्वाद सीम. निमे नाकुन काल्वडा बाज्ना उस्के बोमि आय्वल नेगेवतुन सीति. अदेन साटि नाकुन येतङ जलङ गिर पह्‍जे” इन्जेर कोर्ता. ते वोर पोरोडा बाज्नङ अनि बूड्ना बाज्नङ जलन सीतोर.

यूदा कांदांतुरङ नगुक

20 यूदा कांदांतुरङ, पिला कांदानुरकुन वाता ईसा इद आंदु.

21-32 काल्वडा बाज येदोम्ना दूरा वेरि, मंवलिक यूदा कांदांतुरङ नगुक बव इत्तेके, कब्जिल, येदेर, जागुर, कीना, दिमोना, अदादा, केदेस, हसोर, यित्नान, जीपु, तेलेम, बेयलोत, हसोर-हदत्ता, केरियोत-हेस्रोन इंवल हसोर, अमाम, सेमा, मोलदा, हसर्गदा, हेस्मोन, बेत-पेलेत, हसर-सुवल, बेयेर्सेबा, बिजियोतिया, बाला, लिम, येजेम, येल्तोलद, केसिल, होर्मा, सिक्लग, मद्मना, संसना, लेबयोत, सिलिहिम, आयिन, रिंमोन इंवलिक वीसा नोव (29) नगुक अनि अवेन सिर्मुट्नङ नह्‍क गिर वूरा ईसतेन वातङ.

33-36 पोरयिङ बाज्नङ गुटन बूड मंवलिक नगुक गिर यूदा कांदांतुरा ईसतेन वातङ. अव बव इत्तेके, येस्तयोल, जोरा, अस्ना, जानोहा, येन-गनिम, तपुया, येनम, यर्मुत, अदुलम, सोको, अजेका, सरयिम, अदितयिम, गेदेरा अनि गेदेर्वोतयिम इंवलिक चोव्दा (14) नगुक अनि अवेन सिर्मुट्नङ नह्‍क गिर वूरा ईसतेन वातङ.

37-41 उंडे दुस्रोक नगुक गिर इत्तेके, सेनान, हदासा, मिग्दल-गाद, दिलान, मिस्पे, योक्तयेल, लकिस, बोस्कत, येग्लोन, कबोन, लह्‍मस, कित्लिस, गेदेरोत, बेत-दागोन, नयामा, मकेदा इंवलिक सोला (16) नगुक अनि अवेन सिर्मुट्नङ नह्‍क गिर वूरा ईसतेन वातङ.

42-44 इवे आय्वा लिब्ना, येतेर, आसन, इप्ता, अस्ना, नेजिब, केयिला, अक्जिब, मारेसा इंवलिक नोव (9) नगुक अनि अवेन सिर्मुट्नङ नह्‍क गिर वूरा ईसतेन वातङ.

45-47 वूर यूदा कांदांतुरा ईसते येक्रोन नगुर अनि तान सिर्मुट्नङ नह्‍क अनि येरिया पूरो गिर वाता. येक्रोन नगुडल मोदोल कीसि, अस्दोद अनि गाजा येरियङ पूरो इत्तेके, अवेनगा मंवलिक नगुक अनि नह्‍क गिर, ईजिप्ट्ना लव्डि वेरि अनि नड्डुम्ना सम्दुर वेरि पग्रे मासि मत्तङ.

48-51 वूर यूदा कांदांतुरा ईसते बोडि गुटना येरियतगा मंवलिक नगुक गिर वातङ. अव बव इत्तेके, सामिर, यतिर, सोको, दंना, किर्यत-सना इंवल देबिर, अनब, येस्तेमो, अनिम, गोसेन, होलोन अनि गिलो इंवलिक अक्रा (11) नगुक अनि अवेन सिर्मुट्नङ नह्‍क गिर वूरा ईसतेन वातङ.

52-54 उंडे गिर, अरब, दूमा, येसन, जनिम, बेत-तपुया, आपेक, हुम्ता, किर्यत-अर्बा इंवल हेब्रोन अनि सीयोर इंवलिक नोव (9) नगुक अनि अवेन सिर्मुट्नङ नह्‍क गिर वूरा ईसतेन वातङ.

55-57 इवे आय्वा मायोन, कर्मेल, जीप, युटा, येज्रेयेल, योक्देयम, जानोहा, कयिन, गिबिया अनि तिम्ना इंवलिक दहा (10) नगुक अनि अवेन सिर्मुट्नङ नह्‍क गिर वूरा ईसतेन वातङ.

58-59 उंडे गिर हल्हुल, बेत-सूर, गेदोर, मारत, बेत-आनोत, येल्तेकोन इंवलिक सारुङ (6) नगुक अनि अवेन सिर्मुट्नङ नह्‍क गिर वूरा ईसतेन वातङ.

60 किर्यत-बाल इंवल किर्यत-यारिम, रब्बा इंवलिक रंड नगुक अनि अवेन सिर्मुट्नङ नह्‍क गिर वूरा ईसतेन वातङ.

61-62 बोडि गुटनगा येरियतगा बेत-अराबा, मिदिनु, सेकाका, निब्सान, सोवोडा नगुर अनि येन्गेदि इंवलिक सारुङ (6) नगुक अनि अवेन सिर्मुट्नङ नह्‍क गिर वूरा ईसतेन वातङ.

63 बति वूर यूदा कांदांतुर येरुसलेम्नगा मंवलिर येबुसियुलकुन तेंड्सि पूडा पर्मकि. अदेन साटि नेट्क वेरि गिर अद जातितुर यूदा कांदांतुर नड्डुम पिसेर मंतेर.