याकोब पूसि किय्वक्ने सोंवल
31
1 उंदि दिया सेर्न्डुक, “मा बावनगा मत्ता सम्दोतुन लूटि कीसि, तान हिंदले बाटो दनेवंतल आतोर” इन्जेर वड्क्तङ गोस्टिन बोरेय याकोबुन वेह्तोर.
2 अंटित मामहरिना मोकोम सूड्तेके, इदेन मुने मत्तपिनय कुसिते सेले इंवल याकोब करि कीतोर.
3 अस्के येहोवा बगवंतल याकोबुन सङा, “नी तादुर-बाबुरा देसेम्ने अनि चुटम-बंद्नगा मल्सि सोन.
नना नी सङा मंदंतोन” इन्जेर वेह्तोर.
4 ते याकोब तंवङ मंदङ मेह्चेर मंवल जागतले राहेल अनि लेयन केयुसि, अवेन सङा इहिन इत्तोर:
5 “मी बाबना मोकोम इदेन मुने मत्तपिनय इंके कुसिते सेले.
बति ना बाबोनोर बगवंतल नाकुन सात मंतोर.
6 नना किया परनच्चोर काम मी बाबन साटि कीतोन इंवल मीकुन टावय.
याकोब तंवङ वेय्लोकुन केयुस्वल
7 मी बाबल नाकुन पसि कीसि वेले जोकङ* नावा जीतमुन (राक्नि) बद्लि कीतोर.
तेर बति बगवंतल, मी बाबोनङ कपेटलिक पिलन्कनल नाकुन काबाड्तोर.
8 मी बावल हेरेनल सारलिक नीवा जीतम आनुङ इन्जेर इत्तोर.
अस्के सम्दि हेरेङ सारलिक पिलङे वह्तङ.
गोरेनल कार्यलिक नीवा जीतम आनुङ इन्जेर इत्तोर.
अस्के सम्दि गोरेङ कार्यलिक पिलङे वह्तङ.
9 इहिन बगवंतल, मी बाबोना जंवरतुन टेंड्सि नाकुन सीतोर.
10 हेरेनङ मंदङ गाब्डि आय्वल कालम्ने, नाकुन कला दिस्ता.
अद कलतगा सम्दो सारलिक बोकुक पाटकुन सङा पर्तड पिय्सेर मत्तङ.
11 अद कलतगा बगवंतनोर दूतल, नाकुन ‘याकोब’ इन्जेर केय्तोर.
ते नना, ‘हो! इगेने मंतोन’ इन्जेर वेह्तोन.
12 अस्के वोर, ‘नीवा तला तह्चि सूडा!
सम्दो सारलिक हेरे बोकुकुने पाटकुन सङा पर्तड पियुसेर मंतोन. बारितेके नी मामल लाबन नीकुन कीता सम्दो मोसेमुन नना सूड्तोन.
13 नीकुन बेतेलतगा पावे माय्वल बगवंतना ननय आंदुन.
अदेना निसनित साटि निमे उंदि बंडतुन निपुसि, तान्गा निय सोक्सि, नाकुन वाग्दन कीति.
अदेन साटि इंके इद देसनल पेसिसि, नीवा पुट्ता देस्ने मल्सि सोन’ इन्जि ना सङा वेह्तोर” इन्जेर अवेन वेह्तोर.
14 इद केन्चि राहेल अनि लेयल, “मा बावना जाय्जतनल माकुन बदे ईसा वायो.
15 मा बावल माकुन दुस्रो देस्नन दात सूड्सेर मंतोर.
माकुन वोम्सि, माक वाय्वल ईसतुन पूरो तितोर.
16 बगवंतल मा बावनगटल टेंड्सि सीता दन-दव्लत पूरो मावा अनि मावुर मरि-मियडा आंद.
अदेन साटि बगवंतल नी सङा वेह्तपे कीम” इन्जेर याकोबुन वेह्तङ.
17-19 अद वकत्ने लाबन तंवङ गोरेना बूरा कत्रि कियन साटि सोन्जि मत्तोर.
ते राहेल तंवोर बाबोना रोतङ पेन्क्नङ मूर्तिन कल्ता.
अस्के याकोब तयर आसि, तंवुर मरकुन अनि बाय्कोकुन हूटकुन पोरो उपुसीतोर.
अद पदना-आरम येरियतल, तना कमय कीता सम्दो जाय्जत इत्तेके, डोर-जंवरकुन अनि दन-दव्लतुन पिय्सि, कनान देसेम्ने तंवोर बाबो इसक्नगा सोंदन साटि पेसितोर.
20 दांतोन इन्जेर लाबंतुन* वेह्वा सोन्जि, तनकुन मामहरि कीता मोसेमुन तेर अदिक याकोब वोन कीतोर.
21 वोर तनकुन मत्ता सम्दो आस्ति पिय्सि सोत्तोर.
वोर युप्रटिस लविडुन वीड्सि, गिलादु मेटनेके सोंवल मोदोल कीतोर.
22 याकोब परर आसि सोत्तोर इन्जेर लाबंतुन मूंद रोज्क आता पेजे करे माता.
23 ते वोर लाबन तंवुर चुटम-बंदुन पिय्सि, येडुङ रोज्क्ना सरि आता पेजे, याकोब आग्ता गिलादु गुटत करुम येव्तोर.
24 अद नेटि रातुन बगवंतल कन्ज-काटेने लाबंतुन दिसि, “निमे सोङ्ने याकोबुन बतय किय्मा” इन्जेर वेह्तोर.
पेन्क्नङ मूर्तिना जाडा मह्क्वल
25 याकोब तंवङ डेरङ गिलादु येरियतङ मेटनगा वाट्सि मत्तोर.
ते लाबन गिर तंवुर चुटमुन तोडो अवे मेटनगा डेरङ वाट्सि, याकोबुन बेटे माय्ले सोत्तोर.
26 अस्के लाबन याकोबुन सङा, “निमे नाकुन बारि पसि कीति? लडेयतगा हारे मातुरङ वेय्लोकुन मेय्तुर वूर पिय्सि सोत्तपिनय ना मियकुन बारि पिय्सि वाति?
27 निमे नाकुन पसि कीसि, वेह्वक्ने बारि परर आसेर मंति? नीकुन कुसिते, वाजा-गाजते सारि कींदुन कि?
28 निमे ना मियकुन अनि ना तङ्मरि-तङ्मियकुन तोड्डि बुरा सिय्वक्ने, बारि इहिन पिसन मोडि कीति?
29 नीकुन दुक्सा सिया परंतोन.
बति नी बाबनोर बगवंतल, निनेता रातुन दिसि, ‘निमे सोङ्ने याकोबुन बतय किय्मा’ इन्जेर नाकुन वेह्तोर.
30 नी बाबना रोतुर पोरो वेले जीवा आसि मत्तेके सोन! बति ना रोतङ पेन्क्नङ मूर्तिन बारि कल्ति?” इन्जेर पूसि कीतोर.
31 ते याकोब लाबंतुन सङा, “निमे बल्मित नी मियकुन नह्गटल वोंतियो बतलो इन्जेर वेरिसि, परर आसि वातोम.
32 नीवङ पेन्क्नङ मूर्तिङ बोन्गा पुटंतङो वोर सायना.
नह्गा मंवलिक्नगटल नीवङ बवे मत्तेके मावुर चुटम-बंदुन मुने मह्क्सि, अवेन वोम” इन्जेर वेह्तोर.
बति राहेल अव मूर्तिन कल्सि तत्ता इंवल याकोबुन वोड्कि सेले मत्ता.
33 लाबन सोन्जि याकोब्ना डेरतगा, लेयना डेरतगा अनि अव रंड दासिक्नङ डेरनगा मह्क्तोर.
बति वोन बतङे पुट्मकि.
ते लेयना डेरतल पेसिसि, राहेल्ता डेरतगा सोत्तोर.
34 राहेल अव पेन्क्नङ मूर्तिन हूटड पोरोडा सामंतगा इर्सि, अवेन पोरो उत्ता.
ते लाबन ताना डेरा सम्दो मह्क्तोर बति अव पुट्मकि.
35 राहेल तंवोर बाबोन सङा, “नी मुने नना रेय्सि निल्वा काड्कि, निमे सोङ वाय्मा.
बारितेके नना बह्रि आसि मंतोन” इन्जेर वेह्ता.
ते वोर बचोर मह्क्तेके गिर अव मूर्तिङ पुट्मकि.
36 अस्के याकोब सोङुन वासि, लाबंतुन सङा, “नना बतल तप कीतोन? बद कसुडुन हिंदल निमे इचोर नावा पीचा कीसेर मंति?
37 निमे ना आस्ति पूरो मह्क्सि सूड्ति.
तेर बति नीवा रोता सामन बदे पुट्मकि.
उंदि मोका पुट्सि मंदर्ते तान नावुर मुने अनि नीवुर मुने इगे तचि इरा.
वूरे इद गोस्टिता तस्वा कींतेर.
38 नना वीसा (20) साल्क निह्गा मत्तोन.
नीवङ गोरेङे आयि, हेरेङे आयि, बस्के सूडा चोकोट वह्चेरेन मत्तङ.
नी मंदनङ बोकुकुन नना तिन्मकि.
39 केडता जिव्रस्ने साता अदेन निह्गा तर्मकि.
अद नुक्संतुन ननय निह्तोन.
नर्का आयि, पियल आयि, बोरे कले-कङ्रल वोतेक गिर निमे नह्गटल वसुल कींदि.
40 पियल येदिते, रात्ने पीनिते, नावा ताकद कमि आता.
ना कडकुन जोप कमि आता.
41 नीवङ रंड मियकुन साटि चोव्दा (14) साल्क निह्गा चाकोरा कीतोन.
अद आता पेजे, सारुङ (6) साल्क नीवङ मंदनल नना कमय कियन साटि काम कीतोन.
इद तीर्दे नीवा रोन वीसा (20) साल्क चाकोरा कीसेर मत्तोन.
अद गट्कते नावा जीतमुन वेले जोकङ बद्लि कीति.
42 ना तोत्तुरोर बगवंतल, अब्राहम्नोर बगवंतल अनि ना बाबो इसक वेरिवल बगवंतल, ना सङा मंवक इत्तेके, करलेन निमे नाकुन रिकम केय्क्ने सारि कींदि.
बगवंतल नना कीता कामुन अनि बोगे माता तक्लिबुन सूड्सि, निनेता रातुन नीकुन दम्कि सीतोर” इन्जेर वेह्तोर.
लाबन अनि याकोब रजु आय्वल
43 अस्के लाबन याकोबुन सङा, “इव वेय्लोक नावङ मियक आंदुङ.
वीर मरि-मियड गिर नावुर तङ-मर्क आंदिर.
इव मंदङ गिर नावङे आंदुङ.
नीकुन दिस्वल इद सम्दि जाय्जत नावय आंद.
बति इव वेय्लोकुने आयि, वीर मरि-मियडुने आयि नेंड नना बतय किया परोन.
44 अदेन साटि मरट इविर रजु आसि मंले, उंदि नियम इर्कट अनि इदेना निसनित साटि उंदि बंडा निपुस्कट वरा” इन्जेर वेह्तोर.
45 ते याकोब उंदि बंडा तचि निपुस्तोर.
46 अनि याकोब, “बंडङ मीरि कीम्ट” इन्जेर तंवुर चुटम-बंदुन सङा वेह्तोर.
ते वूर बंडङ तचि कुप्पा वाट्तेर.
अनि अद कुप्पत करुम वूर जेवुन कीतेर.
47 लाबन अद कुप्पतुन ‘यगर-सहदूता’* इन्जेर पोरोल दोस्तोर.
बति याकोब तान ‘गलेदु’* इन्जेर पोरोल इर्तोर.
48 लाबन, “नेंड इद कुप्पा नाकुन अनि नीकुन नड्डुम निसनि आयर” इन्जेर सडेन वेह्तोर.
(अदेन साटि तान गलेदु इन्जेर याकोब पोरोल दोस्तोर.)
49 अस्के लाबन, “मरट वोरोन्क वोरोर लक मनेके, येहोवा बगवंतल नाकुन अनि नीकुन नड्डुम जर्ग्वल सूडनुर” इन्जेर वेह्तोर.
अदेन लासि वूर तान, ‘मिस्पा’* इन्जेर पोरोल दोस्तोर.
50 अनि लाबन, “ना मियकुन दुक्सा सिय्वल सेलेके ना मियकुन आय्वा दुस्रोकुन तुङ्वल कीकिते, मा इविरकुन सूड्ले, बोरे सेलुर.
बति सम्दो बगवंतले सूडंतोर इन्जि हेतु इरा” इन्जेर वेह्तोर.
51 उंडे लाबन, “नाकुन अनि नीकुन नड्डुम निपुस्ता बंडतुन अनि कुप्पतुन सूडा.
52 नुक्सन कियना इन्जेर इवेन वीड्सि, नना निह्गा वाय्वक्ने, निमे नह्गा वाय्वक्ने, मरट हेतु इर्ले, इद बंडा अनि कुप्पा मंदंतङ.
53 अब्राहम्नोर, नाहोर्तोर अनि वूरोर बाबोनोर बगवंतल मा इविर नड्डुम नाय्दा तस्वा कीनुर” इन्जेर वेह्तोर.
अस्के याकोब तंवोर बाबो इसक, सेवा कीतोर वोर बगवंतना पोरोडे वोट वाड्तोर.
54 अद आता पेजे, याकोब अद मेटनगा बलि सीसि, जेवुन किय्ले तंवा चुटम-बंदुन केय्तोर.
ते वूर जेवुन कीसि, अगने अंटिता रातुन आरम कीतेर.
55 लाबन तेलरि सक्रेन तेच्चि, तंवङ मियकुन अनि तङ्मरकुन तोड्डि बुर्सि, वूरकुन आसिर्वाद सीसि, अगटल पेसिसि, तंवा येरियते मल्सि सोत्तोर.