पुट्गड्मि 23

सारना मरन

1-2 बस्केते सारन नूटा वीसा येडुङ (127) साल्क निंतङो, अस्के अद कनान देस्ना हेब्रोन इंवल किर्यतर्बा नगुडे मार्ता.

ते अब्राहम बाय्कोन साटि, बेय दुक्सते अड्तोर.

3-4 अनि वोर ताना कूर्दल तेच्चि, हेतु जातितुर्गा सोन्जि, “नना मी नड्डुम मंवल पर्देसिना आंदुन.

ना बाय्कोना कूरदुन माति किय्ले, इगे नाकुन इचुसि जागा कोतने येता सीम्ट” इन्जेर तल्क्तोर.

5-6 ते हेतु जातितुर अब्राहमुन सङा, “साब!

ममोट वेह्‍वल केन्जा.

निमे मा नड्डुम मंवल बगवंतनोर मुके माय्ननि आंदि.

मावङ वीच्क्ना जागतगा नीकुन पसंद वाता बेय चोकोट्ना जागा येता वचो.

अगा नी बाय्कोना कूरदुन माति कीम. मह्‍गटल बोरे गिर नीकुन वीच्क्ना जागा सिय्वक्ने मंनुर” इन्जेर वेह्‍तेर.

7 ते अब्राहम तेच्चि, हेतु जातितुरकुन वरिसि, दंडोस दोस्तोर.

8-9 अनि, “नना ना बाय्कोना कूरदुन माति किय्वल मीकुन पसंद मत्ता काड्कि, ना गोस्टि केन्जट: सोहर्तोर मरि येप्रोंतगा सोन्जि, ‘मकपेलतगा मंवल नी वाव्टा दूरते बुयरि मंता.

मा सम्दिर मुनेन तान बचोर किमत मंता अचोर अब्राहम नीकुन सीसि, येतंतोर बेरे’ इन्जि ना हिंदल आसि, वोन कोरट” इन्जेर वूरकुन वेह्‍तोर.

10-11 अद वकत्ने येप्रोन गिर हेतु जातितुर बरोबर नगुडा गेट्नगा उच्चि मत्तोर.

तंवा नगुडुन रोपो वाय्वलिर सम्दिर केन्जनल अब्राहमुन सङा, “साब!

अहन आयो.

ना गोस्टि केन्जा.

अद पूरो वावुर, तान्गा मंवल बुयरि गिर ना लोकुर मुने, नीकुन पुकुटे सींतोन. अगा नी बाय्कोना कूरदुन माति कीम” इन्जेर एप्रोन वेह्‍तोर.

12 अस्के अब्राहम वूर मुने वरिसि, दंडोस दोस्तोर.

13 वूर सम्दिर केन्चेर मनेके, येप्रोंतुन सूड्सि, “दया कीसि नावा गोस्टि केन्जा.

अद बोमिता किमत नीकुन सींतोन.

ना कोतङ येत्तेकेन ना बाय्कोना कूरदुन अगा वोसि, माति कींतोन” इन्जेर वेह्‍तोर.

14-15 ते येप्रोन अब्राहमुन सङा, “साब!

दया कीसि, निमेय ना गोस्टि केन्जा.

नालुङ नुह्‍क (400) चांदितङ बिलना बोमि आंद.

नाकुन अनि नीकुन अवेना लेकय सेले. अदेन साटि नी बाय्कोना कूरदुन माति कीम” इन्जेर इत्तोर.

16 ते अब्राहम येप्रोंता गोस्टि केन्चि, हेतु जातितुर मुने, येप्रोन वेह्‍ता किमत नालुङ नुह्‍क चांदितङ बिलङ कह्‍चि^* वोन सीतोर.

17-18 इद तरिकते हेतु जातितुर अनि अद नगुडुर वेलेटिर माय्नलिर गवा मनेके, माम्रेतुन सिडयिङ मकपेलतगा मंवल येप्रोंता वावुर (इत्तेके: अद वावुर, तान्गा मंवल बुयरि अनि तानङ दूरङ वेरि मंवलिक सम्दो मरक गिर) अब्राहम्ना जाय्जत्ना लेकते वातङ.

19-20 अस्के अब्राहम तंवा बाय्को सारना कूरदुन, कनान देस्ना अद बुयरितगा माति कीतोर.

इहिन अद हेतु जातितेरा वावुर अनि बुयरि वीचकुन साटि अब्राहम्ना जाय्जत आता.